ސްޕެނިޝް ލީގުގައި އެންމެ ފަހުގެ ޗެމްޕިއަން ބާސެލޯނާއާ ދެކޮޅަށް ކުޅުނު މެޗުން ރެއާލް މެޑްރިޑު މޮޅުވުމުން ހިތްހަމަ ޖެހިފައި ހުރި ކަމަށް އެ ޓީމުގެ ކޯޗު ޒަބީ އަލޮންސޯ ބުނެފި އެވެ.

ރެއާލްގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ބާސެލޯނާގެ މައްޗަށް ކުރި ހޯދައިފަ އެވެ. އެ މޮޅާއެކު، ރެއާލް އިން ވަނީ ލީގު ތާވަލްގެ އެއް ވަަނައިގައި ފަސް ޕޮއިންޓުގެ ލީޑެއް ނަގައިފަ އެވެ. އެއީ މިވަގުތު އަލޮންސޯ އަށް އޮތް އެންމެ ބޮޑު ހިތްހަމަ ޖެހުމެވެ.

މެޗަށް ފަހު ވާހަަކަ ދައްކަމުން އަލޮންސޯ ބުނެފައި ވަނީ، ބާސެލޯނާއާ ދެކޮޅަށް ކުޅުނު މެޗުން ލިބުނީ ވަރަށް މުހިންމު މޮޅެއް ކަމަށާއި، އެތައް ގޮތަކުން އެ މެޗު ޚާއްސަވާ ކަމަށެވެ. އޭނާ ބުނީ އެ މެޗުގައި ރެއާލްގެ ކުޅުންތެރިން ދެއްކީ ފުރިހަމަ ކުޅުމެއް ކަމަށާއި، ކުޅުންތެރިން ތިބީ ވަރަށް ރަނގަޅު ރޫޙެއްގައި ކަމަށެވެ.

އަލޮންސޯ ބުނީ މެޗުން މުހިންމުވީ ހަމައެކަނި ތިން ޕޮއިންޓު ނޫން ކަމަށެވެ. ޚާއްސަކޮށް އެ މޮޅާ އެކު، ކުރިއަށް ދިޔުމުގައި ރެއާލް އަށް އިތުރު ހިތްވަރެއް ލިބިފައިވާ ކަމަށާއި، ކުޅުންތެރިން އިތުބާރު ހިފަހައްޓައި، މިހާރު ޓީމުގައި އޮތް ރޫޙާ އެކު ކުރިއަށް ދިޔުމުގެ އުންމީދު އޮތް ކަމަށް އޭނާ ވަނީ ބުނެފަ އެވެ. ކުޅުންތެރިންނާ މެދު ހިތްހަމަ ޖެހިގެން ހުރިކަން ފާހަގަކޮށް އަލޮންސޯ ބުނީ، ބޮޑެތި މެޗުތަކުން ރެއާލް އަށް މޮޅުވެވޭކަން މިހާރު ކުޅުންތެރިންނަަށް އިޙުސާސް ވާނެ ކަމަށެވެ.

އިތުރަށް ވާހަކަ ދައްކަމުން އަލޮންސޯ ބުނީ މެޗުގައި ރެއާލް އިން ޖެހީ ދެ ލަނޑު ކަމަށް ވީ ނަމަވެސް، އެއަށް ވުރެ ފުރިހަމަ ކުޅުމެއް ރެއާލް އިން ދެއްކި ކަމަށެވެ. އޭނާ ބުނީ ބާސެލޯނާ އަތުން ރެއާލް އަށް ލިބުނީ ހައްގު މޮޅެއް ކަމަށާއި، މެޗުގައި އިތުރު ލަނޑު ޖަހަން ވެސް އެ ޓީމަށް ފުރުސަތު ލިބުނު ކަމަށެވެ.

މީގެ އިތުރުން އަލޮންސޯ ވަނީ ރެއާލް އަށްް ކުޅެމުން އަންނަ އިންގްލެންޑުގެ ޖޫޑް ބެލިންހަމް އަށް ވަރަށް ބޮޑަށް ތައުރީފު ކޮށްފަ އެވެ. އެގޮތުން އަލޮންސޯ ބުނީ ޔުވެންޓަސްއާ ދެކޮޅަށް ކުޅުނު މެޗާއި، ގެޓާފޭއާ ދެކޮޅަށް ކުޅުނު މެޗުގައި ބެލިންހަމް ދެއްކި ކުޅުން ފެނިފައިވާ ކަމަށެވެ. އަދި މިހާރު އޭނާ އަންނަނީ އިތުރު ކުރިއެރުން ތަކެއް ހޯދަމުން ކަމަށް ވެސް އަލޮންސޯ ވަނީ ބުނެފަ އެވެ.

އިތުރަށް ވާހަކަ ދައްކަމުން އަލޮންސޯ ބުނީ، ބެލިންހަމް އަކީ ހުރިހާ ގޮތަކުން ވެސް ޚާއްސަ ކުޅުންތެރިޔެއް ކަމަށެވެ. އެގޮތުން ދަނޑު މަތީގައި ވެސް، ޓީމުގެ ކުޅުންތެރިންނާ އެކު ވެސް އަދި ސަޕޯޓަރުންނާ އެކު ވެސް ވަރަށް ގުޅިގެން ކުރިއަށް ދާ ކުޅުންތެރިޔެއް ކަމަށް އަލޮންސޯ ބުންޏެވެ. އޭނާގެ ހިތްވަރާއި، މަސައްކަތް އަދި ކުޅުމަކީ އެހެން ކުޅުންތެރިންނަށް ވެސް ލިބޭ ހިތްވަރެއް ކަމަށް އަލޮންސޯ ވަނީ ބުނެފަ އެވެ.

މެޗުން މޮޅުވެ ރެއާލް އިން ވަނީ އެއް ވަނައިގައި ފަސް ޕޮއިންޓުގެ ލީޑެެއް ނަގައިފަ އެވެ. މިހާތަނަށް ލީގުގައި ކުޅެފައިވާ 10 މެޗުން ރެއާލް އަށް ލިބެނީ 27 ޕޮއިންޓެވެ. ހަމަ އެ އަދަދަަށް މެޗު ކުޅެގެން ދެ ވަަނައިގައި އެންމެ ފަހުގެ ޗެމްޕިއަން ބާސެލޯނާ އަށް ލިބެނީ 22 ޕޮއިންޓެވެ.