ފަލަސްޠީނުގެ ޣައްޒާ ކޮންޓްރޯލް ކުރަމުން ދާ ޙަމާސް ޖަމާޢަތުގެ ވަސް މި ބިންމަތިން ފޮހެލާނެ ކަމަށް ބުނެ ޣައްޒާގައި ނަސްލު ދޮވެލުމުގެ ޤަތުލުޢާންމު، ޔަހޫދީ އިޒްރޭލުން ފެށީ މީގެ 3 މަސް ކުރިންނެވެ. އޮކްޓޯބަރ 7 ވަނަ ދުވަހުން ފެށިގެން ހަފުތާއެއްހާ ދުވަހަށް މެނުވީ ޣައްޒާއަށް ދެމުންދާ ޢުދުވާނީ ޙަމަލާތަކުގައި މިއަދު މުޅި ޣައްޒާ އޮތީ ސުންނާފަތިކޮށް، ހަފުސްކޮށްފައެވެ.

މަޢުރޫފު ޢާއިލާއަކީ ޢުދުވާންތައް ފެށީއްސުރެ ރައްކާތެރި މަންޒިލެއްގެ އުންމީދުގައި އެއް ތަނުން އަނެއް ތަނަށް ދިރިއުޅުން ބަދަލު ކުރަމުން އަންނަ ޢާއިލާއެކެވެ. ޣައްޒާގެ އުތުރުގެ ރަށެއް ކަމަށް ވާ ބައިތު ލާހިޔާގައި އެ ޢާއިލާއިން ދިރިއުޅެމުން ދިޔަ ގެ ދޫކޮށްލި އެ ޢާއިލާގެ މެންބަރުން މިއަދު ތިބީ، ޣައްޒާގައި ގެދޮރު ގެއްލިފައި ވާ މީހުންނަށް ދެކުނުގެ ރަފަޙުގައި ޖަހާފައި ވާ ވަގުތީ ޓެންޓު ކޭމްޕެއްގައެވެ.

އުތުރުގައި ހުރި ގެ ދޫކޮށް، ފުރާނަ އަތް މައްޗަށް ލައިގެން ފެށި ނުރައްކާ ދަތުރުގައި މަޢުރޫފު ޢާއިލާއިން މިހާތަނަށް އެތައް ކޭމްޕެއްގައި ދުވަސްތައް ގުނައިފިއެވެ. ކޮންމެތާކުން އެމީހުން ފަހާލަނީ ނިރުބަވެރި އިޒްރޭލުގެ ޢުދުވާނީ ޙަމަލާތަކެވެ. ރަފަޙުގައި މިއަދު އެ ޢާއިލާއިން ދިރިއުޅެމުން ދަނީ ކުޑަކުޑަ ޓެންޓެއްގައެވެ. ބޯނެ ފެންފޮދެއް ނެތެވެ. ކަރަންޓެއް ނެތެވެ. ނުވިތާކަށް، ގަދަ ފިނިން ސަލާމަތް ވާން ބޭނުންކޮށްލާނެ ރަޖާގަނޑެއްގެ މިންވަރުވެސް ނެތެވެ.

ޝާދީ މަޢުރޫފުއާއި، އަންހެނުން ސާފިޔާއާއި އެ ދެމަފިރިންގެ 6 ދަރިން ދިރިއުޅެމުން ދާ ކުޑަކުޑަ ޓެންޓުގެ ބޭރުގައި ޖަހާފައި ވާ އަލިފާންގަނޑުގެ ކައިރީގައި އިށީނދެލައިގެން ތިބީ ގަދަ ފިންޏާއި، ރޭގަނޑުގެ އަނދިރި ނަމާންކަމުގެ ތެރެއިން ނަފުސަށް ލިބެމުންދާ ވޭނީ ތަކުލީފަށް ހިސާބެއްގެ ލުޔެއް ލިބޭތޯއެވެ.

އިރު އުދަރެހުން އޮބާ އަނދިރިޖެހުމާއެކު 'ޓެންޓު ސިޓީ' އަކީ ފަޅު ސަހަރާއެއް ފަދަ ތަނެކެވެ. ނިރުބަވެރި ޢުދުވާންތައް ފެށިތާ ކުރީކޮޅު ޣައްޒާއިން ކަރަންޓުގެ ސަޕްލައި ކަނޑާލައިފިއެވެ. ތެލުގެ އިމްޕޯޓުގައި އިޒްރޭލުން އަތް އެޅިއެވެ. ބާކީ އޮތީ އިރުގެ އަވިން ހަކަތައް އުފެއްދެން ހުރި ނިޒާމުތަކެވެ. ބައެއް ފަހަރު ޓެންޓުތަކުގައި ޓޯޗު ބައްތިއެއް ދިއްލާލައެވެ. ޕްލާސްޓިކް ސަތަރިން ޖަހާފައި ހުރި ޓެންޓުތަކުގެ ތެރެއިން ކިރިޔާވެސް އަލިކަމެއް ފެނިލަނީ އެފަދަ ވަގުތެއްގައެވެ.

