މިހާރު ކުރިއަށްދާ ސީޒަން އެންމެ ފުރަތަމަ ފެށުނު ދުވަސް ކޮޅު، ބާސެލޯނާ ދޫކޮށްލަން ނިންމި ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ދާދި ފަހުން ޒަވީ ވަނީ މިހާރު ކުރިއަށްދާ ސީޒަން ނިމުމާއެކު، ބާސެލޯނާގެ ކޯޗުކަން ދޫކޮށްލާނެކަން އިއުލާން ކޮށްފަ އެވެ. ޒަވީ އެ ނިންމުން ނިންމާފައި ވަނީ ބާސެލޯނާގެ އިސްވެރިންނާ ވެސް މަޝްވަރާ ކުރުމަށްފަހު އެވެ. ޒަވީގެ ނިންމުމަށް އިޙުތިރާމް ކުރާނެކަން ވެސް ބާސެލޯނާ އިން ވަނީ ހާމަކޮށްފަ އެވެ. ބާސެލޯނާ ދޫކޮށްލަން ޒަވީ ނިންމިއިރު، އޭނާ އަށް އޮތީ ޕްރެޝަރު ވެސް ބޮޑުވެފަ އެވެ.
އެކަމާ ގުޅިގެން ވާހަކަ ދައްކަމުން ޒަވީ ބުނީ، މަގާމުން ވަކިވާން ނިންމާފައި އޮންނަތާ ވަރަށް ގިނަ ދުވަސް ވެއްޖެ ކަމަށެވެ. އޭނާ ބުނީ ބާސެލޯނާގައި ކުރަމުން އައި މަސައްކަތުގެ އަގު، އެންމެ ރަނގަޅު ގޮތުގައި ވަޒަން ނުކުރެވޭ ކަމަށެވެ. އެހެންކަމުން ކުލަބަށްޓަކައި އެ ނިންމުން ނިންމީ ކަމުގައި ޒަވީ ބުންޏެވެ. އިތުރަށް އޭނާ ބުނީ، އެއީ ކުއްލި އަކަށް ނިންމަން ޖެހުނު ނިންމުމެއް ވެސް ނޫން ކަމަށެވެ. ތެދު ތެދަށް ބުނާނަމަ، މިހާރު ކުރިއަށްދާ ސީޒަން ފެށުނުކޮޅު، ބާސެލޯނާ ދޫކޮށްލަން ނިންމާފައި ވާނެ ކަމުގައި ވެސް ޒަވީ ބުންޏެވެ.
ބާސެލޯނާ އަށް ކުރިން ކުޅެދީ، އެ ޓީމުގެ ކެޕްޓަންކަން ވެސް ކޮށްފައިވާ ޒަވީ، ބާސެލޯނާގެ ކޯޗުކަމާ ހަވާލުވީ 2021 ވަނަ އަހަރު އެވެ. އެންމެ ފުރަތަމަ އެ ކުލަބާއެކު އޭނާ ސޮއި ކުރީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ މިއަހަރުގެ ޖޫން މަހުގެ ނިޔަލަށެވެ. ނަމަވެސް، ބާސެލޯނާ އިން ވަނީ ޒަވީގެ އެއްބަސްވުން އިތުރު އެއް އަހަރަށް އައު ކޮށްފަ އެވެ. އެހެންކަމުން، މިހާރުގެ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަަލަށެވެ. އެއްބަސްވުމުގައި ބާކީ އެއް އަހަރު އޮއްވާ ބާސެލޯނާ ދޫކޮށްލަން ޒަވީ ނިންމިއިރު، އޭނާގެ އިރުޝާދުގެ ދަށުން އެ ކުލަބުން ވަނީ ދެ ތައްޓެއް ކާމިޔާބު ކޮށްފަ އެވެ.
ޒަވީ އަށް ޕްރެޝަރު ބޮޑުވާން ފެށީ، މި ސީޒަންގައި ބާސެލޯނާގެ ނަތީޖާތައް ދަށްވުމުގެ ސަބަބުންނެވެ. އެގޮތުން ސްޕެނިޝް ސުޕަަ ކަޕްގެ ފައިނަލްގައި ވާދަވެރި ރެއާލް މެޑްރިޑު އަތުން ބަލިވީއިރު، ސްޕެނިޝް ކަޕްގެ ކުއާޓާ ފައިނަލުން ބަލިވެ އެ މުބާާރާތުން ވެސް ވަނީ ކަޓައިފަ އެވެ. ސްޕެނިޝް ލީގުގައި ބާސެލޯނާ އޮތީ ހަތަރު ވަނައިގަ އެވެ. ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި އެ ޓީމު ނިކުންނަން ޖެހޭނީ އިޓަލީގެ ނަޕޯލީއާ ދެކޮޅަށެވެ.
