ދިވެހި ފުލުހުންގެ ޚިދުމަތުގެ ޤާނޫނުގެ ދަށުން އެކުލަވައިލާފައިވާ ޕޮލިސް ބޯޑު މެމްބަރު ކަމަށް ކުރީގެ ކޮމިޝަނަރ އޮފް ޕޮލިސް އަޙްމަދު ފަސީހް އައްޔަން ކޮށްފިއެވެ.
ޕޮލިސް ބޯޑަށް ފަސީހު އައްޔަން ކުރީ އެ ބޯޑުގެ ރައީސްގެ މަގާމުގައި ކުރިން ހުންނެވި އަލީ ފާއިޒު، ސްރީލަންކާއަށް ރާއްޖޭން ކަނޑައަޅުއްވާ ސަފީރުކަމުގެ މަގާމަށް އައްޔަން ކުރެއްވުމާ ގުޅިގެންނެވެ. އެ ބޯޑުގެ ރައީސްގެ މަގާމު އަދިވެސް އޮތީ ހުސްކޮށެވެ.
ބޯޑަށް ފަސީހް އައްޔަންކޮށްފައިވާއިރު އޭނާ ވަނީ ކޮމިޝަނަރ އޮފް ޕޮލިސްގެ މަގާމާއި އެމްޓީސީސީގެ ޑެޕިއުޓީ ސީއީއޯގެ މަގާމު ވެސް މީގެ ކުރިން އަދާ ކުރައްވާފައެވެ. އޭނާ ވަނީ ފުލުހުންގެ ޚިދުމަތަށް 23 އަހަރު ޙިދުމަތް ކުރައްވާފައެވެ. އެ ޚިދުމަތުން އޭނާ ރިޓަޔަރ ކުރެއްވީ 2012 ވަނަ އަހަރުއެވެ.
ޕޮލިސް ބޯޑަކީ ފުލުހުންގެ ޚިދުމަތުގެ ކަންކަން ރަނގަޅު ކުރުމަށް ފުލުހުންގެ ޚިދުމަތުގެ ޤާނޫނަށް ގެނައި އިސްލާހާއެކު 2021 ވަނަ އަހަރު ރައީސުލްޖުމްހޫރިއްުޔާ އިބްރާހިމް މުޙައްމަދު ޞާލިހު އެކުލަވައިލެއްވި ބޯޑެކެވެ. އެ ބޯޑުގައި ހަތް މެމްބަރު ތިއްބަވައެވެ.
އެއީ:
- އަހުމަދު ފަޔާޒު ހަސަން
- އާއިޝަތު ނޫރާ މުޙައްމަދު
- އަހުމަދު ނާޝިދު
- އާދަމް އިބްރާހިމް
- ހާމިދުު އަބްދުލްޣަފޫރު
- ސަފާ ޝަރީފް
- އަހުމަދު ފަސީހު
ފުލުހުންގެ ބޯޑުގައި ހިމެނޭ ހަތް މެމްބަރުންގެ ތެރެއިން ދެ މެމްބަރުނަކީ ރައީސް އައްޔަން ކުރައްވާ ދެ މެމްބަރުންނެވެ. އޭގެ އިތުރުން ފަންނީ ދާއިރާއިން ތައުލީމާއި ތަޖުރިބާ ލިބިފައިވާ ތިން މެމްބަރުންނާއި އާއްމުންގެ ތެރެއިން ދެ މެމްބަރަކު މި ބޯޑުގައި ހިމެނެއެވެ.
