އޮތޮރައިޒް ޑިސްޓްރިބިއުޓަރ ނޫން ކުންފުންޏަކުން "ކެމަލް" ބްރޭންޑު ކަމަށް ދައްކައިގެން ގެނައި ސިގިރޭޓުތައް ވިއްކުން މަނާކުރަން އަމުރެއް

"ކެމަލް" ބްރޭންޑު ކަމަށް ދައްކުވައިގެން ރާއްޖެ އެތެރެކޮށްފައިވާ ކައުންޓަފީޓް ކޮށްފައިވާ މުދާ ވިއްކުން ހުއްޓުވުމަށް ސިވިލް ކޯޓުން ވަގުތީ އަމުރެއް ނެރެފިއެވެ.

މި މައްސަލައަކީ ސީޖީޓީ ޕްރައިވެޓް ލިމިޓެޑުގެ ފަރާތުން އެގްޒޮޓިކް އެންޓަޕްރައިޒަސްގެ މައްޗަށް މަދަނީ ކޯޓުގައި ދައުވާކޮށްފައިވާ މައްސަލައެކެވެ.

މި މައްސަލައިގައި ސީޓީޖީގެ ފަރާތުން އެދިފައިވަނީ ސިވިލް ކޯޓަށް ހުށަހެޅިފައިވާ އަސްލު މައްސަލައިގެ ގޮތެއް ނިމެންދެން މި މައްސަލައިގެ ވަގުތީ އަމުރެއް ނެރެދިނުމަށެވެ.

ސީޓީޖީގެ ފަރާތުން އެދުނީ އެގްޒޮޓިކް އެންޓަޕްރައިޒަސްއިން "ކެމަލް" ބްރޭންޑުކަމަށް ދައްކުވައިގެން ރާއްޖެ އެތެރެކޮށްފައިވާ ކައުންޓަފީޓް ކޮށްފައިވާ މުދާ ވިއްކުން ހުއްޓުވުމަށް އެދި އަމުރެއް ނެރެދިނުމަށެވެ.

އަދި "ކެމަލް" ބްރޭންޑުކަމަށް ދައްކުވައިގެން އެ ކުންފުނިން ގެނައި މުދަލުގެ ތެރެއިން މޯލްޑިވްސް ކަސްޓަމްސް ސަރވިސްއިން ކްލިއަރ ނުކުރެވި ހުރި މުދާ ކްލިއަރ ކުރުން މަޑުޖައްސާލުމަށްވެސް ސީޓީޖީގެ ފަރާތުން އެދިފައިވެއެވެ.

ސަބަބަކީ ސީޓީޖީއަކީ ކެމަލް ބްރޭންޑުގެ ސިގިރޭޓާއި ދުންފަތުގެ އުފެއްދުންތަކުގެ އޮތޮރައިޒްޑް ޑިސްޓްރިބިއުޓަރަށް ވެފައި، "ކެމަލް" ބްރޭންޑުކަމަށް ދައްކުވައިގެން ރާއްޖެ އެތެރެކޮށްފައިވާ ކައުންޓަފީޓް ކޮށްފައިވާ މުދަލުގެ ސަބަބުން ކުންފުންޏަށް ކަސްޓަމަރުން ކުރާ އިތުބާރުވެސް ގެއްލިދާނެތީއެވެ.

ސިވިލް ކޯޓުން ވަނީ އެ ކުންފުނިން އެދިފައިވާ ގޮތަށް ވަގުތީ އަމުރެއް ނެރެދީފައެވެ.