އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން ވެސް ބަލިވެ، ޗެލްސީ ޕްރެޝަރަށް ވެއްޓިއްޖެ އެވެ.
މި ސީޒަންގެ ލީގުގައި ވެސް ޗެލްސީގެ ނަތީޖާތައް ދަށްވެފައިވާއިރު، އާދިއްތަ ދުވަހުގެ ރޭ ވުލްވްސްގެ ދަނޑުގައި އެ ޓީމާ ދެކޮޅަށް ކުޅުނު މެޗުން ޗެލްސީ ބަލިވީ 2-1 އިންނެވެ. މިއީ މި ސީޒަންގެ ޕްރިމިއާ ލީގުގައި ޗެލްސީގެ އަށް ވަނަ ބައްޔެވެ.
މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައި ނުވާއިރު، ލަނޑުތައް ފެނުނީ ދެ ވަނަ ހާފުގަ އެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ވުލްވްސް އިންނެވެ. ދެ ވަނަ ހާފު ފަށައިގެން ހަ ވަނަ މިނެޓުގައި އެ ޓީމަށް ލީޑު ނަގައިދިނީ މާރިއޯ ލެމިނާ އެވެ. އޭނާ އެ ލަނޑު ޖެހީ ޕަބްލޯ ސަރަބިއާ ތަނަވަސް ކޮށްދިން ފުރުސަތެއްގަ އެވެ. ވުލްވްސް އިން އެ ޓީމުގެ ދެ ވަނަ ލަނޑު ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގެ ތެރޭގަ އެވެ. އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ މެޓް ދޮހާޓީ އެވެ. މެޗުގައި ޗެލްސީގެ ހަމައެކަނި ލަނޑު އިތުރު ވަގުތުގައި ޖެހީ ކްރިސްޓޮފާ އެންކުންކޫ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ރަހީމް ސްޓާލިން އެވެ.
ބައްޔާއެކު ޗެލްސީ އޮތީ ލީގު ތާވަލްގެ 10 ވަނަ މަގާމުގަ އެވެ. އެއީ މިހާތަނަށް ކުޅުނު 18 މެޗުން 22 ޕޮއިންޓާއެކު އެވެ. ލީގުގައި ދެން ޗެލްސީ އަށް އޮންނާނީ އަމިއްލަ ދަނޑުގަައި ކްރިސްޓަލް ޕެލެސްއާ ދެކޮޅަށް ކުޅޭ މެޗެވެ.
