ސަރުކާރު އިމާރާތަކުން ބައެއް ވެއްޓި އާއްމުން ނުރައްކަލަށް! ޒިންމާ ވާނީ ކާކުބާ؟
17 އޯގަސްޓު 2025 | އާދީއްތަ 14:58މާލޭގައި ހުރި ބާ އިމާރާތުން ބައެއް ވެއްޓި އާންމުންގެ މުދަލަށް ގެއްލުންވި ނަމަވެސް، އެއްވެސް ފަރާތަކުން ޒިންމާ ނަގާތަނެއް ނުފެނެއެވެ. އާއްމުންގެ ކަންބޮޑުވުންތައް އިންތިހާއެވެ.
މާލޭގައި ހުރި ކުރީގެ އެޑިއުކޭޝަން ޑިވެލޮޕްމަންޓް ސެންޓަރު އިމާރާތުން ބައެއް ވެއްޓި ދެ ސައިކަލާއި ދެ ކާރަށް ގެއްލުން ވެއްޖެ
އެޑިއުކޭޝަން ޑިވެލޮޕްމަންޓް ސެންޓަރު ކުރިން ހިންގި އިމާރާތުން ބައެއް ވެއްޓި ޕާކް ކޮށްފައި ހުރި ވެހިކަލްތަކަކަށް ގެއްލުން ވެފައި
މާލޭގައި ހުރި ބާ އިމާރާތަކުން ބައެއް ވެއްޓި އުޅަނދުތަކަށް ގެއްލުންވި ވާހަކަ އަކީ ހޮނިހިރު ދުވަހު ހުރިހާ މީޑިއާ އަކުން ވެސް ފަލަ ސުރުހީ އިން ފެނުނު ވާހަކައެވެ. ހޮނިހިރު ދުވަހު މާލޭގައި ހުރި ކުރީގެ އެޑިއުކޭޝަން ޑިވެލޮޕްމަންޓް ސެންޓަރު އިމާރާތުން ބައެއް ވެއްޓި، އެ ސަރަހައްދުގައި ޕާކުކޮށްފައި ހުރި އުޅަނދުތަކަށް ގެއްލުންވި ވާހަކަ އިވުމުން އެކަމާއި ކަންބޮޑުވުން ފާޅުނުކުރާ އާއްމު މީހަކު މަދެވެ.
މި ހާދިސާގައި އެތަނާ ޖެހިގެން ހުރި އިމާރާތަކަށާއި، ޕާކުކޮށްފައި ހުރި ދެ ސައިކަލާއި ދެ ކާރަށް ގެއްލުން ލިބިފައިވާ އިރު އެންމެން ވެސް ބުނި އެއް ވާހަކަ އެއް އޮތެވެ. އެއީ އާއްމު މީހަކަށް ގެއްލުން ނުވީ ނަސީބަކަށް ނޫންހޭ ބުނި ވާހަކައެވެ.
ވާނީވެސް އެހެން ނޫން ހެއްޔެވެ. މި ހާދިސާއާ ގުޅޭ މައުލޫމާތު ކަމާ ގުޅުންހުރި އިދާރާތަކާ ހިއްސާކޮށް، މައްސަލަ ބަލަމުންދާ ކަމަށް ފުލުހުން ވަނީ ހާމަކޮށްފައިވާ އިރު ސަރުކާރުގެ ބެލުމުގެ ދަށުގައި ހުރި އިމާރާތަކުން ބައެއް ވެއްޓުމުން ޒިންމާވާނެ ފަރާތެއް ހިލާ ނުވިއެވެ. އާއްމު މީހަކަށް ގެއްލުމެއް ނުލިބި ސަލާމަތްވީ ކިރިޔާއެވެ. އެކަމަކު އެކަން ވެސް ވަރިހަމައެވެ.
