ދުނިޔޭގެ މޮޅު ކޯޗަކަށް ގާޑިއޯލާ

ފީފާއިން ހޮވާ ދުނިޔޭގެ އެންމެ ކޯޗަކަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ހޮވައިފި އެވެ.

ފީފާގެ ދަ ބެސްޓް އެވޯޑް ހަފުލާގައި މި އެވޯޑަށް އޭނާއާ އެންމެ ގާތުން ވާދަކުރީ އިންޓަމިލާނުގެ ކޯޗު އިންޒާގީ އާއި ނަޕޯލީ އަށް އިޓާލިއަން ލީގު ހޯދައިދިން ކޯޗު ލޫސިއާނޯ ސްޕަލެއްޗީ އަށެވެ.

އެވޯޑް ލިބިގަތުމަށްފަހު ގާޑިއޯލާ ބުނީ އިންޒާގީ އާއި ސްޕަލެއްޗީ ތިއްބައި އެ އެވޯޑް ލިބުމުން ހައިރާންވި ކަމަށެވެ.

އޭނާ ބުނީ އެވޯޑް ލިބުމުން އެންމެ ބޮޑަށް ޝުކުރު އަދާކުރަން ބޭނުންވީ މެންޗެސްޓާ ސިޓީގެ ވެރިންނާއި އެ ޓީމުގެ ކުރީގެ ކޯޗުންނަށް ކަމަށެވެ. އަދި އޭނާގެ އަންހެނުންނާއި ދަރިންނާއި ކުޅުންތެރިންނާއި ކޯޗިން ސްޓާފުންނަށް ކަމަށެވެ.

ގާޑިއޯލާއާއެކު ބާސެލޯނާގައި ޗެމްޕިއަންސް ލީގު ކާމިޔާބު ކުރި ފޯވަޑް ތިއޭރީ އޮންރީ މެންޗެސްޓާ ސިޓީ މިދިޔަ ސީޒަނުގައި ހޯދި ކާމިޔާބީއާ ބެހޭ ގޮތުން ސުވާލުކުރުމުން ގާޑިއޯލާ ބުނީ އެއީ ވަރަށް ގިނަ ދުވަހުގެ މަސައްކަތް ކަމަށެވެ. ސިޓީ ވަނީ މިދިޔަ ސީޒަނުގެ އިނގިރޭސި ޕްރެމިއާ ލީގާއި ޗެމްޕިއަންސް ލީގާއި އެފްއޭކަޕް އަދި ޔޫރަޕިއަން ސުޕަ ކަޕް ކާމިޔާބުކޮށްފަ އެވެ.

އެންމެ މޮޅު އަންހެން ކޯޗުގެ މަގާމު ލިބުނީ އިނގިރޭސި ގައުމީ ޓީމުގެ ކޯޗު ސެރީވާ ވިއެގްމަނަށެވެ. މިއީ އޭނާ ފީފާ އެވޯޑް ހޯދި ހަތަރު ވަނަ ފަހަރެވެ. އޭނާ ވަނީ 2017، 2020 އަދި 2022 ގައި ވެސް މި އެވޯޑް ހާސިލްކޮށްފަ އެވެ.