އާޒިމް ވަނީ ގޯއްޗާއި ފްލެޓް ނުދީ ލަސްވުން ދިފާއުކުރުމަށް އެއްވެސް ބަޔަކު މަސައްކަތްކޮށްގެން ނުވާނެ ކަަމަށް ވިދާޅުވެފަ
އެމްޑީޕީގެ މޭޔަރު ކެންޑިޑޭޓް އާދަމް އާޒިމް
ބިންވެރިންގެ ސައްލާ އަށް ރައީސް ޑރ.މުހައްމަދު މުއިއްޒު އާއި ހައުސިން މިނިސްޓަރ ޑރ.އަލީ ހައިދަރު ވަޑައި ނުގަތުމުން އިންތިޚާބީ މޭޔަރ އާދަމް އާޒިމް އެ ދެ ބޭފުޅުންނަށް ވަރަށް ބޮޑަށް ފާޑު ވިދާޅުވެއްޖެއެވެ.
ބިންވެރިންގެ ސައްލާގެ ނަމުގައި ކުރިއަށް ގެންދިޔަ ސައްލާގައި އޭނާ ވަނީ ބޯހިޔާވަހިކަމުގެ މައްސަލަ ހައްލުކޮށްދިނުމަށް ސަރުކާރަށް ގޮވާލައްވާފައެވެ. އާޒިމް ވަނީ އެ ރައްޔިތުންގެ އަޑު ރަނގަޅަށް ސަރުކާރުން އެހި ނަމަ އެ ސައްލާގައި ހުންނާނީ މިނިސްޓަރ ނުވަތަ ރައީސުލްޖުމްހޫރިއްޔާ ކަމަށް ވެސް ވިދާޅުވެފައެވެ. 40 އަހަރު ވަންދެން ބޯހިޔާވަހިކަމުގެ ދަތިކަމުގައި އާއްމުން އުޅެމުންދާ އިރު ސަރުކާރުން އެކަމަށް ދޭ އަހައްމިއްޔަތުކަން ކުޑަކަން ފެނި ހިތާމަކުރައްވާ ކަމަށް އާޒިމް ވަނީ ވިދާޅުވެފައެވެ. އަދި ފިނި ކޮޓަރީގައެއް ނުތިބެވޭނެ ކަމަށާއި އިތުރު 5 އަހަރު ލިބޭނެ ކަމަށް ހީކޮށްގެން ނުވާނެ ކަމަށް ވެސް އާޒިމް ވިދާޅުވިއެވެ. އާޒިމް ވަނީ ގޯއްޗާއި ފްލެޓް ނުދީ ލަސްވުން ދިފާއުކުރުމަށް އެއްވެސް ބަޔަކު މަސައްކަތްކޮށްގެން ނުވާނެ ކަަމަށް ވިދާޅުވެފައެވެ.
މިއީ ރައްޔިތުންގެ އަސާސީ ހައްގެއް ކަމަށާއި އެއީ ސިޔާސީ ވާހަކައެއް ކަަމަށް ޤަބޫލު ނުކުރައްވާ ކަމަށް އާޒިމް ވިދާޅުވިއެވެ. އާއްމުންގެ އަޑު އަހާ ބޯހިޔާވަހިކަމުގެ މައްސަލަ ހައްލުކުރުމަކީ މިއަދު އެންމެންގެ ވެސް ޒިންމާ އެއް ކަމަށް އޭނާ ވަނީ ވިދާޅުވެފައެވެ. އާޒިމް ވަނީ މާލެ އާއި މާލޭގައި ދިރިއުޅޭ ރައްޔިތުންނަށް ބޯހިޔާވަހިކަން ދޭންވާނީ މާލެ ސަރަހައްދުން ކަމަށް ވިދާޅުވެފައެވެ. މާލެ ސިޓީ ކައުންސިލްގެ މޭޔަރގެ އިންތިޚާބުގައި އޭނާ އަށް ކާމިޔާބު ލިބުމުން އެނގޭ ކަމަކީ ރައްޔިތުން ގޯތި ބޭނުން ވަނީ ބްރިޖަކުން ދެވޭ ހިސާބުގައި އޮތް ތަނަކުންކަން ކަމަށް އާޒިމް ވިދާޅުވިއެވެ.
ހޮނިިރު ދުވަހުގެ ރޭ ބޭއްވި ބިންވެރިންގެ ސައްލާގައި ވާހަކަދައްކަވަމުން އާޒިމް ވިދާޅުވީ މާލޭގެ މޭޔަރގެ ބައި އިލެކްޝަންގައި އާއްމުން ދިން މެސެޖަކީ އާއްމުން ބޭނުން ވަނީ ބްރިޖަކުން ދެވޭ ތަނަކަށް ދިއުމުގެ މެސެޖްކަމަށެވެ. އެތައް ޒަމާނެއްވަންދެން ދިމާވެފައިވާ ބޯހިޔާވަހިކަމުގެ މައްސަލަ އަށް މިދިޔަ ސަރުކާރުން ހައްލެއް ގެންނަން ފަށާފައިވާ ކަަމަށާއި އެ މަސައްކަތް ރަނގަޅަށް ކުރިއަށް ގެންދިއުމަށް ސަރުކާރަށް އާޒިމް ވަނީ ގޮވާލައްވާފައެވެ. އަދި ފުށިދިއްގަރުފަޅު ހިއްކުމުގެ ބަދަލުގައި އަވަހަށް އާއްމުންނަށް ދެވޭނެ ތަނެއްގައި އަސާސީ ޚިދުމަތްތައް ހަމަޖައްސާދެއްވުން އެދިވަޑައިގަންނަވާ ކަަމަށް ވެސް އާޒިމް ވިދާޅުވިއެވެ. އެގޮތުން އުތުރުތިލަފަޅު ފަދަ ކުރީ ސަރުކާރުން ހިއްކަން ފަށާފައިވާ ތަންތަން ނިންމުމުގެ މަސައްކަތް ސަރުކާރުން އަވަސްކޮށްދިނުމަށް ވެސް އޭނާ ވަނީ އެދިވަޑައިގައިގަންނަވާފައެވެ.
