އަންހެނަކަށް ހަމައެކަނި ޤާޒީއަކަށް ވެވޭނީ މަދަނީ މައްސަލަތަކުގައި ކަމަށާއި ޖިނާއީ މައްސަލަތަކުގައި ނޫންކަމަށް ކުރީގެ އިސްލާމިކް މިނިސްޓަރު ޑރ. އަބްދުލްމަޖީދު އަބްދުލްބާރީ ވިދާޅުވެއްޖެއެވެ.
އާދީއްތަ ދުވަހުގެރޭ މާފަންނު ކުނޫޒްގައި އިދިކޮޅު ކޯލިޝަންގެ ފަރާތުން ބޭއްވި ޖަލްސާގައި ވާހަކަފުޅު ދައްކަވަމުން ޑރ. މަޖީދު ވިދާޅުވީ ދިވެހިރާއްޖޭގެ ސިޔާސީ މަސްރަހު ނުތަނަވަސްވެފައިވަނީ ސުޕްރީމް ކޯޓުން ނެރުނު ޤަރާރާއި ގުޅިގެން ކަމަށާއި ކޯޓުތަކުން ކަންތައްތައް ނިންމަންވާނީ ޤާނޫނާ އެއްގޮތަށްވާ ގޮތުގެމަތިން ކަމަށެވެ.
"އެއްވެސް ފަރާތެއްގެ ނުފޫޒަކަށް އެއްވެސް ކޯޓެއްގެ ފަނޑިޔާރަކު ތަބާވާކަށް ނުޖެހޭ. ސަރުކާރުވެސް އަދި އެހެން ބަޔަކުވެސް ދައްކަވާ ބިރަކަށް، ފޯރުވާ ނުފޫޒަކަށް ތަބާވާކަށް ނުޖެހޭ. އެބޭފުޅުން ވިސްނާ ވަޑައިގަންނަވަން ޖެހޭ ވަރަށް މުހިންމުކަމެއް އެބައޮތް،އެއީ ސަރުކާރަށް ވެސް ޤާނޫނުގެ ކުރިމަތީގައި އެއްވެސް ބޭފުޅަކު ޤާނޫނާ ޙިލާފުވެގެންދާ ހާލަތެއްގައި ހިމާޔަތެއް ނުދެވޭނެކަން" ޑރ. މަޖީދު ވިދާޅުވިއެވެ.
ޑރ. މަޖީދު ވިދާޅުވީ ސުޕްރީމްކޯޓުގެ އިސް ފަނޑިޔާރުންގެ ޤާނޫނީ ޒިންމާ އަދާކުރުމަށް އިލްތިމާސްކުރައްވާކަމަށާއި ޤާނޫނުން ރެކިގަނެގެން ސަލާމަތްވާން އުޅުނުކަމުގައި ވިޔަސް ޤިޔާމަތްދުވަހުން ހުރިހާ އެންމެންވެސް ޖަވާބުދާރީ ކުރުވިގެންދާނެކަމަށެވެ. ޤާޒީނަށްވެސް ސަރުކާރުން ނުފޫޒު ފޯރުވައިގެން ރިޝްވަތުދީގެން ކަންތައްތައް ކުރަން އުޅޭނެކަމަށް ޑރ މަޖީދުވަނީ ފާހަގަކުރައްވާފައެވެ.
ޑރ. މަޖީދު އިތުރަށް ވިދާޅުވީ ދިވެހިސަރުކާރަށް އެއްވެސް މީހަކަށް ނުޙައްގުން އަނިޔާ ނުކުރުމަށް ގޮވާލާކަމަށާއި ނުހައްޤުން ޖަލަށް ލެވިފައިވާ ހުރިހާ އެންމެން ދޫކޮށްލަން ސަރުކާރަށް ގޮވާލާކަމަށެވެ.
