2024ގެ ނިޔަލަށްވެސް ޣައްޒާގައި ހަނގުރާމަ ކުރިއަށްދާނެކަމަށް ބެލެވޭކަމަށް އިސްރާއީލުން ބުނެފި
1 ޖެނުއަރީ 2024 | ހޯމަ 10:08އިސްރާއީލުގެ ލާއިންސާނީ ހަމަލާތަކުގައި ފަލަސްތީނުގެ 21،800 މީހުން މިހާތަނަށް ޝަހީދުވެފައިވޭ
ޣައްޒާ ހަނގުރާމައިގައި ސުންނާފަތިވެފައިވާ ސަރަހައްދެއް
ޣައްޒާގައި މިހާރު ކުރިޔަށްދާ ހަނގުރާމަ 2024ގެ ނިޔަލަށްވެސް ކުރިޔަށް ދާނެކަމަށް ބެލެވޭކަމަށް، އިސްރާއީލުގެ އަސްކަރިއްޔާއިން ބުނެފިއެވެ. އައު އަހަރުގެ މެސެޖުގައި އިސްރާއީލުގެ ޑިފެންސް ފޯސްގެ ތަރުޖަމާނު ވަނީ، ހަނގުރާމަ ދިގުދެމިގެން ހިނގައިދާނެ ކަމަށް ބަލައި، ސިފައިން ހަމަކޮށް، ގެންނަންޖެހޭ ބަދަލުތައް ގެންނަމުން ދާކަމަށް ބުނެފައެވެ. އޭނާ ބުނީ ބައެއް ސިފައިން (ޚާއްސަކޮށް ރިޒަރވް ސިފައިން) އަނބުރާ ގެނެސް، އައު ގްރޫޕްތައް ހެދުމުގެ ކަންކަން ކުރިއަށް ދާކަމުގައެވެ. އަދި މި ގެންނަ ބަދަލުތަކަކީ މުޅި 2024 ވަނަ އަހަރުވެސް ހަނގުރާމަ ކުރިޔަށް ހިނގައިދާނެކަމަށް ބަލައި، ގެންނަ ބަދަލުތަކެއް ކަމަށް އޭނާ ބުނެފައި ވެއެވެ.
ތަރުޖަމާނު ބުނީ، މި ގެނެވޭ ބަދަލުތަކުގެ ދަށުން ބައެއް ރިޒަރވިސްޓުން މިހަފުތާގައި ޣައްޒާއިން ފޭބިނަމަވެސް، އެއީ ކުރިޔަށް އޮތް އޮޕަރޭޝަންތަކަށް ތައްޔާރުވުމަށް ފުރުސަތު ދިނުމަށް ކުރާކަމެއް ކަމުގައެވެ.
އިސްރާއީލުގެ ލާއިންސާނީ ހަމަލާތަކުގައި ފަލަސްތީނުގެ 21،800 މީހުން މިހާތަނަށް ޝަހީދުވެފައި ވާކަމަށް ހަމާސްއިން ބުނެއެވެ. މީގެތެރޭގައި ގިނައީ އަންހެނުންނާއި ކުޑަކުދިންނެވެ.
އޮކްޓޯބަރު 7 ވަނަ ދުވަހުން ފެށިގެން ކުރިއަށްދާ ހަނގުރާމައިގައި، އާދީއްތަ ދުވަހު ޣައްޒާ ސިޓީއަށް ދިން ވައިގެ ހަމަލާއެއްގައި ފަލަސްތީނުގެ 48 މީހުން މަރުވެފައިވެއެވެ.
އދ.ން ބުނާގޮތުގައި 2.4 މިލިއަން މީހުންގެ އާބާދީއެއް އޮންނަ ޣައްޒާގެ 85 އިންސައްތަ ނުވަތަ ގާތްގަނޑަކަށް ދެމިލިއަން މީހުން ވަނީ ރައްކާތެރިކަން ހޯދުމަށްޓަކައި ގެދޮރު ދޫކޮށް އެހެން ތަންތަނަށް ބަދަލުވެފައެވެ.
ރެޔަކީ މުޅިދުނިޔޭގައި ވެސް އެކި ކަންކޮޅުތަކުގައި ހަވާގެ އަލިން އުޑުމަތި އަލިވެ، ހުނުމުގެ އަޑުން ޖައްވު ގުގުމާލާފައި ވީނަމަވެސް، ރޭގައިވެސް ޣައްޒާގެ އުޑުމަތި އަލިވެފައި އޮތީ އިސްރާއީލުގެ މިސައިލްތަކާއި ޓޭންކް ހަމަލާތަކުގެ ބާރު ގޮވުންތަކުން ކަމަށާއި، އިވެމުންދިޔައީ ކުށެއް ނެތް މައުސޫމް ރައްޔިތުންގެ ވޭނީ ރުއިމުގެ އަޑުކަމަށް ޣައްޒާގެ ރައްޔިތުން ވަނީ ބުނެފައެވެ.
