ރެއާލް މެޑްރިޑަށް އިރުޝާދު ދެމުން އަންނަ އިޓަލީގެ ތަޖުރިބާކާރު ކޯޗު، ކާލޯ އަންޗެލޮޓީ އެ ކުލަބާއެކު ހަދާފައިވާ އެއްބަސްވުން އައު ކޮށްފި އެވެ.

އުމުރުން 64 އަހަރުގެ އަންޗެލޮޓީ، ދެ ވަނަ ފަހަރަށް ރެއާލާ ހަވާލުވީ 2021 ވަނަ އަހަރު އެވެ. އެ އަހަރު ރެއާލާއެކު އޭނާ ސޮއި ކުރީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ 2024 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަމަވުމުން، އޭނާ ރެއާލް ދޫކޮށް ބްރެޒިލް ޤައުމީ ފުޓުބޯޅަ ޓީމުގެ ކޯޗުކަމާ ހަވާލުވާނެ ކަމުގެ އަޑުތައް ވެސް އޮތީ ފެތުރިފަ އެވެ. އަންޗެލޮޓީ ގެނައުމުގެ ޝައުޤުވެރިކަން ބްރެޒިލްގެ ފުޓުބޯޅަ ފެޑެރޭޝަނުން ވެސް އޮތީ ފާޅުކޮށްފަ އެވެ. އެހެން ނަމަވެސް، އޭނާގެ އެއްބަސްވުން އައު ކުރުމަށް ރެއާލުން ވަނީ މީގެ ކުރިން މަސައްކަތް ފަށައިފަ އެވެ.

ރެއާލްގެ އެއްބަސްވުން އަންޗެލޮޓީ އައު ކުރީ އިތުރު ދެ އަހަރު ދުވަހަށެވެ. އެހެންކަމުން، މިހާރު ރެއާލާއެކު އޭނާ ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެކަން ހާމަކޮށް ރެއާލުން ވަނީ ބަޔާނެއް ވެސް ނެރެފަ އެވެ. އެ ބަޔާނުގައި ވަނީ އެ ކުލަބާއެކު އަންޗެލޮޓީ ހޯދާފައިވާ ކާމިޔާބީތައް ވެސް ފާހަގަކޮށްފަ އެވެ.

ދެ ވަނަ ފަހަރަށް އަންޗެލޮޓީ ރެއާލާ ގުޅުނީ 2021 ވަނަ އަހަރެވެ. އޭނާގެ އިރުޝާދުގެ ދަށުން ރެއާލް ވަނީ 141 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 99 މެޗުން މޮޅުވެފަ އެވެ. 22 މެޗުން ބަލިވެފައިވާއިރު، 20 މެޗު ވަނީ އެއްވަރުވެފަ އެވެ. ދެ ވަނަ ފަހަރަށް ރެއާލާ ހަވާލުވެ އޭނާ ވަނީ އެ ކުލަބާއެކު ހަ ތައްޓެއް ކާމިޔާބުކޮށްފަ އެވެ.

އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެ އެވެ.