މާލޭ މޭޔަރަކަށް މުޢިއްޒު ހުންނެވި ދުވަސްވަރު ރޯމަސް މާރުކޭޓު ކުއްޔަށް ދީފައިވަނީ ގާނޫނާ ހިލާފަށް: އާޒިމް

މާލޭގެ މޭޔަރަކަށް މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވި ދުވަސްވަރު، މާލޭ ރޯމަސް މާރުކޭޓް ކުއްޔަށް ދީފައިވަނީ ގާނޫނާ ހިލާފަށް ކަމަށް މާލެ ސިޓީގެ މިހާރުގެ މޭޔަރު އާދަމް އާޒިމް ވިދާޅުވެއްޖެ އެވެ.މިކަން ހާމަވެގެން ދިޔައީ މިދިޔަ ބުދަ ދުވަހު ބޭއްވި މާލޭ ސިޓީ ކައުންސިލްގެ ބައްދަލުވުމުގައި، މިހާރުގެ މޭޔަރު އާދަމް އާޒިމް ދެއްކެވި ވާހަކަފުޅުތަކުންނެވެ. އާޒިމް ވިދާޅުވި ގޮތުގައި ރޯމަސް މާރުކޭޓު ކުއްޔަށް ދޫކޮށްފައިވަނީ ބިޑު ކޮމިޓީން ނިންމި ގޮތާ ހިލާފަށެވެ.މާރުކޭޓު ހަވާލުކޮށްފައިވަނީ ލ. ފޮނަދޫ މީހެއްގެ ނަމުގައި ރަޖިސްޓްރީކޮށްފައިވާ އެފްޖޭ ޑިޒައިން ކިޔާ ކުންފުންޏަކާއެވެ. ބިޑު ކޮމިޓީން ނިންމާފައިވަނީ މަހަކު 130،000 ރުފިޔާއަށް މާރުކޭޓު ކުއްޔަށް ދިނުމަށެވެ. ނަމަވެސް އެއްބަސްވުން ހަދާފައިވަނީ މަހަކު 70،000 ރުފިޔާއަށެވެ.މާލޭ ސިޓީ ކައުންސިލްގެ މެންބަރު މުހައްމަދު ސައިފު ފާތިހު ވިދާޅުވި ގޮތުގައި ބިޑު ކޮމިޓީން ނިންމާފައި އޮއްވައި އެހެން އަގަކަށް މާރުކޭޓު ދޫކުރުމަކީ މާލިއްޔަތު ގާނޫނާ ހިލާފު ކަމެކެވެ.މީގެއިތުރުން، މަސް މާރުކޭޓުގެ ކަރަންޓު ބިލްތައް ވެސް ދައްކާފައި ނުވާކަން މޭޔަރު އާޒިމް ފާހަގަކުރެއްވިއެވެ. މިހާތަނަށް ނުދައްކާ ހުރި ބިލްތަކުގެ އަދަދު 437،000 ރުފިޔާއަށް ވުރެ އިތުރުވެފައިވާ ކަމަށް އޭނާ ވިދާޅުވިއެވެ.މި މައްސަލަތައް ދިމާވެފައިވާތީ، އެއްބަސްވުން މިގޮތަށް ކުރިއަށް ގެންދިއުމަކީ ގާނޫނާ ހިލާފު ކަމެއްކަމަށް މޭޔަރު އާޒިމް ފާހަގަކުރެއްވިއެވެ. އެހެންކަމުން، މި މައްސަލަ މާލޭ ސިޓީ ކައުންސިލުގެ ބިންތަކާބެހޭ ކޮމިޓީގައި މަޝްވަރާކުރުމަށްފަހު، އަންނަ ބުދަ ދުވަހު ބޭއްވޭ ކައުންސިލް ބައްދަލުވުމަށް ހުށަހަޅުއްވާނެ ކަމަށް އޭނާ ވިދާޅުވިއެވެ.ފާހަގަކޮށްލެވޭ ކަމަކީ، މުއިއްޒު މޭޔަރުކަމުގައި ހުންނަވައި ރައީސުލްޖުމްހޫރިއްޔާކަމަށް ވާދަކުރެއްވި އިރު، މާލޭ ރޯމަސް މާރުކޭޓު ތަރައްގީކުރުމަށް ބަޔަކާ ހަވާލުކުރެއްވި ކަމާއި، ރައީސްކަމަށް ހޮވިވަޑައިގަތުމަށްފަހު އެ މަޝްރޫއު ސަރުކާރުގެ ބެލުމުގެ ދަށަށް ބަދަލުކުރެއްވި ކަމެވެ.