އެއީ އަދުގެ 21 ވަނަ ޤަރުނުގެ ދުނިޔޭގައި ބަޔަކަށް އުޅެންޖެހިދާނެ ކަމަށް ހީކުރެވިފައި އޮތް ފަދަ ޙާލަތެއް ނޫނެވެ. ނަމަވެސް އެއީ ޤަބޫލު ކުރަން ޖެހިފައި އޮތް ޙަޤީޤަތެކެވެ. އިސްތިޢުމާރީ ނިރުބަވެރި ޔަހޫދީން ހިތުހުރި ގޮތަކަށް ހަފުސް ކުރަމުންދާ ފަލަސްޠީނުގެ ޣައްޒާގެ ރަށްވެހިން މިއަދު އުފުލަމުންދާ ވޭނާއި ތަކުލީފުތަކަކަކީ، މުޅި ދުނިޔެވެސް އެކަމުގެ ޒިންމާ އުފުލަން ޖެހޭ ކަމެކެވެ. އެ ޒިންމާއިން ބޯދަމައިގަނެވޭނެ ހަމަ އެންމެ ފަރުދެއްވެސް އަދުގެ ބައިނަލްއަޤުވާމީ މުޖުތަމަޢުގައި ނެތެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ބިންމަތިން ފޮހެލާން ކަމަށް ބުނެ އިޒްރޭލުގެ ޔަހޫދީން ހިންގަމުންދާ ޤަތުލުޢާންމަށް 3 މަސް ވީ އިރު، ޣައްޒާ ހަފުސްކޮށް ނިންމާފައިއެވެ. ފުރާނަ ހުއްޓެއް ކަމަކު، ދިރުމެއް ނެތެވެ. ހުވަފެންތައް ވިއްސިވިހާލިވެ، ހަތަރު އުދަރެސް ފެނުޖެހި މާޔޫސްވެފައި އޮތް ޣައްޒާގެ ވޭނީ އާދޭސްތައް، އެހެން މީހަކަށް ބަޔާންކޮށްދެވޭނީ ކިހިނަކުން ހެއްޔެވެ؟

ޣައްޒާގެ އެތައް ބަޔަކު މިއަދު ދިރިއުޅެމުން ދަނީ މިޞްރާ ހިއްސާ ކުރާ ރަފަޙު ބޯޑަރު ސަރަޙައްދުގައެވެ. ފަހަރެއްގައިވެސް، މިޞްރުން އެމީހުންނަށްޓަކައި ބޯޑަރު ހުޅުވާލާނެ ކަމަކަށް އުންމީދެއް ނުކުރެއެވެ. ޣައްޒާގެ ރަށްވެހިން ބުނާ ގޮތުގައި، އެމީހުންގެ ދިފާޢަށް ތެދުވަން މުޅި ދުނިޔެ މިއަދު ފެއިލްވެއްޖެއެވެ. އުފަން ފަސްގަނޑެއް ކަމަކު ރަފަޙުގައި ރެފިއުޖީންގެ ގޮތުގައި ދިރިއުޅެމުން ދާ މީހުން، ކާއެތިކޮޅެއް ހޯދަން އެތައް އިރަކު ސަފުގައި މަޑުކުރަން ޖެހެއެވެ. އެވަރުންވެސް ލިބެނީ ކިރިޔާ ބަނޑަށް އެނގުންވާ ވަރުގެ ތޮޅިކޮޅެކެވެ. އެވަރުންވެސް ހައިކަން ފިލުމުގެ ކޮންމެވެސް ހިތްހަމަޖެހުމެއް ލިބޭނެ ކަމަށް އެމީހުން އުންމީދު ކުރެއެވެ.

ގެދޮރު ގެއްލިފައި ވާ މީހުންނަށް ކާބޯތަކެތީގެ އެހީތެރިކަން ފޯރުކޮށްދިނުމުގައި ދަރުމައަށް މަސައްކަތް ކުރަމުންދާ މީހުންގެ މޫނުމަތިންވެސް މިއަދު ފެންނަނީ މާޔޫސް ކަމެވެ. ނުތަނަވަސްކަމެވެ. ގެދޮރު ގެއްލި، ވަގުތީ ހިޔާވަހިކަން ހޯދަން ރަފަޙަށް ބަދަލުވާ މީހުންގެ ޢަދަދު، ދުވަހަކަށް ވުރެ ދުވަހެއް ދަނީ އިތުރު ވަމުންނެވެ.

