ފީފާ އެވޯޑާއެކު މެސީ އަށް ޚާއްސަ ޝަރަފެއް!

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހޮވާ އަހަރުގެ މޮޅު ކުޅުންތެރިޔާ އަށް ދޭ، "ދަ ބެސްޓް" އެވޯޑާއެކު އާޖެންޓީނާގެ ކެޕްޓަން ލިއޮނަލް މެސީ އަށް ޚާއްސަ ޝަރަފެއް ލިބިއްޖެ އެވެ.

ހޯމަ ދުވަހުގެ ރޭޭ އޮތް އެވޯޑު ހަފުލާގައި މެސީ އެވޯޑު ހޯދީ، މެންޗެސްޓަރ ސިޓީ އަށް ކުޅެމުން އަންނަ ނޯވޭގެ ފޯވާޑް އާލިން ހާލަންޑް އަދި ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކީލިއަން އެމްބާޕޭއާ ވާދަކޮށެވެ. މެސީ އާއި ހާލަންޑާ ޕޮއިންޓުގެ ގޮތުން އެއްވަރުވެފައިވާއިރު، މެސީ ކުރި ހޯދީ ޤައުމީ ޓީމުތަކުގެ ކެޕްޓަނުން އެވޯޑުގެ އެއް ވަނަ އަށް ދިން ވޯޓުންނެވެ.

މިއީ މެސީ މި އެވޯޑު ހޯދި ތިން ވަނަ ފަހަރެވެ. މީގެ ކުރިން އޭނާ ވަނީ 2019 ވަނަ އަހަރު އަދި 2022 ވަނަ އަހަރު ވެސް މި އެވޯޑު ހޯދައިފަ އެވެ. މެސީ އަކީ، ތިން ފަހަރު މި އެވޯޑު ހޯދި ހަމައެކަނި ކުޅުންތެރިޔާ އެވެ. ފޯމެޓަށް ބަދަލު ގެނެސް، މިހާރު އޮންނަ ފޯމެޓަށް ފީފާ އިން އެވޯޑު ދޭން ފެށީ 2016 ވަނަ އަހަރު އެވެ.

މީގެ އިތުރުން މެސީ ވަނީ، އެންމެ މޮޅު ކުޅުންތެރިންގެ ތެރޭގައި ވެސް ހިމެނިފަ އެވެ. މިއީ އެންމެ މޮޅު ކުޅުންތެރިން ހިމަނައިގެން ހޮވާ، ފިފްޕްރޯ ޓީމުގައި، މެދު ކެނޑުމެއް ނެތި މެސީ ހިމެނުނު 17 ވަނަ ފަހަރެވެ. މެސީ، އެންމެ ފުރަތަމަ އެ ޓީމުގައި ހިމެނުނީ 2007 ވަނަ އަހަރު އެވެ. އޭގެ ފަހުން، ކޮންމެ އަހަރަކު ވެސް މެސީ އަންނަނީ އެ ޓީމުގައި ހިމެނެމުންނެވެ.

އެމެރިކާގެ އިންޓަ މިއާމީ އަށް ކުޅެމުން އަންނަ މެސީ އަށް އެވޯޑު ލިބުނު ނަމަވެސް، އެވޯޑު ހަފުލާގައި އޭނާ ބައިވެރިވެފައެއް ނުވެ އެވެ. މިވަގުތު މެސީ އަންނަނީ އިންޓަ މިއާމީ އާއެކު އައު ސީޒަނަށް ތައްޔާރުވަމުންނެވެ.