އެހީގެ އުޅަނދެއް ޖެހި ހިނގި އެކްސިޑެންޓެއްގައި 20 މީހަކު ޝަހީދުވެއްޖެ

ޣައްޒާ އަށް ބޭނުންވާ އިންސާނީ އެހީގެ ސާމާނު އުފުލަމުން ދިޔަ އުޅަނދެއްގައި ޖެހި ހިނގި އެކްސިޑެންޓެއްގައި 20 މީހަކު ޝަހީދުވެފައިވާ ކަމަށް، ޣައްޒާގެ ސިވިލް ޑިފެންސް އިން ހާމަކޮށްފި އެވެ. 

ބުދަ ދުވަހު ސިވިލް ޑިފެންސް އިން ހާމަ ކޮށްފައިވާ ގޮތުގައި، ޣައްޒާގެ މެދު ތެރޭގެ ނުސީރަތު ރެފިއުޖީ ކޭމްޕް ކައިރީގައި އެހީގެ އުޅަނދެއްގައި ޖެހި ހިނގި މި އެކްސިޑެންޓުގައި 20 މީހަކު ވަނީ ޝަހީދުވެފަ އެވެ.

ސިވިލް ޑިފެންސްގެ ތަރުޖަމާނު މަހުމޫދު ބައްސާލް އޭއެފްޕީ އަށް ވިދާޅުވެފައިވާ ގޮތުގައި، އަންގާރަ ދުވަހުގޭ ރޭ މެންދަމުގެ ވަގުތެއްގައި އެހީގެ ސާމާނު ބަރުކޮށްގެން ދަތުރު ކުރަމުން ދިޔަ އުޅަނދުގައި ޖެހި 20 މީހުން ޝަހީދުވެފައިވާއިރު، އެތައް ބަޔަކަށް ވަނީ އިތުރު އަނިޔާތައް ލިބިފަ އެވެ. އެ ހާދިސާ ހިނގާފައި ވަނީ އެތައް ބަޔަކު އެހީގެ އިންތިޒާރުގައި ތިއްބާ ކަމަށް ވެސް ބުނެފައިވެ އެވެ. 

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން ބުނެފައިވާ ގޮތުން، އިސްރާއީލް އިން ދަނީ އުޅަނދު ފަހަރު ތަކުގެ ޑްރައިވަރުންނަށް އެތައް މަޖުބޫރެއް ކުރުވަމުންނެވެ. އެގޮތުން ރައްކާތެރި ނޫން މަގު ތަކުން އެހީ ބަހާ މަރުކަޒު ތަަކަށް ދަތުރު ކުރުމަށް މަޖުބޫރު ކުރަމުން އަންނަ ކަމަށް ބުނެފައިވެ އެވެ. 

ހަމާސްގެ މީޑިއާގެ އޮފީހުން ނެރުނު ބަޔާނެއްގައި ބުނެފައި ވަނީ، އެކަމުގެ ސަބަބުން ކަންބޮޑުވެފައިވާ ރައްޔިތުން އެހީގެ ސާމާނު ހިފައިގެން އަންނަ އުޅަނދުތައް ކައިރި އަށް ޖަމާވަމުން އަންނަ ކަމަށާއި، އެކަމުގެ ސަބަބުން ތޮއްޖެހުން ބޮޑުވާ ކަމަށެވެ. 

 ޣައްޒާގައި ހިނގާފައިވާ މި ހާދިސާ ބައިނަލްއަޤުވާމީ ޖަމިއްޔާ އަދި ޖަމާއަތްތަކުން ސިފަ ކުރަނީ، ޣައްޒާގައި ކުރިމަތިވެފައިވާ އިންސާނީ ކާރިސާ ބޮޑު ކަމުގެ ނިޝާނެއްގެ ގޮތުގަ އެވެ. 

ބައިނަލްއަޤުވާމީ ފަރާތްތަކުން ގޮވާލާފައި ވަނީ، ޣައްޒާގައި އިންސާނީ އެހީ ފޮރުކޮށްދިނުމުގެ މަސައްކަތް ރައްކާތެރި ކަމާ އެކު ކުރިއަށް ގެންދެވޭނެ މަގު ފަހިކޮށްދިނުމަށެވެ.