މި ހާދިސާއާ ގުޅިގެން މާލޭ ސިޓީ މޭޔަރު އާދަމް އާޒިމް ވިދާޅުވެފައިވަނީ އާންމުންނަށް ނުރައްކާވާ ގޮތަށް ހުންނަ އިމާރާތަކުން ބައެއް ވެއްޓިއްޖެނަމަ، އެތަނުގެ ރަޖިސްޓްރީ އޮންނަ ފަރާތުން އެކަމުގެ ޒިންމާ ނަގަންޖެހޭނެ ކަމަށެވެ. އަދި ބާވެ ހަލާކުވާން ކައިރިވެފައި ހުރި އިމާރާތްތައް ތަޅާނުލާ ބެހެއްޓުމަކީ، ޚާއްސަކޮށް މާލެ ފަދަ މީހުން ބޯދާ ސަރަހައްދެއްގައި ވަރަށް ބޮޑު ނުރައްކަލެއް ކަމަށް އޭނާ ވަނީ ފާހަގަކުރައްވާފައެވެ.
"ރަޖިސްޓްރީ އޮންނަ ފަރާތަކުން އެ ތަނުގެ ރައްކާތެރިކަން ކަށަވަރުކުރަން ޖެހޭނެ. ބާ އިމާރާތްތައް ތަޅާލައި، އެކަމުން އުފެދޭ ކުނިވެސް ސާފުކުރަންވާނެ. މިއީ ހަމައެކަނި ސަރުކާރުގެ އިމާރާތްތަކަށް އެކަންޏެއް ނޫން، އާންމު ފަރާތްތަކުގެ އިމާރާތްތަކަށްވެސް ހިނގާނެ ކަމެއް،" މޭޔަރު އާޒިމް ވިދާޅުވިއެވެ.
އިމާރާތުން ބައެއް ވެއްޓުނު ތަނަކީ އެޑިއުކޭޝަން މިނިސްޓްރީގެ ބެލުމުގެ ދަށުގައިވާ ތަނެކެވެ. ކުރީގައި މި އިމާރާތުގައި ގައުމީ ޔުނިވަރސިޓީގެ ކްލާސްތައް ހިންގި ނަމަވެސް، އިމާރާތުގެ ހާލަތު ގޯސްވުމާ ގުޅިގެން ކްލާސްތައް ހިންގުން ވަނީ ހުއްޓާލާފައެވެ.
މި ހާދިސާއާ ގުޅިގެން އާންމުން ދަނީ ގެއްލުން ލިބުނު އުޅަނދުތަކުގެ ބަދަލު ދޭނީ ކޮން ފަރާތަކުންތޯ އާއްމުން ކުރާ ސުވާލަށް ވެސް ޖަވާބުދޭނެ މީހަކު ހަމަ ނެތީއެވެ. މިފަދަ އެހެން ނުރައްކާތެރި އިމާރާތްތަކާމެދު އަޅާނެ ފިޔަވަޅުތަކާ ގުޅޭގޮތުން ކުރާ ސުވާލަށް ވެސް ދެނީ ބީރު ކަންފަތެކެވެ.
އެކަމަކު މި ހާދިސާ އަށް 24 ގަޑި އިރު ފާއިތުވި އިރު ވެސް ކަމާއި ގުޅުން ހުރި އިދާރާ އަކުން ކަހާތަން ހިރުވާ ވެސް ނުލިއެވެ. އާއްމުންގެ ޝަކުވާތަކަށް ދިނީ ބީރު ކަންފަތެކެވެ. ފަރުވާ ކުޑަކަމުގެ މިފަދަ ކިތަންމެ މިސާލެއް މި ފުރަ މާލެ އިން ވެސް ފެންނަން އެބަހުއްޓެވެ. ބޮލަށް ވެއްޓިދާނެ ކަމުގެ ބިރު އޮތް މިކަހަލަ ކިތަންމެ ތަނެއް އެބަ ހުއްޓެވެ. އަނެއްކާވެސް ތެޅިގަންނާނީ އެތަނުން މީހަކަށް ގެއްލުމެއްވުމުންބާވައޭ އަޅުގަނޑުގެ ހިތަށް އަރައެވެ.
