ރަކިޓިޗް، ސައުދީ ލީގަށް ބަދަލު ވަނީ

ސްޕެއިންގެ ސެވިއްޔާ އަށް ކުޅެމުން އަންނަ ކްރޮއޭޝިއާގެ މިޑްފީލްޑަރު އިވާން ރަކިޓިޗް، ސައުދީ ޕްރޯ ލީގަށް ބަދަލުވާން ނިންމައިފި ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 35 އަހަރުގެ ކުޅުންތެރިޔާ ބަދަލު ވަނީ ސައުދީ ލީގުގެ އަލް ޝަބާބަށެވެ. 2020 ވަނަ އަހަރު ސެވިއްޔާ އަށް ބަދަލުވެ، އެ ކުލަބާއެކު އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. ނަމަވެސް، ސައުދީ ލީގުގެ އަލް ޝަބާބުން ލިބުނު ހުށަހެޅުން ރަކިޓިޗް ވަނީ ޤަބޫލުކޮށްފައި ކަމަށް ރިޕޯޓުތައް ބުނެ އެވެ. އެގޮތުން، އެ ކުލަބާއެކު މިހާރު އެއްބަސްވުމަކަށް އާދެވިފައިވާ ކަމަށާއި، މެޑިކަލްގެ ފުރަތަމަ ބައިގެ ކަންކަން ހޯމަ ދުވަހު ކުރިއަށް ގެންދާނެ ކަމަށް ބުނެފައިވެ އެވެ. އޭގެ ފަހުން، އަންނަ ހަފުތާގެ ތެރޭގައި، ރަސްމީކޮށް އޭނާ އެ ކުލަބަށް ބަދަލު ވާނެ ކަމަށް ވެސް މީޑިއާ ތަކުން ވަނީ ރިޕޯޓުކޮށްފަ އެވެ.

މީޑިއާ ތަކުން ރިޕޯޓުކޮށްފައިވާ ގޮތުގައި، މޭޖާ ލީގު ސޮކާ (އެމެރިކާ ލީގު) އަށް ބަދަލުވުމުގެ ވިސްނުން ވެސް މީގެ ކުރިން ރަކިޓިޗް ވަނީ ގެންގުޅެފަ އެވެ. އެގޮތުން ކުރިން އޭނާ އާއެކު ސްޕެއިންގެ ބާސެލޯނާ އަށް ކުޅުނު ލިއޮނަލް މެސީ، ލުއިސް ސުއަރޭޒް، ޖޯޑީ އަލްބާ އަދި ސާޖިއޯ ބުސްކެޓްސް ކުޅެމުން އަންނަ އިންޓަ މިއާމީ އަށް ބަދަލުވުމުގެ ވާހަކަތައް ވެސް ދެކެވުނު ކަމަށް ވަނީ ބުނެފަ އެވެ.

ރަކިޓިޗް އެންމެ ބޮޑަށް ފާހަގަކޮށްލެވުނީ ވެސް ބާސެލޯނާގަ އެވެ. އެ ކުލަބުގައި ހޭދަކުރި ހަ ސީޒަންގެ ތެރޭގައި އޭނާ ވަނީ، ބާސެލޯނާ އަށް 310 މެޗު ކުޅެދީ 36 ލަނޑު ޖަހަައިފަ އެވެ. ބާސެލޯނާ އާއެކު އޭނާ ވަނީ 13 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު، ސްޕެނިޝް ކަޕް، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަަޕް އަދި ފީފާ ކުލަބު ވޯލްޑް ކަޕް ހިމެނެ އެވެ. ބާސެލޯނާ އަށް ބަދަލުވުމުގެ ކުރިން އޭނާ ކުޅުނީ ވެސް ސެވިއްޔާ އަށެވެ.

ރަކިޓިޗް ވަނީ 2007 ވަނަ އަހަރު ފެށިގެން، 2019 ވަނަ އަަހަރާ ހަމައަށް ކްރޮއޭޝިއާގެ ޤައުމީ ޓީމަށް ވެސް ކުޅެފަ އެވެ. ޤައުމީ ޓީމަށް އޭނާ ވަނީ 106 މެޗު ކުޅެދީ 15 ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ 2018 ވަނަ އަހަރު ރަޝިޔާގައި ކުރިއަށް ދިޔަ ފީފާ ވޯލްޑް ކަޕްގެ ފައިނަލްގައި ކުޅެފަ އެވެ.