ސިޓީ އޮތީ ވަރަށް ބޮޑަށް ލީގު ބޭނުންވެފައި: ގާޑިއޯލާ

މެންޗެސްޓަރ ސިޓީ އޮތީ އިނގިރޭސި ޕްރިމިއާ ލީގު ކާމިޔާބު ކުރަން ވަރަށް ބޮޑަށް ބޭނުންވެފައި ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ ސިޓީން ލީގުގައި ނިއުކާާސަލް ޔުނައިޓެޑާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗު ސިޓީން ކާމިޔާބު ކުރީ 3-2 އިންނެވެ.

މެޗަށްފަހު ވާހަކަ ދައްކަމުން އޭނާ ބުނީ މެޗުގައި ސިޓީގެ ކުޅުންތެރިން ދެއްކީ ރަނގަޅު ކުޅުމެއް ކަަމަށެވެ. އަދި ސިޓީގެ ކުޅުންތެރިންގެ މަސައްކަތު ރޭޓާމެދު އަބަދުވެސް ހިތްހަމަޖެހޭ ކަމަށް އޭނާ ބުންޏެވެ. މި ސީޒަންގެ ލީގަށް ވެސް ސިޓީން ވާދަކުރާނެކަން ފާހަގަކޮށް އޭނާ ބުނީ، އެ ޓީމުގެ ހުރިހާ ކުޅުންތެރިން ވެސް ތިބީ ލީގު ކާމިޔާބު ކުރަން ވަރަށް ބޮޑަށް ބޭނުންވެފައި ކަަމަށެވެ. އަދި ސިޓީގައި ތިބި ކުޅުންތެރިންނާއެކު، އެ ޓީމަށް އެކަން ހާސިލުކުރެވޭނެ ކަމުގެ ފުރިހަމަ ޔަގީންކަން އޮތް ކަމުގައި ވެސް ގާޑިއޯލާ ބުންޏެވެ.

އެ މެޗުގައި ސިޓީގެ ފަރާތުން މޮޅު ކުޅުމެއް ދެއްކި ބެލްޖިއަމްގެ ކެވިން ޑި ބްރޭނާއާ ގުޅޭ ގޮތުން ގާޑިއޯލާ ބުނީ، އަބަދު ވެސް އޭނާ އަކީ ޓީމުގައި ތަފާތު ދައްކަމުން އަންނަ ކުޅުންތެރިޔެއް ކަަމަށެވެ. އަނިޔާގެ ސަބަބުން ކުޅުމާ ދުރުގައި ހުރުމަށްފަހު، އެނބުރި އައިސް ޑި ބްރޭނާ ދެއްކީ މޮޅު ކުޅުމެއް ކަމަށް އޭނާ ވަނީ ފާހަގަކޮށްފަ އެވެ. ކުރިއަށް އޮތް ތަނުގައި ވެސް ސިޓީ އަށް އޭނާފެ ފައިދާ ލިބޭނެކަމުގެ ޔަގީންކަން ގާޑިއޯލާ އަށް އޮވެ އެވެ.

މޮޅާއެކު ސިޓީން ވަނީ ލީގު ތާވަލްގެ ދެ ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު 20 މެޗުން 43 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ލިވަޕޫލަށް ލިބެނީ 45 ޕޮއިންޓެވެ. ސިޓީގެ ފަހަތުން ތިން ވަނައިގައި އޮތް އެސްޓަން ވިލާ އަށް ލިބެނީ 42 ޕޮއިންޓެވެ.