ކުއްލިއަކަށް އައި ލިއުމަކާއި އެކުގަ، ފެނަކައިގެ ގިނަ އަދަދެއްގެ މުވައްޒަފުން އެއް ފަހަރާ ކަނޑާލައިފި
ފެނަކައިން އެއްފަހަރާ ގިނަ އަދަދަދެއްގެ މުވައްޒަފުން ކަނޑާލުމާއި މެދު ފެނަކައިގެ ބަހެއް ނެތް
ފެނަކައިން ކަނޑާލުމުން މުޒާހަރާ ކުރަނީ
ކުއްލިއަކަށް އައި ލިއުމަކާއި އެކުގަ، ފެނަކައިގެ ގިނަ އަދަދެއްގެ މުވައްޒަފުން އެއް ފަހަރާ ކަނޑާލައިފިއެވެ.
ވަކި ކުރި މުވައްޒަފުންގެ ތެރޭގައި ހިމެނެނީ ކޮންޓްރެކްޓް މުވައްޒަފުންނެވެ. އެ މުވައްޒަފުން މިހާތަނަށް މަސައްކަތް ކުރަމުން އައީ ކޮންޓްރެކްޓް އާ ކުރާ ގޮތަށް ތަފާތު އެކި ޕްރޮޖެކްޓްތަކުގައެވެ. އެގޮތުން ހއ.ދިއްދޫ އާއި ހދ.ކުމުންދޫ އިން ގިނަ ބަޔަކު ވަކިކޮށްފައިވާކަން ވަނީ ކަށަވަރުވެފައެވެ. އެގޮތުން ދިއްދޫ އިން 50 އަށް ވުރެ ގިނަ މުވައްޒަފުން ކަނޑާލާފައިވާ އިރު ކުމުންދޫ އިން 7 މުވައްޒަފުން ވަނީ ކަނޑާލާފައެވެ. އެނގިފައިވާ ގޮތުން ކަނޑާލާފައިވާ މުވައްޒަފުންގެ ތެރޭގައި އެގްރިމެންޓް ހަމަވެފައިވާ މުވައްޒަފުންނާއި، އެގްރިމެންޓް ހަމަ ނުވާ މުވައްޒަފުންވެސް ހިމެނެއެވެ. ގިނަ އަަދަދެއްގެ މުވައްޒަފުން އެއްފަހަރާ ފެނަކައިން ކަނޑާލާފައިވާއިރު އެކަމާއި ގުޅޭ ބަހެއް ހޯދާލުމަށް ފެނަކަ އާއި ގުޅުމަށް ކުރި މަސައްކަތް ވަނީ އަދި ކާމިޔާބު ވާގޮތް ނުވެފައެވެ.
ރާއްޖެ ޓީވީ އަށް މައުލޫމާތު ދެމުން ކަނޑާލާފައިވާ މުވައްޒަފުން ބުނީ އެ މުވައްޒަފުން ކަނޑާލަން އަންގާފައި ވަނީ ރޭ ވަރަށް ލަސްވިފަހުންކަން އެނގިފައިވާ ކަމަށެވެ. މިހާތަނަށް އެ މުވައްޒަފުން މަސައްކަތް ކުރަމުން އައީ ކޮންޓްރެކްޓް އާ ކޮށްދޭގޮތަށް ކަމަށް ވާއިރު ކޮންޓްރެކްޓް އާ ނުކުރާނެކަން އަންގާފައި ނުވާ ކަމަށާއި މުވައްޒަފުން ކަނޑާލީ ކުއްލިއަކަށް ކަމަށް އެ މީހުން ވަނީ ބުނެފައެވެ. އަދި އެކަމާއި ގުޅިގެން ދިއްދޫ އާއި ކުމުންދޫގައި އެ މުވައްޒަފުން ވަނީ ނުރުހުން ފާޅުކޮށް މުޒާހަރާވެސް ކޮށްފައެވެ.
ފެނަކައިން އެއްފަހަރާ ގިނަ އަދަދަދެއްގެ މުވައްޒަފުން ކަނޑާލާފައިވާ އިރު އެކަމާއި މެދު އަދި ފެނަކައިން އެއްވެސް އެއްޗެއް ނުބުނެއެވެ. މީގެ ކުރިން ހއ.ހޯރަފުށިން ވެސް ފެނަކައިން ބަޔަކު ކަނޑާލިއެވެ. ނަމަވެސް ފަހުން އެ މީހުން ވަނީ އަލުން ވަޒީފާ އަށް ނެރެފައެވެ.
