ލިވަޕޫލް ތާވަލްގެ އެއްވަނަ އަށް

ބާންލީ ބަލިކޮށް, އިނގިރޭސި ޕްރިމިއަރ ލީގު ތާވަލްގެ އެއްވަނަ އަށް ލިވަޕޫލް ޖެހިލައިފިއެވެ.

ލިވަޕޫލް އެއްވަނަ އަށް ޖެހިލީ ކުރިން އެއްވަނައިގައި އޮތް އާސެނަލް އަށްވުރެ އިތުރަށް މެޗެއް ކުޅެ, ދެ ޕޮއިންޓްގެ ލީޑަކާ އެކުއެވެ. އެއީ 19 މެޗުން 42 ޕޮއިންޓް ހޯދައިގެންނެވެ. އާސެނަލް އޮތީ 18 މެޗުން 40 ޕޮއިންޓާއެކު އެވެ. ބާންލީގެ މައްޗަށް ލިވަޕޫލުން ކުރިހޯދީ 2-0 ނެވެ. ބާންލީގެ ދަނޑުގައި ކުޅުނު މެޗުގެ ހަ ވަނަ މިނިޓްގައި ލިވަޕޫލުން ލަނޑު ޖަހާ ކުރިހޯދިއެވެ. ކުރިހޯދައިދިނީ ނުނޭޒް އެވެ. ކްލަބް މެޗެއްގައި ނުނޭޒް އަށް ލަނޑު މިޖެހުނީ 12 މެޗަށް ފަހުއެވެ. ދެވަނަ ލަނޑު ޖެހީ މެޗުގެ ފަހު މިނިޓްގައި ޖޮޓާ އެވެ. ބާންލީ އަކީ 11 ޕޮއިންޓާއެކު ރެލިގޭޝަން ޒޯންގައި އޮތް ޓީމެކެވެ.

ލީގުގައި ނިއުކާސަލް ޔުނައިޓެޑް ވަނީ ނޮޓިންގހަމް ފޮރެސްޓް އަތުން ބަލިވެފައެވެ. ނިއުކާސަލްގެ މައްޗަށް ނޮޓިންގހަމް ފޮރެސްޓް ކުރިހޯދީ 3-1 ނެވެ. މިމޮޅާއެކު ނޮޓިންގހަމް ފޮރެސްޓް ވަނީ ރެލިގޭޝަނުން ބޭރަށް ނިކުމެފައެވެ. ނިއުކާސަލް ވަނީ ތާވަލްގެ އަށް ވަނައަށް ސޮއްސާލާފައެވެ.