އީރާނުން އިޒްރޭލަށް ވަރުގަދަ ރައްދެއް ދޭނެ ކަމީ ޝައްކެއް އޮތް ކަމެއް ނޫން: އީރާނުގެ ޗީފް ކޮމާންޑަރ

ހަމާސްގެ ވެރިޔާ އިސްމާއީލް ހަނިއްޔާ އަވަހާރަ ކޮށްލުމުގެ ބަދަލު ހިފުމުގެ ގޮތުން އީރާނުން އިޒްރޭލަށް ވަރުގަދަ ރައްދެއް ދޭނެ ކަމީ ޝައްކެއް އޮތް ކަމެއް ނޫން ކަމަށް އީރާނުގެ އަސްކަރިއްޔާގެ ޗީފް ކޮމާންޑަރ މޭޖަރ ޖެނެރަލް އަބްދުލްރަހީމް މޫސާވީ ވިދާޅުވެއްޖެއެވެ.

އީރާނުގެ އަސްކަރިއްޔާގެ ޗީފް ކޮމާންޑަރ މިމޭރުމުން ވާހަކަފުޅު ދެއްކެވީ ހަމާސްގެ ވެރިޔާގެ މަގާމަށް ޔަހްޔާ ސިންވާރް އައްޔަން ކުރުމާ ގުޅޭ ގޮތުން ދެއްވި ބަޔާނެއްގައެވެ.

މޫސާވީ ވިދާޅުވީ، ސިންވާރް އަކީ ފަހުގެ ތަރީޚް ދުށް ވަރުގަދަ ފަހުލަވާނެއް ކަމުގައެވެ.

މޫސާވީ ވިދާޅުވީ ހަމާސްގެ ވެރިކަމަށް ސިންވާރް އިސްކުރުމުން ހަމާސް އާއި ފަލަސްތީނުގެ ހައްގުގައި ޖިހާދު ކުރާ ފަރާތްތަކުން ކުރިއަށްދާން ވިސްނާ ގޮތް ސާފުކޮށް އެބަ އިނގޭ ކަމަށާއި، ޔަހޫދީ ދައުލަތައް ކުރިމަގެއް ނެތް ކަމަށާއި، އެ ދައުލަތް ނެތި ހަލާކުވެދާތަން އިރާދަކުރެއްވިއްޔާ ފެނިގެންދާނެ ކަމުގައެވެ.

ހަނިއްޔާ އަވަހާރަ ކޮށްލީ އިޒްރޭލުން ކަން ފާހަގަ ކުރައްވަމުން މޫސާވީ އިޒްރޭލް ސިފަ ކުރެއްވީ ޖަރީމާ ހިންގާ ގޭންގެއްގެ ގޮތުގައެވެ. އެ އަމަލު އިޒްރޭލުން ހިންގީ އެއްވެސް ލަދުހަޔާތެއް، ބައިނަލް އަގްވާމީ ގާނޫނަކަށް އަދި އާންމުކޮށް ގަބޫލު ކުރާ ހަމަތަކަށްވެސް ބެލުމެއްނެތި ކަމަށް އީރާނުގެ އަސްކަރިއްޔާގެ ވެރިޔާ ވިދާޅުވިއެވެ.