ކޯލް ޕާމާ ކާމިޔާބުކުރި ޕެނަލްޓީ ފުލަމް އަތުން ޗެލްސީ މޮޅުވެއްޖެ އެވެ.
އިނގިރޭސި ޕްރިމިއަރ ލީގުގައި ފުލަމް އަތުން ޗެލްސީއަސް ލިބުނީ އުނދަގޫ މޮޅެކެވެ. 1-0 ން ކާމިޔާބުކުރި މެޗުގެ ހަމައެކަނި ލަނޑު ކޯލް ޕާމާ ޖެހީ ފުރަތަމަ ހާފްގެ އިތުރު ވަގުތުގައި ޖެހި ޕެނަލްޓީން ނެވެ. މިއީ އިސާ ޑިއޮފް ރަހީމް ސްޓާލިންގ އަށް އޭރިޔާ ތެރެއިން ކުރި ފައުލަށް ދިން ޕެނަލްޓީ އެކެވެ. ޕާމާ ޕެނަލްޓީ ކާމިޔާބުކުރީ ފުލަމް ކީޕަރު ލެނޯ ނުބައި ފަޅިއަށް މޫވް ކުރުވުމަށްފަހު އެވެ. މިއީ އޮގަސްޓް މަހު ޗެލްސީއާ ކުޅުނު ކޯލް ޕާމާ އެކްލަބަށް ޖަހައިދިން ނުވަ ވަނަ ލަނޑެވެ.
މޮޅާއެކު ޗެލްސީ އޮތީ ލީގު ތާވަލްގެ 8 ވަނައިގައެވެ. އެއީ 21 މެޗުން 31 ޕޮއިންޓާ އެކުއެވެ. ގަދަ ހަތަރަކާ ދެމެދު 9 ޕޮއިންޓްގެ ފަރަގެއް އެބައޮތެވެ. ފުލަމް އޮތީ 13 ވަނައިގަ އެވެ.
