ކާމިޔާބަށް ދާން ބޭނުންވާ ހުރިހާ ވަސީލަތެއް އެބަ ހުރި: ގަރޭސާ

ކާމިޔާބަށް ވާސިލުވުމަށް ބޭނުންވާ ހުރިހާ ވަސީލަތެއް، ޗިލީ ޤައުމީ ޓީމުގައި އެބަ ހުރި ކަމަށް އެ ޓީމުގެ ކޯޗަކަށް ހަމަޖެއްސި އާޖެންޓީނާގެ ރިކާޑޯ ގަރޭސާ ބުނެފި އެވެ.

އޭނާ މިހެން ބުނީ، ޗިލީގެ ޤައުމީ ޓީމުގެ ކޯޗުކަމާ ހަވާލުވުމަށްފަހު، ފުރަތަމަ ފަހަރަށް ނޫސްވެރިންނާ ވާހަކަ ދައްކަމުންނެވެ. އެގޮތުންް އޭނާ ބުނީ، މިއީ އަދި ފަށައި ގަތުމެއް ކަމަށާއި، ކުރިއަށް އޮތް ތަނުގައި ގިނަ މަސައްކަތްތަކެއް ކުރަން އޮތް ކަމަށެވެ. އެގޮތުން އޭނާގެ އެންމެ ބޮޑު އެއް މަސައްކަތަކީ، ވީއެންމެ އަވަހަކަށް ޓީމު ދަސްކޮށް، ޓީމަށް ހޭނުން ކަަމަށް ގަރޭސާ ބުންޏެވެ. ޚާއްސަކޮށް ކުޅުންތެރިންނާ ވާހަކަ ދައްކައި، ކުޅުންތެރިން ރަނގަޅަށް ދަސް ކުރަން ޖެހޭ ކަމުގައި އޭނާ ބުންޏެވެ.

ހަމައެއާއެކު، ޗިލީގައި މަސައްކަތް ކުރާނީ އޭނާގެ އެންމެ ފުރިހަމަ އަށް ކަމަށާއި، ބޭނުންވަނީ ޗިލީ އަށް ރީތި ނަމެއް ހޯދައިދިނުމަށް ކަމަށް ގަރޭސާ ވަނީ ބުނެފަ އެވެ. އޭނާ ފާހަގަ ކުރި ގޮތުގައި ޗިލީ އަކީ ވަރަށް ބޮޑަށް ފުޓުބޯޅައާ ގުޅިފައިވާ ޤައުމެކެވެ. އެހެންކަމުން، ޗިލީގެ ރައްޔިތުންނާއި، ޚާއްސަކޮށް ފުޓުބޯޅަ އަށް ލޯބި ކުރާ ފަރާތްތަކެއް ހިނިތުންވުން ގެނެސްދޭނެ ހުރިހާ މަގަކުން މަސައްކަތް ކުރާނެ ކަމަށް ވެސް އޭނާ ބުންޏެވެ.

މީގެ އިތުރުން ގަރޭސާ ބުނީ، އޭނާ ޤަބޫލު ކުރާ ގޮތުގައި ކާމިޔާބަށް ވާސިލުވުމަށް ބޭނުންވާ ހުރިހާ ވަސީލަތެއް ޗިލީގައި ހުރި ކަމަށެވެ. އެހެންކަމުން، އެ ވަސީލަތްތަކާއެކު މަސައްކަތްކޮށް، ކާމިޔާބު ހޯދޭނެ ކަމުގެ ފުރިހަމަ ޔަގީންކަން އޮތް ކަމަށް ވެސް އޭނާ ބުންޏެވެ. މިހާރު ހުރި ކަންކަން އިތުރަށް ފުރިހަމަކޮށް، ރަނގަޅު ޓީމެއް އެކުލަވާލުމަކީ ކޮންމެހެން ކުރަން ޖެހޭނެ ކަމެއްގެ ގޮތުގައި ވެސް އޭނާ ފާހަގަ ކުރި އެވެ.

އޭނާ ދެކޭ ގޮތުގައި ޗިލީގައި ތިބި ކުޅުންތެރިންނަކީ އަޚުލާޤު ރަނގަޅު، ފުޓުބޯޅައިގެ ވައްޓަފާޅި ދަންނަ ކުޅުންތެރިންނެވެ. އަދި އެ ކުުންތެރިންނަކީ ހުނަރުވެރި ކުޅުންތެރިންތަކެއް ކަމަށާއި، ބޭނުންވަނީ ރަނގަޅު މަސައްކަތެއްކޮށް، އެ މަސައްކަތުގައި ދެމި ތިބުން ކަމަށް ވެސް އޭނާ ވަނީ ބުނެފަ އެވެ.