ރައީސް ޑރ.،މުހައްމަދު މުއިއްޒު އައްޔަންކުރެއްވި ވަޒީރުންނަށް ރުހުންދިނުމާ މެދު ގޮތެއް ނިންމަން ރައްޔިތުންގެ މަޖިލީހުގައި ހޯމަ ދުވަހު ނެގި ވޯޓުގައި ވިޕްލައިނާއި ޚިލާފުވި މެންބަރުންނަށް ފިޔަވަޅު އެޅުމާ މެދު ގޮތެއް ނިންމާނީ އިސް ލެވެލްގައި މަޝްވަރާކުރުމަށްފަހު ކަމަށް އެމްޑީޕީގެ ޕާލިމެންޓަރީ ގުރޫޕުން ބުނެފިއެވެ.

ރާއްޖެ އެމްވީ އަށް މައުލޫމާތުދެއްވަމުން އަލިފުށީ ދާއިރާގެ މެންބަރު އަދި އެމްޑީޕީ ޕީޖީ ގުރޫޕުގެ ލީޑަރު މުހައްމަދު ރަޝީދު ހުސައިން (ބިގޭ) ވިދާޅުވީ އެމްޑީޕީ އިން ނެރެފައިވާ ތްރީލައިންވިޕާއި ޚިލާފަށް ބައެއް މެންބަރުން ވޯޓުދެއްވާފައިވާ ކަމަށެވެ. މި ކަމާއި ގުޅިގެން އެޅޭނެ ފިޔަވަޅުތައް ޕާލިމެންޓްރީ ގްރޫޕްގެ ޤަވާއިދުގައި ވެސް ހުންނަ ކަމަށާއި ފިޔަވަޅުތައް އަޅާއިރު އެއްފަހަރަށް ވުރެ ގިނައިން ކަންކަން ހިނގާފައިވާ ނަމަ، އަމަލުކުރާނެ މިންގަނޑުތަކެއް ސާފުކޮށް ބަޔާންކޮށްފައިވާ ކަމަށް އޭނާ ވިދާޅުވިއެވެ. އެގޮތުން މެންބަރަކު ތަކުރާރުކޮށް އެގޮތަށް އަމަލުކޮށްފައިވާނަމަ، އަދަބު ބޮޑުވެގެންދާނެކަން މެންބަރު މުހައްމަދު ރަޝީދު ފާހަގަކުރެއްވިއެވެ.

މީގެ އިތުރުން މިފަދަ ކަމަކާއި ގުޅިގެން ޕާޓީއަށް އެޅިދާނެ ފިޔަވަޅުތަކެއް ވެސް ހުރިކަން ފާހަގަކުރައްވަމުން މެންބަރު ވިދާޅުވީ ވިޕްލައިނާއި ޚިލާފުވެވަޑައިގެންފައިވާ ޕާޓީގެ ޓިކެޓްގައި އިންތިޚާބަށް ވާދަކުރައްވާ ބޭފުޅުންގެ ހުންނަން ޖެހޭ ވަކި ޝަރުހުތަކެއް ވެސް ހުންނަކަމަށާއި އެ ޝަރުތުތަކަށް ބެލުމަށްފަހު، ޕީޖީ ގްރޫޕުން އަޅާ ފިޔަވަޅުގެ އިތުރުން އެހެނިހެން އިތުރު ފިޔަވަޅުތައް އެޅުމަށް މަގުފަހިވާކަމަށެވެ. ނަމަވެސް މިގޮތަށް ފިޔަވަޅުތައް އެޅުމަށް ނިންމާނީ މިވަގުތު ޕާޓީގެ ކުރިމަގަށާއި ކުރަން ހުރި ކަންކަމަށް ބެލުމަށް ފަހު ކަމަށް އޭނާ ވިދާޅުވިއެވެ. އަދި ލީޑަރޝިޕް ލެވެލްގައި މަޝްވަރާކުރުމަށް ފަހުގައި ނޫނީ އެކަމަށް ގޮތެއް ނުނިންމަވާނެ ކަމަށް ވެސް މެންބަރު މުހައްމަދު ރަޝީދު ވިދާޅުވިއެވެ. އޭނާ ވަނީ ޕާޓީގެ ކުރިމަގާއި ކުރަން ހުރި ކަންކަމަށް ބެލުމަށް ފަހު ފިޔަވަޅެއް އަޅަން ޖެހޭ ނަމަ އެ މަސައްކަތް ކުރިއަށް ގެންދަވާނެ ކަމަށް ވެސް ވިދާޅުވެފައެވެ.

