ރައީސް މުއިއްޒުގެ އަރިސް 3 ނައިބު ވަޒީރުން މޯދީއަށް ފުރައްސާކުރުން، ބަންގްލަދޭޝްއިން ވެސް ކުށްވެރިކޮށްފި
9 ޖެނުއަރީ 2024 | އަންގާރަ 14:01އެއްވެސް ލީޑަރަކާމެދު އެއްވެސް މީހަކު ފުރައްސާރަކުރާ ވާހަކަތައް ދެއްކުން ބަލައިނުގަނެވޭނެ
ބަންގްލަދޭޝްގެ ފޮރިން މިނިސްޓަރު އޭކޭ އަބްދުލް މޮމެން
ރައީސް ޑރ. މުހައްމަދު މުއިއްޒުގެ އަރިސް 3 ޑެޕިއުޓީ މިނިސްޓަރުން އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް، ފުރައްސާރަ ކުރުމަކީ ބަލައިގަނެވޭނެކަމެއް ނޫން ކަމަށް ބަންގްލަދޭޝްގެ ފޮރިން މިނިސްޓަރު އޭކޭ އަބްދުލް މޮމެން ވިދާޅުވެއްޖެއެވެ.
އޭއެންއައި ނިއުސްއަށް ދެއްވި އިންޓަރވިއުއެއްގައި އޭނާ ވިދާޅުވީ، ބޮޑުވަޒީރު މޯދީ ލަކްޝަދީޕަށް ކުރެއްވި ދަތުރުފުޅުގައި ފަތުރުވެރިކަމަށް އެތަން އިޝްތިހާރުކޮށް ފުޅާކުރުމާ ގުޅޭގޮތުން ކުރެއްވި ޓްވީޓާ ގުޅިގެން އުފެދުނު މައްސަލައަކީ ބަލައިގަނެވޭނެ ކަމެއް ނޫންކަމަށާއި، އެކަން ކުށްވެރިކުރައްވާ ކަމަށެވެ. އަދި އެއްވެސް ލީޑަރަކަށް އެއްވެސް މީހަކު ފުރައްސާރަކުރާ ވާހަކަތައް ދެއްކުން ބަލައިނުގަންނަވާނެ ކަމަށެވެ.
މިކަން ހިނގައިދިޔައީ، ރާއްޖޭގެ ޔޫތު މިނިސްޓްރީގެ ޑެޕިއުޓީ މިނިސްޓަރުންތަކެއް މޯދީގެ ލަކްޝަދީޕް ދަތުރުފުޅަށް ފުރައްސާރަކުރައްވައި ވާހަކަތަކެއް ދެއްކެވުމުންނެވެ.
ޖެނުއަރީ މަހުގެ ދެވަނަ ދުވަހު މޯދީ ވަނީ ލަކްޝަދީޕަށް ވަޑައިގެން ބައެއް ފޮޓޯތައް ހިއްސާކުރައްވާފައެވެ. އޭގެ ތެރޭގައި ސްނޯކްލިންއަށް ވަޑައިގެންނެވި ފޮޓޯތަކާއި ބައެއް އިތުރު މަންޒަރުތައް ވަނީ އެކްސްގައި ހިއްސާ ކުރައްވާފައެވެ. އެކްސްގައި ޕީއެމް މޯދީ ލިޔުއްވި ޕޯސްޓްތަކުގައި، ހުދު ގޮނޑުދޮށްތަކާއި އުޑާއި ކަނޑުގެ ފޮޓޯތައް ހިއްސާކުރައްވައި ވިދާޅުވީ ތަންތަން ބަލާލައި ތަޖުރިބާކޮށްލަން ބޭނުންވާ ފަރާތްތަކުގެ ލިސްޓުގައި ލަކްޝަދީޕް ހިމަނަންވާނެ ކަމަށެވެ.
