ބާ ކައުންސިލްގެ ރައީސް ވިޝާމް އަވަހާރަވުމަކީ ޤާނޫނީ ދާއިރާ އަށް ލިބުނު ފޫނުބެދޭނެ ވަރުގެ ގެއްލުމެއް - ރައީސް
ކުރީގެ ރައީސް މައުމޫން އަބްދުލްގައްޔޫމުގެ އެޓާނީ ޖެނެރަލްގެ ނައިބުކަން ވިޝާމް އަދާކުރެއްވި
ރައީސުލްޖުމްހުރިއްޔާ ޑރ.މުހައްމަދު މުއިއްޒު
ބާ ކައުންސިލްގެ ރައީސް އަލްއުސްތާޛު އިސްމާޢީލް ވިޝާމް އަވަހާރަވުމަކީ ޤާނޫނީ ޚިދުމަތުގެ ދާއިރާއަށް ލިބުނު ފޫނުބެދޭނެ ވަރުގެ އުނިކަމެއްކަމަށް ރައީސުލްޖުމްހުރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް އެފަދައިން ވިދާޅުވީ ބާ ކައުންސިލްގެ ރައީސް ވިޝާމް އަވަހާރަވުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ. ރައީސް މުއިއްޒު ވަނީ މަރުޙޫމްގެ ޢާއިލާއަށާއި ބާ ކައުންސިލްގެ އެންމެހާ ޤާނޫނީ ވަކީލުންނަށް އެކަމާއި ގުޅިގެން ތަޢުޒިޔާ ދަންނަވާފައެވެ. ރައީސް ވިދާޅުވީ ވިޝާމް އަވަހާރަވުމަކީ ރާއްޖޭގެ ޤާނޫނީ ޚިދުމަތުގެ ދާއިރާއަށް ލިބުނު ފޫނުބެއްދޭނެ ވަރުގެ އުނިކަމެއް ކަމަށާއި އެއީ ޤައުމަށް ގެއްލިގެން ދިޔަ ޚިދުމަތްތެރި ޒުވާން ތަޢުލީމީ ދަރިއެއްކަމަށެވެ.
ވިޝާމް އަވަހާރަވީ ބުދަ ދުވަހުގެ ރޭގެ ވަގުތެއްގައެވެ. ވިޝާމް އަވަހާރަވީ ފައިގެ ސާޖަރީއަކަށްފަހު ފަރުވާ ހޯއްދަވަމުން ގެންދަވަނިކޮށް ކަމަށް މީޑިއާތަކުން ވަނީ ރިޕޯޓްކޮށްފައެވެ. ކުރީގެ ރައީސް މައުމޫން އަބްދުލް ގައްޔޫމުގެ އެޓާނީ ޖެނެރަލްގެ ނައިބުކަން ކުރެއްވި ގާނޫނީ ވަކީލު ވިޝާމް، ބާ ކައުންސިލުގެ ރައީސް ކަމަށް އިންތިޚާބުވެވަޑައިގެންނެވީ 12 ޖޫން 2022 ގައެވެ.
