ރައީސް މުއިއްޒުގެ އިތުބާރު ނެތްކަމަށް ހުށަހަޅަން އެމްޑީޕީގެ ޕީޖީން ފާސްކޮށްފި
ރައީސް ޑރ.މުހައްމަދު މުއިއްޒު ރައީސުލްޖުމްހޫރިއްޔާކަމުގެ ހުވާކުރެއްވުމުގެ ރަސްމިއްޔާތުގެ ތެރެއިން
ރައީސް ޑރ.މުހައްމަދު މުއިއްޒުގެ އިތުބާރު ނެތް ކަމަށް ހުށަހަޅަން އެމްޑީޕީގެ ޕީޖީ ގްރޫޕުން ފާސްކޮށްފިއެވެ.
އެމްޑީޕީ ޕީޖީ ގްރޫޕުން އެގޮތަށް ފާސްކޮށްފައި ވަނީ މިއަދު ބޭއްވި އެ ޕާޓީގެ ޕީޖީ ގްރޫޕްގެ ބައްދަލުވުމުގައެވެ.
މައުލޫމާތު ލިބިފައިވާ ގޮތުގައި މުއިއްޒުގެ އިތުބާރު ނެތްކަމަށް ހުށަހަޅަން ފާސްކުރީ މިއަދުގެ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
މިކަމާއި ގުޅޭ އިތުރު ތަފްސީލެއް މިހާތަނަށް އައި އިރު އެމްޑީޕީގެ ޕީޖީ ގްރޫޕުން ހާމައެއް ނުކުރައްވައެވެ.
ޤާނޫނު އަސާސީގެ 100 ވަނަ މާއްދާގެ (ހ)ގައި ބުނާ ގޮތުން ވަކި ހާލަތުތަކެއް މެދުވެރިވެއްޖެ ނަމަ ރައްޔިތުންގެ މަޖިލީހުން ފާސްކުރާ ޤަރާރަކުން ރައީސުލްޖުމްހޫރިއްޔާ ނުވަތަ ރައީސުލްޖުމްހޫރިއްޔާގެ ނައިބު މަޤާމުން ވަކިކުރެވިދާނެއެވެ. އެ ހާލަތުތަކަކީ
1. އިސްލާމް ދީނުގެ އަސްލަކާ ނުވަތަ ޤާނޫނުއަސާސީ އާޢި ނުވަތަ ޤާނޫނަކާ ކަނޑައެޅިގެން ޚިލާފުވުން
2. ރައީސުލްޖުމްހޫރިއްޔާގެ މަޤާމުގައި ނުވަތަ ރައީސުލްޖުމްހޫރިއްޔާގެ ނައިބު މަޤާމުގައި ހުރެ ކުރުން އެކަށީގެން ނުވާ ފަދަ ކަމެއްކުރުން
3. ރައީސުލްޖުމްހޫރިއްޔާގެ ނުވަތަ ރައީސުލްޖުމްހޫރިއްޔާގެ ނައިބުގެ މަސްޢޫލިއްޔަތު އަދާކުރުމުގައި ޤާބިލްވުން
އެ މައްދާގެ (ށ)ގައި ބުނާގޮތުން މި މާއްދާގެ (ހ)ގައި ބަޔާންކޮށްފައިވާ ފަދަ ޤަރާރެއް ރައްޔިތުންގެ މަޖިލީހަށް ހުށަހެޅޭނީ މަޖިލީހުގެ މަދުވެގެން ތިންބައިކުޅަ އެއްބައި މެމްބަރުން ސަބަބު ބަޔާންކޮށް ހުށަހަޅާ ލިޔުމަކުންނެވެ.
ރައީސް ނުވަތަ ނައިބު ރައީސް ވަކިކުރަން ހުށަހަޅާ ޤަރާރުގައި ބަޔާންކޮށްފައިވާ މައްސަލަތައް ތަހުގީގުކުރުމަށް މަޖިލީހުގެ ކޮމިޓީއަކާއި ހަވާލުކުރެވިދާނެ ކަމަށް އެ މާއްދާގެ (ނ)ގައި ވަނީ ބުނެފައެވެ. ރައީސް ވަކިކުރުމަށް ހުށަހަޅާ ޤަރާރު ފާސްވާނީ މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެބައިގެ އަޤުލަބިއްޔަތުންނެވެ. މިހާރު މަޖިލީހުގައި ތިއްބެވީ 80 މެމްބަރުން ކަމަށް ވުމާއި އެކު އިތުބާރު ނެތްކަމުގެ މައްސަލަ ކާމިޔާބުކުރުމަށް ބޭނުންވާނީ 53 މެމްބަރުންގެ ވޯޓެވެ.