އެންމެ 4 މަހުގެ ތުއްތުއްތު އަންހެން ދަރިފުޅު އުރާލައިގެން އިނދެ ސާފިޔާ ކިޔައިދިން ގޮތުގައި، ކޮންމެ ރެއަކުވެސް އެމީހުން ނިދަނީ ބިރުވެރިކަމެއްގެ ތެރޭގައެވެ.

ތުއްތު ދަރިފުޅަށް ބޭނުންވާ ނެޕީއާއި، ކޮންމެހެންވެސް އެ ދަރިފުޅަށް ބޭނުން ޖެހިފައި އޮތް ބޭބީ ފޯމިއުލަރ ހޯދުމަކީ މިއަދު ސާފިޔާއަށް އުފުލަން ޖެހިފައި އޮތް އެންމެ ބޮޑު ބުރައެވެ. ނެޕީއާއި ފޯމިއުލާ ހޯދަން ސާފިޔާ ބަރޯސާ ވަނީ ދަރުމައަށް މަސައްކަތް ކުރާ މީހުން ފޯރުކޮށްދޭ އެހީއަށެވެ.

އެމެރިކާއާއި އެމެރިކާގެ އެކުވެރި ޤައުމުތަކުން ޖަހައިދިން އައްޑަނައިގެ ނިވަލުގައި އޮވެގެން ނިރުބަވެރި ޔަހޫދީން ދެމުންދާ ޢުދުވާނީ ޙަމަލާތަކުގައި މި ދުނިޔެއާއި ވަކިވެ ދިޔަ ފަލަސްޠީނު ރައްޔިތުންގެ ޢަދަދު 22000 އަށް އަރައެވެ. އެއީ ކޮން ބައެއްކަން ދެނެގަނެވިފައި ވާ މީހުންގެ ޢަދަދު އެކަންޏެވެ. އެޔެއް މިޔެއް ބެލުމެއް ނެތި، ވަކިން ޚާއްޞަކޮށް ރޭގަނޑުގެ އަނދިރިކަމުގެ ތެރޭގައި ވަރުގަދަ ކުރާ ޙަމަލާތަކުގައި ބިމާ ހަމަކުރާ ގެތަކުގެ ދަށުގައި އެތައް ހާސް ބަޔަކު ތާށިވެ، މަރުވެފައި އަދިވެސް ވާނެ ކަމަށް ޣައްޒާގެ ކަމާ ބެހޭ ފަރާތްތަކުން ބުނެއެވެ. ނިރުބަވެރި ޔަހޫދީންގެ ޢުދުވާންތަކުގައި ފަލަސްޠީނުން ގެއްލުނު ފުރާނައިގެ ބޮޑު އިންސައްތައެއް ހިއްސާ ކުރަނީ މައުސޫމު، ކުޑަ ކުދިންނެވެ.

2.3 މިލިއަން މީހުންގެ އާބާދީއެއް ތޮއްޖެހިފައި އޮތް ޣައްޒާއަކީ މިއަދު ދިރިތިބީންނަށްވެސް ރައްކާތެރި ތަނެއް ނޫނެވެ. އިޒްރޭލުގެ ޢުދުވާންތަކުން ސަލާމަތް ވާނެ އެންމެ ވެލިފުކެއްވެސް ޣައްޒާގެ ފަސްގަނޑުގައި ނެތެވެ. އެކި ކަހަލަ ބަލިމަޑުކަން ފެތުރެމުން ދާ އިރު، ޞިއްޙީ ނިޒާމުވެސް އޮތީ ހަފުސްކޮށް އިނދަޖައްސާލާފައެވެ. އިޒްރޭލުގެ ޢުދުވާންތައް ހުއްޓުމަކަށް ގެނައުމަށް ބައިނަލްއަޤުވާމީ މުޖުތަމަޢުން ކުރާ ޑިމާންޑަކީ ބޭކާރު އެއްޗަކަށްވެއްޖެއެވެ. އެމެރިކާއާއި އެމެރިކާގެ އެކުވެރިން ޖަހައިދީފައި ވާ އައްޑަނައިގެ ނިވަލުގައި ތިބެގެން އިޒްރޭލުން ހިންގަމުންދާ ޤަތުލުޢާންމު، އަދިވެސް އެތައް މަހަކަށް ދަންމާލާނެ ކަމަށް ނިރުބަވެރި ޔަހޫދީން ދަނީ ބުނަމުންނެވެ.