މިހާރު ޑިލީޓްކޮށްފައިވާ ޕޯސްޓެއްގައި ރާއްޖޭގެ ޑެޕިއުޓީ މިނިސްޓަރު އޮފް ޔޫތު އެމްޕަވަރމަންޓް މަރިޔަމް ޝިއުނާ ވަނީ ބޮޑުވަޒީރު މޯދީއަށް މަލާމާތްކުރައްވައި އިހްތިރާމް ކުޑަ ބަސްތަކެއް އަމާޒުކުރައްވާފައެވެ. މީގެ އިތުރުން ޔޫތު މިނިސްޓްރީގެ ޑެޕިއުޓީ މިނިސްޓަރުން ކަމުގައިވާ މަލްޝާ ޝަރީފާއި މަހުޒޫމް މާޖިދުވެސް ވަނީ މިމޭރުމުން ޕޯސްޓް ކުރައްވާފައެވެ.
މި މައްސަލައިގައި ދިވެހި ސަރުކާރުން ވަނީ، ނައިބު ވަޒީރުން ދެއްކެވި ވާހަކަތަކަކީ ސަރުކާރުގެ ސްޓޭންޑް ނޫންކަމަށާއި، އެއީ ސަރުކާރު ދެކޭގޮތް ނޫން ކަމަށްވެސް ބުނެފައެވެ. އަދި ރާއްޖޭގެ މިނިސްޓަރ އޮފް ފޮރިން އެފެއަރޒް މޫސާ ޒަމީރު ވިދާޅުވީ، ބޭރުގެ ލީޑަރަކާ ދެކޮޅަށް ދެއްކެވި އެ ވާހަކަތަކަކީ ބަލައިގަނެވޭނެ ވާހަކަތަކެއް ނޫންކަމަށާއި، އެއީ ރާއްޖޭގެ ސަރުކާރުގެ ރަސްމީ ސްޓޭންޑާގުޅޭ ވާހަކަތަކެއް ނޫންކަމަށެވެ.
އޭނާ ވިދާޅުވީ ރާއްޖޭގެ ހުރިހާ ބައިވެރިންނާއެކު، ޚާއްސަކޮށް އަވައްޓެރި ގައުމުތަކާއެކު "ޕޮޒިޓިވް އަދި ކޮންސްޓްރަކްޓިވް ޑައިލޮގެއް" ބާއްވާނެކަމަށެވެ.
ބޮޑުވަޒީރު މޯދީއަށް ފުރައްސާރަކޮށް މަލާމާތްކޮށް އެކްސްގައި ޕޯސްޓްކުރި މައްސަލައިގައި 3 ނައިބު ވަޒީރުން ވަނީ ވަގުތީގޮތުން މަގާމުން ސަސްޕެންޑްކޮށްފައެވެ. އަދި މި މައްސަލަ ހޫނުވެ، ރާއްޖެއަށް އަންނަ އިންޑިއާގެ ގިނަ އަދަދެއްގެ ފަތުރުވެރިން ބުކިންގ ކެންސަލްކޮށް، ރާއްޖެ ބޮއިކޮޓް ކުރުމަށް އިންޑިއާގެ އެކިއެކި ފަންތީގެ މީހުން ގޮވަމުން އަންނައިރު، ރައީސް ވަނީ އިންޑިއާއާ އެންމެ ބޮޑަށް މައްސަލަ އުފެދިފައިވާ ޗައިނާއަށް ފުރަމާނަ ދަތުރުފުޅެއް ފައްޓަވާފައެވެ.
މައްސަލަ ހޫނުވެފައިވަނިކޮށް، ރައީސް ޗައިނާއަށް ވަޑައިގަންނަވާ ތަނަށް ނޫސްވެރިންނަށް ދައުވަތު ދެއްވުމަށްފަހު، ރައީސް ވަނީ މީޑިއާތަކަށް ފިއްލަވައިގެން ފުރާވަޑައިގެންފައެވެ.
