ރުހުން ނުދިން ބޭފުޅުން އަލުން ކެބިނެޓަށް އައްޔަންކުރުމަކީ ޤާނޫނު އަސާސީގެ ބާރު ކަނޑުވާލުން - ހިސާން

ރުހުން ނުދިން ބޭފުޅުން އަލުން ކެބިނެޓަށް އައްޔަންކުރުމަކީ ޤާނޫނު އަސާސީގެ ބާރު ކަނޑުވާލުންކަމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިން ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ. ހިސާން ވިދާޅުވީ ރައިސް ޑރ.މުހައްމަދު މުއިއްޒު ރުހުން ނުލިބުނު ވަޒީރުން އަލުން އެ މަޤާމަށް އައްޔަންކުރައްވާފައި ވަނީ ޤާނޫނުގައި ސާފު ސަރީހަ އިބާރާތުން ދެން ވަޒީރުން އައްޔަން ނުކުރެވޭނެކަމަށް ލިޔެފަ ނެތް ނެތުމުގެ މައްޗަށް ބެއްލެވުމަށް ފަހުގައި ކަމަށެވެ. ނަމަވެސް މަޖިލީހުން ބޮޑުކޮށް ނޫނެކޭ ބުނީމަ އަނެއްކާ ވެސް ހަމަ އެ ބޭފުޅުން އެ މަޤާމަށް އެ ޕޯޓްފޯލިއޯ އަށް އައްޔަންކުރެވިގެން ދިޔަތަން ފެނިވަޑައިގަތުމުން ކަންބޮޑުވުން ފާޅުކުރެއްވިއެވެ. ޤާނޫނު އަސާސީގައި ކޮންމެ މާއްދާ އެއްވެސް ލިޔެފައި ވަނީ މަޤްސަދެއް އޮވެގެން ކަަމަށާއި ވަޒީރުންނަށް ރުހުން ހޯދުމަކީ ލާޒިމްކަމެއްކަން ސާފުވާ ކަމަށް ހިސާން ވިދާޅުވިއެވެ. އަދި ރުހުން ހޯދަން މަޖިލީހަށް ހުށަހަޅަން ޖެހޭ ކަަމަށް ވެސް ހިސާން ވިދާޅުވިއެވެ.

އިކޮނޮމިކް މިނިސްޓަރ މުހައްމަދު ސައީދުގެ އިތުރުން އެޓަރނީ ޖެނެރަލް އަހުމަދު އުޝާމް އާއި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު، ހައުސިން މިނިސްޓަރު ޑރ.އަލީ ހައިދަރަށް ރުހުން ނުދޭން އެމްޑީޕީ ޕީޖީ ގްރޫޕުން ނިންމިއެވެ. ނަމަވެސް ސައީދަށް ރުހުން ދޭން ފެންނަ ކަަމަށް 37 މެމްބަރުން އަދި ރުހުން ނުދޭން ނުފެންނަ ކަމަށް 32 މެމްބަރުން ވޯޓުދެއްވިއެވެ. އެޓަރނީ ޖެނެރަލް އަހުމަދު އުޝާމް އަށް ރުހުން ދޭން ފެންނަ ކަމަށް ވޯޓުދެއްވީ 24 މެމްބަރުންނެވެ. ބާކީ 44 މެމްބަރުން ވޯޓުދެއްވީ އޭނާ އަށް ރުހުން ދޭން ނުފެންނަ ކަމަށެވެ. އެހެންކަމުން އޭނާ އަށް ރުހުން ދޭން މަޖިލީހުން ފާސްވެފައެއް ނުވެއެވެ. އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު އަށް ރުހުން ދޭން ނުފެންނަ ކަަމަށް 31 މެމްބަރުން، ރުހުން ދޭން ފެންނަ ކަމަށް 30 މެމްބަރުން ވޯޓުދެއްވިއެވެ. އަދި ވަކި ގޮތަކަށް ވޯޓުދެއްވަން ބޭނުން ނުވާ 8 މެމްބަރުން ތިއްބެވިއެވެ. އޭނާ އަށް ވެސް ރުހުން ދިނުމަށް މަޖިލީހުން ފާސްވެފައެއް ނުވެއެވެ.