ވިސްނުމާ ފިކުރިއްޔާތުގެ ގޮތުން މިހާ ފަހަތަށް ދުވަހަކު ވެސް ދިވެހިން ނުދާ ކަމަށާއި، ހުރިހާ ކަމަކުންވެސް ފެންނަނީ ރައީސް ޑރ.މުހައްމަދު މުއިއްޒުގެ ޚުދުމުހުތާރު ސިފަ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

އެ މަނިކުފާނު އެފަދައިން ވިދާޅުވީ ބުރާސްފަތި ދުވަހުގެ ރޭ ޕީއެންއެފްގެ ޖަލްސާގައި ވާހަކަދައްކަވަމުންނެވެ. ވަޒީރުންނާއި އަދި މިނިވަން މުއައްސަސާތަކާއި އިދާރާތަކާއި މެދު ޢަމަލުކުރާ ގޮތުން ރައީސް ޑރ.މުހައްމަދު މުއިއްޒުގެ ޚުދުމުހުތާރު ސިފަ ފެނި ހާމަވަމުންދާ ކަމަށް އެ މަނިކުފާނު ވިދާޅުވިއެވެ.

ވަޒީރުންނާއި އިދާރާތައް އަދި މިނިވަން މުއައްސަސާތަކަކީ ޤާނޫނުއަސާސީން ވަކި ޒިންމާތަކެއް އޮތް ބަޔަކަށް ވީ ނަމަވެސް ރައީސް މުއިއްޒު ބޭނުންފުޅު ވަނީ ހުރިހާ ކަމެއްގައި އެ މަނިކުފާނު ބޭނުންވާ ގޮތަށް ކަންކަން ނިންމަން ކަމަށާއި އެއީ ޚުދުމުހުތާރު ވެރިއެއްގެ ސިފަ ކަމަށް އެ މަނިކުފާނު ވިދާޅުވިއެވެ. އަދި އެ މީހުންނަށް ފަހު ބަސް ބުނާނީ ރައީސް ކަމަށް މުއިއްޒު ވިދާޅުވުމުން އެއީ މޮޅު ވާހަކަ އެއް ކަމަށް ހީކޮށް ވަޒީރުން ވެސް އެ ވާހަކަ އަށް ތާއީދުކޮށް އަތްތިލަބަޑިޖަހާ ކަމަށާއި އެއީ ދެރަވަރުކަމެއް ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ ރައީސުލްޖުމުހޫރިއްޔާ ވެރިކަން ކުރައްވަން ވާނީ ލަފަޔާއި މަޝްވަރާގެ މަތިން ކަމަށާއި ޤާނޫނުއަސާސީގެ ރޫހަކީ އެއީ ކަމަށެވެ. ކެބިނެޓެއް އޮތުމުގެ މައިގަނޑު ސަބަބަކީ ވެސް އެއީ ކަމަށާއި ކެބިނެޓަކީ ރައީސަށް ލަފާ އަރުވާ ތަނެއް ކަމަށް އެ މަނިކުފާނު ވިދާޅުވިއެވެ. އެހެންކަމުން ވުޒާރާތަކާއި އިދާރާތަކަށް ލާ މީހުންނަކީ ފަހު ބަސް އެ މަނިކުފާނަށް ބުނެވޭނެ ފަދަ މީހުން ކަމަށް ރައީސް ހާމަކަން ބޮޑުކޮށް ވިދާޅުވުމަކީ އެއްވެސް ސިފައެއްގައި މޮޅުކަމެއް ނޫންކަމަށް ރައީސް ޔާމީން ވިދާޅުވިއެވެ. އެއްވެސް ދިމާލަކަށް ހަމަޖެހުމެއް ގެނެސް ނުދެވި ކަންކަން ދަނީ ގޯހުން ގޯހަށް ކަމަށާއި ޤައުމު ރަނގަޅަށް ނުހިންގޭ ކަމަށް އެ މަނިކުފާނު ވަނީ ވިދާޅުވެފައެވެ.

ރައީސް ޔާމީން ވަނީ ރައީސް މުއިއްޒުގެ ކިބައިން ފެންނަނީ ހަރުކަށިކަމާއި ގޮތް ދޫ ނުކުރުން ކަމަށް ވިދާޅުވެފައެވެ. އަދި ކަންކަމުގައި ތަޖުރިބާ ހުރި މީހުންގެ ބަސް ނުހޯދާ ރައީސް މުއިއްޒު އަށް ވިސްނިވަޑައިގަންނަވާ ގޮތަށް އެކަނި ކަންކަން ކުރުމަކީ ޤައުމުގެ ކަންކަން ގޯސްކޮށް ދާ އެއް ސަބަބު ކަމަށް ރައީސް ޔާމީން ވަނީ ވިދާޅުވެފައެވެ.