ޕޮލިސް ކޮމިޝަނަރުގެ މަގާމަށް އެސިސްޓެންޓް ޕޮލިސް ކޮމިޝަނަރު އަލީ ޝުޖާއު އައްޔަންކުރަން ފެންނަ ކަމަށް ޕޮލިސް ބޯޑުން ލަފާ ދީފިއެވެ.
ޕޮލިސް ކޮމިޝަނަރު ކަމަށް ކުރިމަތިލާން ހުޅުވާލި ފުރުސަތު މި މަހު 19 ވަނަ ދުވަހު ހަމަވިއިރު، އެ މަގާމަށް ހުށަހެޅުއްވީ ޝުޖާއުގެ އިތުރުން އެސިސްޓެންޓު ޕޮލިސް ކޮމިޝަނަރު އިސްމާއީލް ނަވީންއެވެ.
ހޯމްލޭންޑު ސެކިއުރިޓީ މިނިސްޓަރު އަލީ އިހްސާން ވަނީ ކޮމިޝަނަރަކަށް ޝުޖާއު އައްޔަންކުރަން ޕޮލިސް ބޯޑުން ލަފާ ދިންކަން ރާއްޖެއެމްވީއަށް ކަށަވަރުކޮށްދެއްވާފައެވެ.
ކޮމިޝަނަރު އައްޔަން ކުރާނީ ޕޮލިސް ބޯޑުން ވަޒަންކޮށް މިނިސްޓަރަށް ހުށަހަޅާ ނަންތަކުގެ ތެރެއިން މިނިސްޓަރުގެ ލަފާގެ މަތިން ރައީސުލްޖުމްހޫރިއްޔާއެވެ.
ޕޮލިސް ކޮމިޝަނަރުގެ މަގާމަށް ބޭފުޅަކު އައްޔަންކުރަން ހުޅުވާލީ އެ މަގާމުގައި ކުރިން ހުންނެވި މުޙައްމަދު ހަމީދު ނޮވެމްބަރު 15 ގައި ރިޓަޔަރ ކުރެއްވުމާ ގުޅިގެންނެވެ. އެ މަގާމާ ވަގުތީގޮތުން ހަވާލުވެ ހުންނެވި ޑެޕިއުޓީ ކޮމިޝަނަރު އަބްދުލް މަންނާނު ޔޫސުފް ވެސް ވަނީ ރިޓަޔަރ ކުރައްވާފައެވެ.
ފުލުހުންގެ ހިދުމަތުގެ ގާނޫނުގައިވާ ގޮތުން ޕޮލިސް ކޮމިޝަނަރު ކަމަށް އައްޔަންކުރަންޖެހޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ.
