އަރަބި އަދި އިންޑިއާ ކަނޑަށް ފާރަވެރިވެވޭގޮތަށް އަސްކަރީ އަދި ހަނގުރާމަ މަތީ ޖެޓް ޖެއްސޭ އެއަރޕޯޓެއް މަލިކުގައި ތަރައްގީކުރަނީ
9 ޖެނުއަރީ 2024 | އަންގާރަ 15:17މީގެ ކުރިން ނިންމާފައި އޮތީ ކޮމާޝަލް ފުލައިޓްތައް ޖެއްސޭ އެއަރޕޯޓެއް ތަރައްގީ ކުރުމަށް
މަލިކު ކައިރިން އަގައްޓި ރަށުގައި އޮންނަ ކުޑަ އެއަރޕޯޓް
ރާއްޖޭގެ ބަދަލުގައި އިންޑިއާގެ ލަކްޝަދީޕް ފަތުރުވެރިކަމުގެ މަންޒިލެއްގެ ގޮތުގައި ޕްރޮމޯޓް ކުރުމުގެ މަސައްކަތް ކުރަމުން އަންނަ އިރު، އިންޑިއާ ސަރުކާރުން އެތަނުގައި އަސްކަރީ ބޭނުންމަށް ބޭނުންކުރެވޭނެ ގޮތަށް އެއަރޕޯޓެއް ތަރައްގީކުރުމަށް ނިންމާފައިވާކަން ހާމަވެއްޖެއެވެ.
ޓައިމްސް އޮފް އިންޑިއާގައި ބުނެފައިވަނީ، މަލިކުގައި އަޅާ އެއަރޕޯޓަކީ އަސްކަރީ މަތިންދާބޯޓުތަކާއި، ހަނގުރާމަތީ ޖެޓްތައް އަދި ކޮމާޝަލް ފުލައިޓްތައް ޖެއްސޭގޮތަށް ތަރައްގީ ކުރާ އެއަރޕޯޓެއް ކަމަށެވެ. އިންޑިއާ ސަރުކާރުގެ މަސްދަރަކާ ހަވާލާދީ ޓައިމްސް އޮފް އިންޑިއާ ނޫހުގައި ބުނެފައިވަނީ، ސަރުކާރުގެ ޕްލޭނަކީ އެ އެއަރޕޯޓަކީ އަސްކަރީ މަތިންދާބޯޓުތަކާއި، ހަނގުރާމަތީ ޖެޓްތައް އަދި ކޮމާޝަލް ފުލައިޓްތަކަށް ހިދުމަތް ދެވޭނެގޮތަށް ތަރައްގީކުރުން ކަމަށެވެ.
މިއީ މީގެ ކުރިންވެސް ދެކެވުނު ވާހަކަތަކެއް ނަމަވެސް، އަސްކަރީގޮތުން އެއަރޕޯޓް ބޭނުން ކުރުމާއި ގުޅޭ ވާހަކަތަކާއި މި ފަހުން ދެކެވުނު ވާހަކަތެއް ކަމަށާއި، އަދި އެޕްލޭނާ އެއްގޮތަށް މިހާރު ކަންކަން ހިނގަމުން އަންނަ ކަމަށްވެސް ސަރުކާރުގެ މަސްދަރާ ހަވާލާދީ ނޫހުގައި ރިޕޯޓްކޮށްފައިވެއެވެ.
އަސްކަރީ ނަޒަރަކުން ބަލާއިރު، އެއާފީލްޑެއް ގާއިމްކުރުމަކީ އިންޑިއާއަށް ވަރުގަދަ ގާބިލްކަމެއް ލިބިގެންދާނެ ކަމެއް ކަމަށެވެ. އަދި މިއީ ފަހަކަށް އައިސް މުދާ އުފުލާ އާގުބޯޓުތަކަށް ޑްރޯން ހަމަލާތައް ދިނުމާއި، ކަނޑުފޭރޭ މީހުން މުދާ އުފުލާ ބޯޓުތައް ހިސޯރުކުރުމަށް ކުރަމުންދާ މަސައްކަތްތައް ހިމެނޭ ގޮތަށް ގިނަ ހަމަނުޖެހުންތަކެއް ކުރިމަތިވެފައިވާ އަރަބި ކަނޑާއި އިންޑިއާ ކަނޑުގެ ސަރަހައްދަށް ފާރަވެރިވުމަށް ބޭސްއެއްގެ ގޮތުގައި ބޭނުންކުރެވިދާނެއެވެ.
ޑިފެންސް މިނިސްޓްރީގެ ދަށުން މަލިކުގައި އެއާސްޓްރިޕްއެއް ތަރައްގީ ކުރުމަށް ހުށަހެޅި ފުރަތަމަ ފޯސްއަކީ އިންޑިއަން ކޯސްޓްގާޑެވެ. މިހާރު ހުށަހަޅާފައިވާ ގޮތުގެ މަތިން މަލިކުން އޮޕަރޭޝަންތައް ހިންގުމުގައި އިސްކޮށް ހަރަކާތްތެރިވާނީ އިންޑިއާގެ ވައިގެ ސިފައިންނެވެ.
މި އެއަރޕޯޓާއެކު އެސަރަހައްދުގައި ފަތުރުވެރިކަންވެސް އިތުރަށް ފުޅާވެގެންދާނެ ކަމަށް ބުނެފައިވެއެވެ.
މިވަގުތު އެ ސަރަހައްދުގައި އޮތީ އެންމެ އެއާޕޯޓެވެ. އެއީ އަގައްޓީގައި އޮތް އެއަރޕޯޓެވެ. އަދި އެތަނަށް ޖެއްސެނީ ހަމައެކަނި ވަކި ބާވަތެއްގެ މަތިންދާބޯޓެވެ. މިދިޔަ ހަފްތާގައި ބޮޑުވަޒީރު ނަރެންދުރަ މޯދީ ކުރެއްވި ދަތުރުފުޅަށް ފަހު އެ ސަރަހައްދު ވަނީ އޮންލައިން މީޑިއާގައި ޓްރެންޑަކަށް ވެފައެވެ.
