ނިހާން އެސްޓީއޯއަށް ދައްކަން ޖެހޭ މިލިއަނެއްހާ ރުފިޔާ ދައްކައިފި
މި މައްސަލައިގައި ހިމެނޭ ހުރިހާ ފައިސާ އެއް ދައްކާފައިވާކަން ނިހާން ވެސް ވަނީ ބައެއް މީޑިއާތަކަށް ޔަޤީންކޮށްދެއްވާފަ
ކުރީގެ މެންބަރު އަހުމަދު ނިހާން ހުސައިން މަނިކު
ރައްޔިތުންގެ މަޖިލީހުގެ އިދާރާގެ ބިއުރޯ ޗީފް އަދި ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަހްމަދު ނިހާން ހުސައިންމަނިކު އެސްޓީއޯއަށް ދައްކަން ޖެހޭ މިލިއަނެއްހާ ރުފިޔާ ދައްކައިފިއެވެ.
ނިހާންގެ މައްޗަށް ފައިސާ ދެއްކުމަށް އަންގާ ކޮށްފައިވާ ހުކުމުގައި ބުނާ ގޮތަށް ފައިސާ ދައްކާފައިވާތީ އެ މައްސަލައިގެ އިސްތިއުނާފް ވަނީ ހައި ކޯޓުން ނަގާފައެވެ.
2019 ވަނަ އަހަރުގެ ޑިސެމްބަރު މަހު ސިވިލް ކޯޓުންކޮށްފައިވާ ހުކުމްގައި ބުނެފައި ވަނީ ނިހާން އެސްޓީއޯއަށް 959،362ރ. ދައްކަން ޖެހޭ ކަމަށެވެ. އޭނާގެ މައްޗަށް އެ ފައިސާ ދެއްކުމަށް ޙުކުމްކޮށްފައި ވަނީ ހާބަރު ފުޑްކޯޓެއް ފަސް އަހަރަށް ކުއްޔަށް ނެންގެވުމަށް ފަހު އެތަނަށް ކުލި ދައްކާފައި ނުވާ މައްސަލަ އާއި ގުޅިގެންނެވެ،
އެ މައްސަލައިގެ ޙުކުމް ކުރީ ނިހާންގެ ޣައިރު ހާޒިރުގައެވެ. އެ ހުކުމްގައި ބުނެފައި ވަނީ އެއީ އެ މައްސަލަ ހުށަހެޅުމާ ހަމައަށް ދައްކަން ޖެހި ނުދައްކާ ހުރި ކުއްޔާއި މެއިންޓެނަންސް ފީގެ އިތުރުން، ފައިސާ ނުދެއްކުމުން އަރާފައިވާ ޖޫރިމަނާ ވެސް ނިހާން ދައްކަން ޖެހޭނެ ކަމަށެވެ.
ހަމައެހެންމެ އެ ފައިސާ ހަ މަސް ދުވަސް ތެރޭ އެސްޓީއޯއަށް ދައްކަންވެސް ވަނީ ޙުކުމްކޮށްފައެވެ. އެ ހުކުމް ހައި ކޯޓުގައި ނިހާން ވަނީ އިސްތިއުނާފްކުރައްވާފައެވެ. އިސްތިއުނާފްގައި ބުނެފައި ވަނީ އެ ހުކުމަކީ ޣައިރު ހާޒިރުގައި ކުރި ހުކުމެއް ކަމަށާއި، ނިހާންގެ ފަރާތުން ހުށަހަޅަން ބޭނުންވާ ބައެއް ހެކިތަކަށް ރިއާޔަތްކުރުމަށް ފުރުސަތު ލިބިފައި ނުވާ ކަމަށެވެ.
އެގޮތުން ނިހާން ހުށަހަޅުއްވަފައިވާ އިސްތިއުނާފުގެ މައްސަލަ ބާތިލްކުރުމަށް ފަހު ހަައިކޯޓުން ވަނީ ބަޔާނެއް ނެރެފައެވެ. ހައިކޯޓުން ނެރެފައިވާ ބަޔާނުގައި ބުނެފައި ވަނީ އެ މައްސަލަ އަނބުރާ ގެންދަން ނިހާން މި މަހުގެ ހަތް ވަނަ ދުވަހު ހައި ކޯޓަށް ސިޓީއެއް ފޮނުވާފައިވާ ކަމަށެވެ.
މީގެ އިތުރުން ސިވިލް ކޯޓުގެ ހުކުމުގައި ބުނާ ފައިސާ ދެއްކުމަށް ސެޓުލްމަންޓް އެގްރީމެންޓެއް ހެދުމަށް ފަހު އެއާއި އެއްގޮތަށް ފައިސާ ދައްކަވާފައިވާ ކަމަށް ވެސް އެ ބަޔާނުގައިވެއެވެ. މި މައްސަލައިގައި ހިމެނޭ ހުރިހާ ފައިސާ އެއް ދައްކާފައިވާކަން ނިހާން ވެސް ވަނީ ބައެއް މީޑިއާތަކަށް ޔަޤީންކޮށްދެއްވާފައެވެ.
