"ޓްރާންސްޕޯޓް މިނިސްޓަރަށް ނޭނގި ދެއްކުނީ ރައީސް ޑރ.މުއިއްޒު ވަގަށް ގަރާޖުތަކެއް ރަޖިސްޓްރީކޮށްދެއްވި ވާހަކަ" - އިބުރޭ
މިނިސްޓަރު އަމީން ވިދާޅުވީ މިދިޔަ ފަސް އަހަރު މާލެ ސަރަހައްދަށް 69580 ވެހިކަލް ރަޖިސްޓްރީކޮށްފައިވާކަމަށް
މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ބޭއްވެވި ނޫސްވެރިންގެ ބައްދަލުވުމެއްގެ ތެރެއިން
މިދިޔަ ސަރުކާރުން ގޯސްކޮށް ކަންކަން ކުރިކަން ދައްކަވަން މަސައްކަތްކުރެއްވުމުގެ ތެރޭގައި، ދަތުރުފަތުރާއި މަދަނީ އުދުހުންތަކާ ބެހޭ މިނިސްޓަރު މުހައްމަދު އަމީނަށް އޮޅިގެން ވިދާޅުވެވުނީ މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މޭޔަރުކަމުގައި ވަގަށް ގަރާޖުތަކެއް ރެޖިސްޓްރީކޮށްދެއްވި ވާހަކަ ކަމުގައި އެމްޑީޕީގެ ޑެޕިއުޓީ ޗެއާޕަރސަން އިބްރާހީމް ވަހީދު (އިބުރޭ) ވިދާޅުވެއްޖެއެވެ.
އޭނާ މިހެން ވިދާޅުވީ ބުރާސްފަތި ދުވަހުގެރޭ އެމްޑީޕީގެ ހަރުގެ ޖަލްސާގައި ވާހަކަދައްކަވަމުންނެވެ.
3 ޖެނުއަރީގައި ބޭއްވި ނޫސްވެރިންގެ ބައްދަލުވުމެއްގައި ދަތުރުފަތުރާއި މަދަނީ އުދުހުންތަކާ ބެހޭ މިނިސްޓަރު މުހައްމަދު އަމީން ވަނީ މިދިޔަ ފަސް އަހަރު 69580 ވެހިކަލް ރެޖިސްޓްރީކޮށްފައިވާ ކަމަށް ވިދާޅުވެފައެވެ. އޭގެ ތެރެއިން 42000 ވެހިކަލް ރެޖިސްޓްރީކޮށްފައި ވަނީ މާލެ ސަރަހައްދަށް ކަމަށް ވެސް އޭނާ ވިދާޅުވިއެވެ. މި ކަމަށް އިޝާރާތްކުރައްވާ އިބްރާހީމް ވަހީދު ވިދާޅުވީ މިނިސްޓަރު އަމީން އެ ވާހަކަތައް ދައްކަވާފައިވަނީ މިދިޔަ ސަރުކާރުގައި އުސޫލްތަކުން ބޭރުން ކަމެއް ކުރިކަމަށް ދައްކަވަން ކަމަށް ޤަބޫލުކުރައްވާ ކަމަށާއި، ނަމަވެސް މިނިސްޓަރު އަމީން އެ ވާހަކަތައް ދެއްކެވި އިރު މާލެ ސަރަހައްދަށް ގިނަ ވެހިކަލްތަކެއް ރެޖިސްޓްރީކޮށްފައި ހުރި ސަބަބަށް ބައްލަވާފައިނުވާ ކަމަށް ވެސް އޭނާ ވިދާޅުވިއެވެ.
މާލެ ސަރަހައްދުގައި ސިޓީ ކައުންސިލްގައި ރަޖިސްޓްރީކޮށްފައި އޮންނަ ގަރާޖެއްގެ ލިޔުމެއް ނެތި، ހަތަރުފުރޮޅުލީ އުޅަނދެއް ރަޖިސްޓްރީ ނުކުރެވޭކަން އިބްރާހީމް ވަހީދު ފާހަގަކުރެއްވިއެވެ. އަދި އެމްޑީޕީގެ މެޖޯރިޓީއޮތް މާލެސިޓީ ކައުންސިލްގައި ވޭތުވެދިޔަ 3 ދައުރުގައި އެކަން އޮތީ ކޮންމެ ވެސް ވަރަކަށް ކޮންޓްރޯލްކުރެވިފައި ކަމަށް އޭނާ ވިދާޅުވިއެވެ. ނަމަވެސް 2021 ވަނަ އަހަރު އޭރުގެ އިދިކޮޅު ޕީޕީއެމްގެ މެޖޯރިޓީއާއެކު ޑރ. މުުއިއްޒުގެ މޭޔަރުކަމުގައި މާލޭގެ ވެހިކަލްތައް ރެޖިސްޓްރީކުރަން 1800 އަށް ވުރެ ގިނަ ގަރާޖު ރެޖިސްޓްރީކޮށްދީފައިވާ ކަމަށް އިބްރާހީމް ވަހީދު ވިދާޅުވިއެވެ. އަދި އެ 1800 ގަރާޖުގައި 4800 ވެހިކަލް ރެޖިސްޓްރީކޮށްފައި އެބަ ހުރި ކަަމަށް ވެސް އޭނާ ވިދާޅުވިއެވެ.
މީގެއިތުރުން އެއީ އަލަށް ހެދި ގަރާޖެއް ނަމަ، އެ ގަރާޖުތައް ފެންނާނެކަން ވެސް އިބްރާހީމް ވަހީދު ފާހަގަކުރެއްވިއެވެ. އެހެންކަމުން އެ އަދަދަށް މާލޭގައި އަލަށް ގަރާޖުތަކެއް ހެދިފައިނުވާ ކަމަށާއި އޭރު ގޭގައި ހުރި ގޯޅިގަނޑުތައް ވެސް ގަރާޖުގެ ގޮތުގައި ރަޖިސްޓްރީކޮށްދީފައިވާ ކަަމަށް އޭނާ ވިދާޅުވިއެވެ. އެހެންކަމުން މިނިސްޓަރު އަމީނަށް އެނގިވަޑައިނުގެން ނަމަވެސް ވިދާޅުވެވިފައިވަނީ ރައީސް ޑރ. މުއިއްޒު މޭޔަރުކަމުގައި ހުންނަވައިގެން ވަގަށް ގަރާޖުތަކެއް ވިއްކަވާފައިވާކަން ކަމުގައި އިބްރާހީމް ވަހީދު ވިދާޅުވިއެވެ.