މީގެއިތުރުން ހަމައެކަނި ޕީޖީ ލީޑަރަށް ލިބިދޭ ބާރެއްގެ ދަށުން ހިންގާ ޤަވާއިދަށް ބެލުމަށް ފަހު ފިޔަވަޅެއް އަޅަން ޖެހޭ ނަމަ އެކަން ކުރައްވާނެ ކަމަށް ވެސް އޭނާ ވިދާޅުވިއެވެ. އެހެންނަމަވެސް އެކަމާ މެދު އަދި ގޮތެއް ނުނިންމަވާކަމަށް މެންބަރު މުހައްމަދު ރަޝީދު ވިދާޅުވިއެވެ.

އެމްޑީޕީން ތްރީ ލައިން ވިޕެއް ނެރެފައިވަނީ އެޓަރނީ ޖެނެރަލް އަހުމަދު އުޝާމް އާއި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު އާއި ހައުސިން މިނިސްޓަރު ޑރ.އަލީ ހައިދަރަށް ރުހުން ނުދިނުމަށެވެ.

ނަމަވެސް އެމްޑީޕީގެ ހަތަރު މެންބަރަކު އެ ޕާޓީގެ ވިޕްލައިނާ ހިލާފަށް ވޯޓުދެއްވާފައިވެއެވެ. އެ މެންބަރުންނަކީ ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް، އިހަވަންދޫ ދާއިރާގެ މެންބަރު މުހައްމަދު ޝިފާއު އާއި ކުޅުދުއްފުށި ދެކުނު ދާއިރާގެ މެންބަރު ޖަމްޝީދު އަދި ބިލެއްދޫ ދާއިރާގެ މެންބަރު އަހުމަދު ހަލީމެވެ.

ހޯމަ ދުވަހުގެ ވޯޓުގައި އެޓަރނީ ޖެނެރަލް އަހުމަދު އުޝާމަށް ރުހުން ދޭން ފެންނަ ކަމަށް ވޯޓުދެއްވީ 24 މެންބަރުންނެވެ. ބާކީ 44 މެންބަރުން ވޯޓުދެއްވީ އޭނާ އަށް ރުހުން ދޭން ނުފެންނަ ކަމަށެވެ. އެހެންކަމުން އޭނާ އަށް ރުހުން ދޭން މަޖިލީހުން ފާސްވެފައެއް ނުވެއެވެ. އަދި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދަށް ރުހުން ދޭން ނުފެންނަ ކަަމަށް 31 މެންބަރުން، އަދި ރުހުން ދޭން ފެންނަ ކަމަށް 30 މެންބަރުން ވޯޓުދެއްވިއެވެ. އަދި ވަކި ގޮތަކަށް ވޯޓުދެއްވަން ބޭނުން ނުވާ 8 މެންބަރުން ތިއްބެވިއެވެ. އޭނާ އަށް ވެސް ރުހުން ދިނުމަށް މަޖިލީހުން ފާސްވެފައެއް ނުވެއެވެ. ނަމަވެސް އިކޮނޮމިކް މިނިސްޓަރު ސައީދަށް ރުހުން ދޭން ފެންނަ ކަަމަށް 37 މެންބަރުން އަދި ރުހުން ދޭން ނުފެންނަ ކަމަށް 32 މެންބަރުން ވޯޓުދެއްވިއެވެ. ސައީދަށް ރުހުން ނުދިނުމަށް އެމްޑީޕީގެ ޕީޖީ ގްރޫޕުން އޮތީ ނިންމާފައެވެ.

އެހެން ހުރިހާ ވަޒީރުންނަށް ރުހުން ދޭން މެންބަރުން ވަނީ ނިންމާފައެވެ. ރައީސް ޑރ.މުހައްމަދު މުއިއްޒު ވަނީ ރުހުން ނުލިބުުނު 3 ބޭފުޅުން އަނެއްކާ ވެސް ކެބިނެޓަށް އައްޔަންކުރައްވާފައެވެ.