ޑެޕިއުޓީ މިނިސްޓަރުން އިންޑިއާ އާއި މެދު ދެއްކި ވާހަކަތައް މަޓީން ކުށްވެރިކޮށްފި

ޑެޕިޓީ މިނިސްޓަރުން އިންޑިއާ އާއި މެދު ދެއްކި ވާހަކަތައް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ ، މަޓީން ކުށްވެރިކޮށްފިއެވެ.

ޔޫތު މިނިސްޓްރީގެ ބައެއް ޑެޕިއުޓީ މިނިސްޓަރުން އިންޑިއާއަށާއި އެ ގައުމުގެ ބޮޑުވަޒީރު ނަރެންދުރަ މޯދީއަށް މަލާމާތްކޮށް ދަށު ދަރަޖައިގެ ވާހަކަތަކެއް ދެއްކި މައްސަލަ ވަނީ ފެންމަތިވެފައެވެ. އެކަމާއި ގުޅިގެން އިންޑިއާ ސަރުކާރުގެ ނުރުހުން ރާއްޖެ އަށް ވަނީ އަމާޒުވެފައެވެ. މަޓީން ނެރުނު ނޫސްބަޔާނެއްގައި ދެ ގައުމުގެ ގުޅުން ދެމެހެއްޓުމަށާއި، އެ ގުޅުމަށް އަސަރުކުރާ ފަދަ ވާހަތައް ދެއްކުން ހުއްޓާލުމަށް ވަނީ ގޮވާލާފައެވެ.

އަދި އިންޑިއާއަކީ ރާއްޖޭގެ އަވައްޓެރި، ގާތް ގައުމެއް ކަމަށް މަޓީން ވަނީ ބުނެފައެވެ. ހަމައެހެންމެ އިންޑިއާގެ ސަރުކާރުންނާއި އިންޑިއާގެ ރައްޔިތުން ރާއްޖެއާ މެދު ބަހައްޓާ ގާތްކަމަށްޓަކާ ޝުކުރު އަދާކޮށްފައިވެއެވެ. ކޮވިޑްގެ ފަހުން ރާއްޖޭގެ ފަތުރުވެރިކަން ކުރިއެރުމުގައި އިންޑިއާގެ ބޮޑު ހިއްސާއެއްވާ ކަމަށް ވެސް މަޓީން ވަނީ ފާހަގަކޮށްފައެވެ. އޭގެ ފަހުން އިންޑިއާއަކީ ރާއްޖޭގެ އެންމެ ބޮޑު މާކެޓްކަން މަޓީގެ ބަޔާނުގައި ފާހަގަކޮށްފައިވެއެވެ.

އިންޑިއާ އަށް ފާޑުކީ ނައިބު ވަޒީރުން ވަނީ ވަޒީފާއިން ސަސްޕެންޑްކޮށްފައެވެ. އިންޑިއާ އަށް ފާޑުކީ ނައިބު ވަޒީރުންނަށް ދަނީ ފާޑުކިޔުން އަމާޒުވަމުންނެވެ.