ބޭންކް އޮފް މޯލްޑިވްސްގެ ޚިދުމަތްތައް ހޯދަމުންދާ ކަސްޓަމަރުންގެ އަދަދު އިތުރުވަމުންދާއިރު އެފަރާތްތަކަށް ފަސޭހަކަމާއެކު އަވަހަށް ޚިދުމަތްތައް ފޯރުކޮށްދިނުމަށްޓަކައި އެންމެ ފަހުގެ ޓެކްނޮލަޖީއާއެކު އާ ކަސްޓަމަރ ސަރވިސް ސެންޓަރެއް ހުޅުވައިފިއެވެ.
އަމީނީ މަގުގައި ހުންނަ މާލެ ސްކުޔަރގައި ހުޅުވި މި ސެންޓަރުން ފައިސާގެ މުޢާމަލާތްތައް ފިޔަވައި ބޭންކުން ދޭ ޚިދުމަތްތަކުގެ ބޮޑު ބައެއް މީގެ ފަހުން ދެމުން ގެންދާނީ މި ސެންޓަރުން ކަމަށް ބީއެމްއެލްއިން ބުންޏެވެ.
ގިނަ ވަގުތުތަކަށް ޚިދުމަތް ދިނުމަށް ހަމަޖެހިފައިވާ މި ސެންޓަރު ބަންދު ނޫން ކޮންމެ ދުވަހެއްގެ ހެނދުނު 8:30 އިން ހަވީރު 5:00 އަށް ހުޅުވާފައި ހުންނާނެއެވެ.
އެންމެ ފަހުގެ ޓެކްނޮލޮޖީއާއެކު އައިޕެޑް މެދުވެރިކޮށް ކަސްޓަމަރުންނަށް ޚިދުމަތް ހޯދުމަށް ތަޖުރިބާކާރު މުވައްޒަފުންނާ ގުޅާލެވެއެވެ.
އަދި މި ސެންޓަރަށް ކަސްޓަމަރު ޒިޔާރަތް ކުރާ ހިސާބުން ފެށިގެން ބޭނުންވާ ޚިދުމަތަކަށް އެދެވޭނެ ކަމަށާއި މި ގޮތުން ކަސްޓަމަރުން ޚިދުމަތް ހޯދުމަށް ހޭދަ ކުރާ ވަގުތު ވަރަށް ބޮޑަށް ކުޑަވެގެން ދާނެ ކަމަށް ބީއެމްއެލްއިން ބުންޏެވެ.
މި ސެންޓަރުން ފޯރުކޮށްދޭ ޚިދުމަތްތަކުގެ ތެރޭގައި ޗެކް ފޮތް، ސްޓޭޓްމަންޓް، ކްރެޑިޓް އަދި ޑެބިޓް ކާޑު ނެގުން ހިމެނެއެވެ. މީގެ އިތުރުން މޮބައިލް ބޭންކިންގ އަދި އިންޓަރނެޓް ބޭންކިންގ ޚިދުމަތަށް އެދޭ ކަސްޓަމަރުންނަށްވެސް މުވައްޒަފުން އެހީތެރިވެދޭނެއެވެ.
މި ސެންޓަރ ފަރުމާކޮށްފައިވަނީ އާންމު ބޭންކްތަކާއި ވަރަށް ތަފާތު ފަރުނީޗަރާއި އެހެނިހެން ޚިދުމަތްތައް ހިމަނައިގެންނެވެ. މިގޮތުން ކަސްޓަމަރުން ޚިދުމަތް ލިބިގަތުމަށް ހޭދަކުރާ ވަގުތަކީ އެންމެ ހިތްހަމަޖެހޭނެ ފަދަ ވަގުތަކަށް ހެދުމަށްޓަކައި ސޯފާ ގޮނޑި ހިމަނައި އަދި ކޮފީ ލިބޭނެ އިންތިޒާމުވެސް ވަނީ ހަމަޖައްސާފައެވެ.
މީގެ އިތުރުން މި ސެންޓަރާ އިންވެގެން ކަސްޓަމަރުންނަށް 24 ގަޑިއިރު ފައިސާ ނެގުމާއި ޖަމާކުރުން އަދި ޓްރާންސްފަރ ކުރުމުގެ ޚިދުމަތް ދިނުމަށް ހަތަރު އޭޓީއެމްއާއެކު ސެލްފް ސާވިސް ބޭންކިންގ ސެންޓަރެއްވެސް ވަނީ ގާއިމްކޮށްފައެވެ.
މި ބޭންކް ސެންޓަރު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ އެންޑްރޫ ހީލީ ވިދާޅުވީ މި އާ ސެންޓަރުގެ އެންމެ ޒަމާނީ ސެޓްއަޕް އާއި ހުޅުވާފައި ހުންނަ ވަގުތު އިތުރުވުމުގެ ސަބަބުން ކަސްޓަމަރުންނަށް މާލެއިން ފޯރުކޮށްދެމުންދާ ޚިދުމަތްތަކަށް ރަނގަޅު ބަދަލެއް އަންނާނެ ކަމަށެވެ.
20 އަތޮޅުގައި 34 ބްރާންޗް، 88 އޭޓީއެމް، 4000 ޕީއޯއެސް މަރޗަންޓުން، 205 ކޭޝް އޭޖެންޓުން، 29 ސެލްފްސަރވިސް ބޭންކިންގ ސެންޓަރ އަދި 5 ދޯނި ބޭންކިންގ ޔުނިޓުގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތާއެކު ބޭންކް އޮފް މޯލްޑިވްސް ގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.
