ރެއާލް ބަލިކޮށް، ލިވަޕޫލް އަށް ހަމަޖެހުމެއް

ޔުއެފާ ޗެމްޕިއަންސް ލީގުގައި ރެއާލް މެޑްރިޑްއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން ހަމަ ޖެހުމެއް ހޯދައިފި އެވެ.

އަންގާރަ ދުވަހުގެ ރޭ ލިވަޕޫލްގެ އަމިއްލަ ދަނޑު އެންފީލްޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ލިވަޕޫލް އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ލިވަޕޫލް އިން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. މެޗުގައި އެ ޓީމުން ލަނޑު ޖެހީ ދެ ވަނަ ހާފުގައި، މެޗުގެ 61 ވަނަ މިނެޓުގަ އެވެ. އެ ލަނޑު ލިވަޕޫލް އަށް ޖަހައިދިނީ އާޖެންޓީނާގެ އަލެކްސިސް މެކް އަލިސްޓާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑޮމިނިކް ސޮބޮސްލާއީ އެވެ.

ރެއާލްއާ ދެކޮޅަށް ނިކުތްއިރު ލިވަޕޫލް އަށް ކުރިމަތިވެފައި އޮތީ އުނދަގޫ ޙާލަތަކެވެ. ރެއާލް މެޗުގެ ކުރިން. އެންމެ ފަހުން ލިވަޕޫލް ކުޅުނު އަށް މެޗުގެ ތެރެއިން މޮޅުވެފައި ވަނީ ތިން މެޗުންނެވެ. އަނެއް ފަސް މެޗުން ލިވަޕޫލް ވަނީ ބަލިވެފަ އެވެ.

މެޗަށް ފަހު ވާހަކަ ދައްކަމުން ލިވަޕޫލްގެ ކޯޗު އާން ސްލޮޓް ބުނެފައި ވަނީ، ރެއާލް ކަހަލަ ވަރުގަދަ ޓީމަކާ ދެކޮޅަށް ލިވަޕޫލްގެ ކުޅުންތެރިން ދެއްކި ކުޅުމާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. ރެއާލް އޮތީ ވަރަށް ރަނގަޅު ފޯމެއްގައިކަން ފާހަގަކޮށް ސްލޮޓް ބުނީ، އެ ޓީމާ ދެކޮޅަށް ކުޅެ މޮޅުވުމަކީ ވަރަށް ހިތްވަރު ކަމަށެވެ.

ސްލޮޓް ބުނީ މެޗުގައި ލިވަޕޫލް އިން ދެއްކި ކުޅުމާއި، ކުޅުންތެރިންގެ މަސައްކަތް ބަލައި ގަންނަ ކަމަށެވެ. އޭނާ ބުނީ އެ މޮޅާ އެކު ލިވަޕޫލް އަށް އިތުރު ހިތްވަރެއް ވެސް ލިބިފައިވާ ކަމަށާއި، ކުރިއަށް ދާން މަސައްކަތް ކުރަން ޖެހޭނީ ހުއްޓުމެއް ނެތި ކަމަށެވެ. ޚާއްސަކޮށް އެ މެޗުން ލިވަޕޫލް ބަލިވި ނަމަ، އެތައް ޕްރެޝަރަކާ ކުރިމަތިލާާން ޖެހުނީސް ކަމަށް އޭނާ ބުންޏެވެ.

މޮޅާއެކު ލިވަޕޫލް އޮތީ ތާވަލްގެ ހަތަރު ވަނައިގަ އެވެ. މިހާތަނަށް ކުޅެފައިވާ ހަތަރު މެޗުގެ ތެރެއިން، އެ ޓީމު މޮޅުވެފައި ވަނީ ތިން މެޗުންނެވެ. އަނެއް މެޗުން ބަލިވެފައިވާއިރު، އެ ޓީމަށް ލިބެނީ ނުވަ ޕޮއިންޓެވެ.