މާލޭގެ ހުންނަ އެންޖީބީ ރެސްޓޯރަންޓުގައި ގޭސްފުޅިއެއް ގޮވައި، ހިނގި ހާދިސާގައި އެއްވެސް މީހަކަށް ސީރިއަސް އަނިޔާއެއް ނުލިބޭކަމަށް، އޭޑިކޭ ހޮސްޕިޓަލާ ހަވާލާދީ ފުލުހުން ބުނެފިއެވެ.

ފުލުހުން ބުނީ، ހެންވޭރު ކިނބިގަސް މަގުގައި ހުރި ރެސްޓޯރެންޓެއްގައި ގޭސްފުޅިއެއް ގޮވައި ތިން މީހަކަށް އަނިޔާވި ކަމުގެ މައުލޫމާތު ބުދަ ދުވަހުގެ ހަވީރު 5:00ހާއިރު ލިބިފައިވާ ކަމަށެވެ.

މި ހާދިސާގައި އަނިޔާވެފައިވަނީ ބިދޭސީ ފިރިހެނަކާއި، ދިވެހި ދެ އަންހެނުންނަށް ކަމަށް ފުލުހުން ބުނެއެވެ. އަނިޔާވި ބިދޭސީ މީހާއަކީ ރެސްޓޯރެންޓުގެ ކައްކާއެވެ. އަދި އަނިޔާވި ދިވެހި ދެ އަންހެނުންނަކީ މަގުމަތީގައި ތިބި ދެމީހުން ކަމަށާއި، އެ ދެމީހުންނަށް އަނިޔާވެފައިވަނީ އެތަނުގެ ބިއްލޫރިގަނޑު ތަޅައިގެންގޮސް ބުރައިގެން ދިޔަ ބިއްލޫރިތަކުން ޖެހިގެން ކަމަށް ފުލުހުން ބުނެއެވެ.

އެމީހުންގެ ތެރެއިން އެއްވެސް މީހަކަށް ސީރިއަސް އަނިޔާއެއް ނުވެފައިނުވާ ކަމަށް އޭޑީކޭ ހޮސްޕިޓަލުން ފުލުހުންނަށް މައުލޫމާތު ދީފައިވެއެވެ. އެމީހުންނަށް ފަރުވާ ދިނުމަށްފަހު މިހާރު ވަނީ ދޫކޮށްލާފައި ކަމަށް ފުލުހުން ބުނެއެވެ.

ފުލުހުން ބުނީ މިހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލަމުންދާ ކަމަށެވެ.