ބާސެލޯނާގެ ކޯޗުކަމުން ޒަވީ ހަނާންޑޭޒް ވަކިވާކަން އިއުލާނުކުރުމުން ޓީމުގެ ހުރިހާ ކުޅުންތެރިން ފޯވަޑް ރޮބަޓް ލެވޮންޑޯސްކީގެ ގޭގައި ބައްދަލުކޮށްފި އެވެ.

އިއްޔެ މެންދުރު ކެއުމަކާއެކު ބޭއްވި މި ބައްދަލުވުމަށް ދިޔައީ ހަމައެކަނި ކުޅުންތެރިންނެވެ. ޒަވީ ވެސް އަދި އޭނާގެ ކޯޗިން ޓީމުގެ އެއްވެސް މެމްބަރަކު ވެސް ނުދެ އެވެ. ބައްދަލުވުމުގެ ބޭނުމަކީ ކުޅުންތެރިން މިވަގުތު އެކަތިގަނޑެއްގެ ގޮތުގައި މަސައްކަތް ކުރުމަށް ބާރު އެޅުން ކަމަށް ސްޕޭނުގެ ބައެއް މީޑިއާތަކުން ބުނެ އެވެ.

ކުލަބުގެ ނަތީޖާ ދަށްވެ، ކުޅުންތެރިންގެ އިތުބާރު އޭނާ އަށް ގެއްލިފައިވާ ކަމަށް އަމިއްލަ އަށް ގަބޫލުކޮށް ޒަވީ މި ސީޒަނަށް ފަހު ކުލަބާ ވަކިވާކަން ކުޅުންތެރިންގެ ގާތުގައި ބުނީ އެކަން އިއުލާނުކުރުމަށްފަހު އެވެ. އަދި ލެވޮންޑޯސްކީ އަށް މިކަން އެނގުނީ ސޯޝަލް މީޑިއާއިން ކަމަށްވެއެވެ. އޭނާ އަކީ މިދިޔަ ސީޒަނުގައި ޒަވީގެ އިރުޝާދުގެ ދަށުން ގެނައި އަދި މިވަގުތު ޓީމުގައި ހުރި ދުނިޔޭގެ އެންމެ މަތީ ފެންވަރުގެ ކުޅުންތެރިޔާ އެވެ.

ބާސެލޯނާގެ ކުޅުންތެރިންގެ ތެރޭގައި ޒަވީއާ މެދު މާބޮޑު މައްސަލައެއްނެތެވެ. މިޑްފީލްޑަރު ޕެޑްރީ ބުނެފައިވަނީ އެމީހުން ތިބީ ޒަވީ ހުރިހާ ދުވަހަކު ސަޕޯޓްދޭން ތައްޔާރަށް ކަމަށެވެ. އަދި މިޑްފީލްޑަރު ގަވީ ބުނެފައިވަނީ އެންމެ ފަހު ވަގުތާ ހަމައަށް ވެސް ޒަވީ އަށް ބޭނުންވާ ސަޕޯޓް ދޭނެ ކަމަށެވެ. އަދި މިޑްފީލްޑަރު ފްރޭންކީ ޑިޔޮންގ ބުނެފައިވަނީ މައްސަލައަކީ ކޯޗު ނޫން ކަމަށާއި ނަތީޖާ ނުނެރެވުނީ ކުޅުންތެރިންނަށް އެކަށީގެންވާ ވަރަށް މަސައްކަތް ނުކުރެވޭތީ ކަމަށެވެ.

ސްޕޭންގެ ބައެއް ނޫސްތަކުން ބުނާ ގޮތުގައި ލެވޮންޑޯސްކީ ޓީމުގެ ހުރިހާ ކުޅުންތެރިންނަށް ކެއުމެއް ދިނީ މިވަގުތު ޓީމު ލީޑްކޮށްދިނުމަށް އޭނާގެ ކިބައިން ކުލަބުގެ އިސްވެރިން އެދުމުންނެވެ. އޭގެ ތެރޭގައި ކުލަބުގެ ރައީސް ހުއާން ލަޕޯޓާ ވެސް ހިމެނެ އެވެ. ލަޕޯޓާ ވަނީ ޒަވީ ވަކިވާން ނިންމުމާއެކު މިވަގުތު ކުޅުންތެރިންނާއި ސަޕޯޓަރުން އެކުވެރިކަމާއެކު މަސައްކަތް ކުރަންޖެހޭ ކަމަށް ގޮވާލައިފަ އެވެ.