ވިލިމާލެއަށް އޮތީ އަޅާނުލެވި، މޭޔަރުކަމަށް ހޮވިއްޖެނަމަ ބަދަލުތަކެއް ގެންނާނަން - އާޒިމް
ބުޅާ ފެސިލިޓީގެ މަސައްކަތް އިންތިހާބުވާތާ 6 ވަރަކަށް މަސް ދުވަސްތެރޭގައި ނިންމާނަން
އެމްޑީޕީގެ މޭޔަރު ކެންޑިޑޭޓް އާދަމް އާޒިމް
ވިލިމާލެއަށް އޮތީ އަޅާނުލެވި ކަމަށާއި، މޭޔަރުކަމަށް ހޮވިއްޖެނަމަ ވިލިމާލޭގެ ރައްޔިތުން އެދިފައިވާ ކަންކަމުގެ އިތުރުން ޕްލޭންކުރެވިފައިވާ ބަދަލުތައް ގެންނަވާނެކަމަށް އެމްޑީޕީގެ މޭޔަރު ކެންޑިޑޭޓް އާދަމް އާޒިމް ވިދާޅުވެއްޖެއެވެ.
އާސްކް އާޒިމް ޕްރޮގްރާމުގައި ވިލިމާލޭގެ ރައްޔިތަކު ކުރި ސުވާލަކަށް ޖަވާބުދެއްވަމުން އާޒިމް ވިދާޅުވީ ވިލިމާލެ، މާލެ އަދި ހުޅުމާލެއަށް ވެސް އޮތީ އަޅާނުލެވި ކަމަށެވެ. އެގޮތުން ވިލިމާލެއަށް އިސްކަމެއް ދެއްވާނެ ކަމަށާއި، އެތަނަށް ޕްލޭންތަކެއް ހެދިފައިވާ ކަމަށެވެ. ވިލިމާލެ އަކީ ސާފްތާހިރުތަނަކަށް ހަދަންޖެހޭ ކަމަށާއި، ވިލިމާލޭގައި އުޅޭ ބުޅާތަކަށް ވެސް ރަނގަޅު ގޮތެއް ހޯދައިދީ ރައްޔިތުންގެ ޝަކުވާތަކަށް ހައްލު ހޯއްދަވައިދެއްވާނެ ކަމަށެވެ.
އާޒިމް ވިދާޅުވީ ވިލިމާލެ ބަނދަރުތެރޭގައި ހުރި ބޯޓުތަކުގެ މައްސަލައަކީ ވެސް ރައްޔިތުންގެ ޝަކުވާއެއް އޮތްކަމެއް ކަމަށެވެ. އަދި ރައްޔިތުން މައްސަލަ ޖައްސަނީ އެތަނުގައި އެ ހުރެގެން ނޫން ކަމަށާއި، އެތަނުގައި އެ އެއްޗެހި އަޅާފައި ހުންނަ އިރު، ކުރިމަތީގައި ހޮސްޕިޓަލް ހުރެފައި ވައި ޖެހޭއިރު ހޮސްޕިޓަލް ތެރޭގައި ތޮޔޮ ވަސް ދުވުމާއި، ބަލިމީހުންނަށް ވެސް އެތަކެއް ދަތިތަކެއް ދިމާވާތީ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ވިލިމާލޭގައި ވަޒީފާގެ ފުރުސަތު ހުޅުވާލުމަށް ކުދި އިންވެސްޓްމަންޓް ގެންނަން ޖެހޭ ކަމަށެވެ. އަދި އެކަމަށް ބީޗް ސަރަހައްދުގައި މަސައްކަތްތަކެއް ކުރުމަށް ޕްލޭން ރާވާފައިވާ ކަމަށެވެ. އަދި މި މަސައްކަތް ކުރާއިރު، މޫދަށް އެރޭ ސަރަހައްދުގައި ޗޭންޖް ކުރެވޭނެ އިންތިޒާމްތަކާއެކު ހިދުމަތްތައް ގާއިމްކުރައްވާނެ ކަމަށެވެ.
