"ރައީސް ޑރ. މުއިއްޒުގެ ފުރަތަމަ ދަތުރުފުޅުން، ރައީސް ޞާލިހުގެ ފުރަތަމަ ދަތުރުފުޅުގައި ހޯދި ފައިސާގެ 10 އިންސައްތަވެސް ނުލިބޭ"
26 ޖެނުއަރީ 2024 | ހުކުރު 06:58ރައީސް ސާލިހު ކުރެއްވި ދަތުރުފުޅުގެ 10 އިންސައްތަ ވެސް ރައީސް މުއިއްޒުއަށް ލިބިވަޑައިނުގަންނަވާކަމަށް އިބްރާހީމް ވަހީދު ވިދާޅުވި
އެމްޑީޕީގެ ޑެޕިއުޓީ ޗެއާޕަރސަން އިބްރާހީމް ވަހީދު (އިބުރޭ)
ރައީސް ޑރ.މުހައްމަދު މުއިއްޒުގެ ފުރަތަމަ ދަތުރުފުޅުން، ރައީސް އިބްރާހީމް މުހައްމަދު ޞާލިހުގެ ފުރަތަމަ ދަތުރުފުޅުގައި ހޯދި ފައިސާގެ 10 އިންސައްތަ ވެސް ލިބިވަޑައިގެންފައިނުވާ ކަމަށް އެމްޑީޕީގެ ޑެޕިއުޓީ ޗެއާޕަރސަން އިބްރާހީމް ވަހީދު (އިބުރޭ) ވިދާޅުވެއްޖެއެވެ.
ބުދަ ދުވަހުގެ ރޭ އެމްޑީޕީގެ ހަރުގެ ޖަލްސާގައި ވާހަކަދައްކަވަމުން އިބްރާހީމް ވަހީދު ވަނީ ޗައިނާ އަށް ރައީސް ޑރ. މުއިއްޒު ކުރެއްވި ދަތުރުފުޅަކީ ކާމިޔާބު ދަތުރުފުޅެއްކަމަށް ބުނަމުންދާތީ އެކަމަށް ފާޑުވިދާޅުވެފައެވެ. އޭނާ ވިދާޅުވީ ކުރީގެ ރައީސް އިބްރާހީމް މުހައްމަދު ސާލިޙުގެ ވެރިކަމުގައި އެމަނިކުފާނުގެ ފުރަތަމަ ދަތުރުފުޅުގައި އިންޑިއާއަށް ވަޑައިގަންނަވާ ރާއްޖެއަށް ބޮޑެތި މަންފާތަކެއް ހޯއްދަވާ ދެއްވި ކަމަށެވެ.
އެގޮތުން ޤައުމުގެ ރައީސުން އެހެން ޤައުމުތަކަށް ކުރައްވާ ދަތުރުފުޅުތަކުގެ ކާމިޔާބީގެ މިންވަރު ބަލާނީ އެ ދަތުރަކުން ގައުމަށް ލިބުނު ތަކެއްޗަށް ނުވަތަ ކުރެވުނު ކަންކަމަށް ބެލުމަށް ފަހުގައި ކަމަށް އިބްރާހީމް ވަހީދު ވިދާޅުވިއެވެ. އެގޮތުން ބަލާއިރު ރައީސް ޑރ.މުއިއްޒުގެ ވެރިކަމުގެ ފުރަތަމަ ދަތުރުފުޅުގައި ޗައިނާ އިން ލިބުނީ 130 މިލިއަން ޑޮލަރުގެ ޕްރޮޖެކްޓުކަމަށް އޭނާ ވިދާޅުވިއެވެ. ނަމަވެސް ފައިސާ ލިބިފައިނުވާކަމަށް އިބްރާހީމް ވަހީދު ފާހަގަކުރެއްވިއެވެ.
އެހެންނަމަވެސް ރައީސް ސާލިހު އެންމެ ފުރަތަމަ ކުރެއްވި ދަތުރުފުޅުން އިންޑިއާއިން 1.4 ބިލިއަން ޑޮޮލަރު ހޯއްދެވިކަމަށް އިބްރާހީމް ވަހީދު ވިދާޅުވިއެވެ. އޭނާ ވިދާޅުވީ އެ އަދަދުގެ ތެރެއިން 1.2 ބިލިއަން ޑޮލަރަކީ ޕްރޮޖެކްޓުތައް ކަމަށާއި އަދި އޭގެ ތެރެއިން 200 މިލިއަން ޑޮލަރަކީ ފައިސާގެ ގޮތުގައި ލިބުނު އެހީކަން އިބްރާހީމް ވަހީދު ފާހަގަކުރެއްވިއެވެ.
އެހެންކަމުން ރައީސް ސާލިހު ކުރެއްވި ފުރަތަމަ ދަތުރުފުޅުގެ ދިހަ އިންސައްތަ ވެސް ރައީސް ޑރ. މުއިއްޒަށް ލިބިވަޑައިގެންފައިނުވާ ކަމަށާއި ދެ ރައީސުންގެ ފުރަތަމަ ދަތުރުފުޅު އަޅާކިޔާނަމަ، ރައީސް ޑރ. މުއިއްޒުގެ ދަތުރުފުޅަކީ ކާމިޔާބު ދަތުރެއްކަމަށް ބުނާ ސަަބަބާ މެދު އިބްރާހީމް ވަހީދު ވަނީ ސުވާލު އުފައްދަވާފައެވެ.
