ރައީސް ވިދާޅުނުވަނީސް، އެމަނިކުފާނުގެ ޑެޕިއުޓީ މިނިސްޓަރުން އެކަމެއް ނުކުރައްވާނެ - އާޒިމް
8 ޖެނުއަރީ 2024 | ހޯމަ 02:14ބާރެއް ނެތް ވެރިއެއް ގައުމެއްގައި ހުރިތަން މި ފެންނަނީ
އެމްޑީޕީ މޭޔަރ ކެންޑިޑޭޓް އާދަމް އާޒިމް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުނުވާނަމަ އެމަނިކުފާނުގެ ޑެޕިއުޓީ މިނިސްޓަރުން، އިންޑިއާއާއި އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް ބަސް ނުބުނުއްވާނެ ކަމަށް، އެމްޑީޕީގެ ޓިކެޓްގައި މާލެ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓް އާދަމް އާޒިމް ވިދާޅުވެއްޖެއެވެ.
އާދީއްތަ ދުވަހުގެ ރޭ ބޭއްވި ކަންމަތީ ބައްދަލުވުމުގައި، މިހާރު ހޫނުވެގެން އުޅޭ އިންޑިއާއާއި ރާއްޖޭގެ ގުޅުމުގެ މައްސަލައަށް އަލިއަޅުއްވާލައްވާ އާޒިމް ވިދާޅުވީ މިއަދު ފެނިގެން މިދަނީ ގައުމާއި ހަވާލުވެ ގައުމުގެ އިގްތިސާދު ހަލާކުކުރަމުންދާ މަންޒަރު ކަމަށެވެ. އާޒިމް ވިދާޅުވީ ރައްޔިތުން މީހަކު އިންތިހާބު ކުރުމުން، އެމީހަކު ކައިރިކުރަން ޖެހޭނީ ގާބިލު ކަންކަން ކުރެވޭ، ތައުލީމާއި ތަޖުރިބާ ހުރި މީހުން ކަމަށެވެ. އަދި ތަނަކުން މީހަކު ގެނެސްގެން އެކަމެއްކޮށްގެން ކަންކަން ނުކުރެވޭނެ ކަމަށެވެ.
އާޒިމް ވިދާޅުވީ ޑރ. މުއިއްޒު ވިދާޅު ނުވަނީސް، އެމަނިކުފާނުގެ ޑެޕިއުޓީ މިނިސްޓަރުން އެކަމެއް ނުކުރައްވާނެ ކަމަށެވެ. އަދި އެ ހުއްދަ ނުލިބި އެކަން ކޮށްފައިވާ ނަމަ ރައީސް މުއިއްޒު ހުންނެވީ ވަރަށް ބޮޑަށް ފިތިފައި ކަމަށް އާޒިމް ވިދާޅުވިއެވެ.
އާޒިމް ވިދާޅުވީ އިންޑިއާއާއި ދެކޮޅަށް އެ ވާހަކަ ދެއްކީ ދިވެހިން ނޫން ކަމަށާއި، އެކަން ކުރީ ގައުމަށް ގައްދާރުވަމުންދިޔަ ބައެއް ކަމަށެވެ. އަދި އެމްޑީޕީން ދިވެހިން ދިފާއުކުރުމަށް މަސައްކަތް ކުރާނެ ކަމަށެވެ.