ކާބޯތަކެތީގެ ސަޕްލައިގައިވެސް އިޒްރޭލުން އަތް އަޅައިގެން އޮތް އިރު، ލިބޭ އެއްޗެއް ލިބެނީވެސް އެހާމެ ބޮޑު އަގުގައެވެ. ނަތީޖާއަކަށް ވަނީ ޑިމާންޑާ އެއްވަރަށް ސަޕްލައި ކޮށް ނުދެވުމެވެ. ޙާލުގައި ޖެހިފައި ވާ މީހަކު، އެތައް އިރަކު ކިއުގައި ހުރެ، ހުސް އަތާ ފޮނުވާލަން ޖެހުމަކީ ދަރުމަވެރިންގެ ހިތްތަކަށްވެސް ކުޅަދާނަ ކަމެއް ނޫނެވެ.

އިޒްރޭލުން ޤަތުލުޢާންމު ފެށުމުގެ ކުރިން، ރަފަޙު ފުޑް ޑިސްޓްރިބިއުޝަން ޗެރިޓީއިން ޢާންމުންނަށް ޚިދުމަތް ދެމުން ދިޔައީ ހަފުތާއަކު 2 ދުވަހުއެވެ. ނަމަވެސް މިއަދު އެ މީހުން ދަނީ ހަފުތާގެ ހުރިހާ ދުވަހަކުވެސް މަސައްކަތް ކުރަމުންނެވެ. ކޮންމެ ދުވަހަކުވެސް 15 ލޯގަނޑުގެ ޕާސްތާ ނުވަތަ ތޮޅީގެ ބާވަތެއް ތައްޔާރު ކުރެވޭތޯ ބަލައެވެ. ނަމަވެސް، އެއީ ގެދޮރު ގެއްލި، ޙާލުގައި ޖެހިގެން ރަފަޙަށް ޖަމާވެފައިވާ އެތައް ސަތޭކަ ހާސް މީހުންނާ އަޅާ ބަލާއިރު އެއްވެސް އެއްޗެއް ނޫނެވެ.

ޓެރަރިސްޓުންގެ ގޮތުގައި އިޒްރޭލާއި، އެމެރިކާ އަދި އެމެރިކާގެ އެކުވެރި ޤައުމުތަކުން ސިފަކުރާ ޙަމާސް ޖަމާޢަތުގެ ހަނގުރާމަވެރިން މަރަން ކަމަށް ބުނެ، ދެމުން ގެންދާ ޢުދުވާނީ ޙަމަލާތަކުގައި މިހާތަނަށް މަރުވި މީހުންގެ ތެރޭގައި ގިނައީ ކުޑަކުދިންނެވެ. އިޒްރޭލުގެ ޢުދުވާންތަކުގައި ޢާންމުން މަރާ މައްސަލައާ ގުޅިގެން ބައިނަލްއަޤުވާމީ މުޖުތަމަޢުން އަމާޒު ކުރާ ފާޑުކިއުންތަކަށް އިޒްރޭލުން ލަދެއް ނެތި ޖަވާބު ދެއެވެ. ސަބަބެއް ކަމަށް ބުނަނީ، ޙަމާސް ޖަމާޢަތުން ހަނގުރާމަވެރި ބޭނުންތަކަށް، މަދަނީ ތަންތަން ބޭނުން ކުރަމުން ދިއުން ކަމަށެވެ.

 އޮކްޓޯބަރ 7 ވަނަ ދުވަހުން ފަށައިގެން އިޒްރޭލުން ހިންގަމުންދާ ޤަތުލުޢާންމުގައި މަރުވި ފަލަސްޠީނު މީހުންގެ ޢަދަދު 23000 އަށް ވުރެ މައްޗަށް އަރައެވެ. 2.3 މިލިއަން މީހުންގެ އާބާދީއެއް އޮތް ޣައްޒާއަށް ބަލާއިރު، އެއީ އާބާދީގެ 1 ޕަސެންޓްއެވެ. މިއީ ނަސްލެއް ދޮވެލަން ހިންގާ ޤަތުލުޢާންމުގެ ޖަރީމާ ނޫން ދެން އެހެން ކޮން ކަމެއް ހެއްޔެވެ؟