އިސްރާއީލުގެ ނިރުބަވެރިން ދެމުންދާ އިންސާނިއްޔަތާ ޚިލާފު ހަމަލާތަކުގެ ސަބަބުން ހަފުސްވެފައިވާ ފަލަސްތީނުގެ ޣައްޒާއަށް އިންސާނީ އެހީ ފޯރުކޮށްދިނުމަށް ގޮވާލައި، އދ.ގެ ސެކިއުރިޓީ ކައުންސިލުން ގަރާރެއް ފާސްކޮށްފިއެވެ.

މުސްލިމް ގިނަ ގައުމުތަކެއްގެ ބައިވެރިވުމާއެކު، ޔުނައިޓެޑް އަރަބް އެމިރޭޓްސް (ޔޫއޭއީ)ން އދ.ގެ ސެކިއުރިޓީ ކައުންސިލަށް ހުށަހެޅި ގަރާރު ފާސްކޮށްފައިވަނީ 13 ގައުމެއްގެ ވޯޓާއެކުގައެވެ. މި ގަރާރަށް ވޯޓަށް އެހުމުން، އެމެރިކާއާއި ރަޝިއާއިން ވަކި ގޮތަކަށް ވޯޓު ދީފައެއް ނުވެއެވެ. މި ގަރާރު ފާސްކުރަން ވޯޓު ދޭނެ ކަމަށް އެމެރިކާއިން ކުރިން ބުނެފައިވެއެވެ. މި ގަރާރު ފާސްކުރުމާ ދެކޮޅަށް އެއްވެސް ގައުމަކުން ވޯޓު ދީފައެއްނުވެއެވެ.

މި ގަރާރު ފާސްކުރަން އެމެރިކާއިން ވޯޓު ނުދޭއިރު، އދ.ން ފާސްކޮށްފައި މި ވަނީ ޔޫއޭއީން ފުރަތަމަ އެކުލަވާލި ގަރާރެއް ނޫނެވެ. އެމެރިކާގެ ފިއްތުންތަކާއި ޕްރެޝަރާހެދި އެ ގަރާރަށް ވަނީ ބޮޑެތި ބަދަލުތަކެއް ގެނެސްފައެވެ. ޔޫއޭއީން އެންމެ ފުރަތަމަ ހުށަހެޅި ގަރާރުގައި ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ އުދުވާންތައް ހުއްޓާލުމަށް ގޮވާލައި، އެކަމުގެ ވާހަކަތައްވެސް ހިމަނާފައެވެ. އެކަމަކު، ގަރާރު ފާސްކުރިއިރު އެ ބައެއް ނެތެވެ.

ގަރާރުގައި ގޮވާލާފައިވަނީ، އިސްރާއީލާ ފަލަސްތީނާ ދެމެދު ކުރިއަށްދާ ހަނގުރާމަ ހުއްޓާލުމަށް މަސައްކަތް ކުރެވޭނެ މާހައުލެއް ގާއިމުކުރުމަށެވެ.

ނިރުބަވެރި އިސްރާއީލުން ފަލަސްތީނުގެ ޣައްޒާއަށް ދެމުންދާ ހަމަލާތަކުގައި، މިހާތަނަށް އައިއިރު 20،057 މީހުން ޝަހީދުކޮށްލާފައިވެއެވެ. ޝަހީދުވި މީހުންގެ ގާތްގަނޑަކަށް 70 އިންސައްތައަކީ އަންހެނުންނާއި ކުޑަކުދިން ކަމަށް އދ.ން ވަނީ ރިޕޯޓްކޮށްފައެވެ. އަދި ހަމަލާތަކުގެ ސަބަބުން 53،320 މީހުންނަށް އެކި ވަރުގެ އަނިޔާތައް ވެފައިވާކަމަށްވެސް ރިޕޯޓްކޮށްފައިވެއެވެ.

އިސްރާއީލާ ހަމާސްއާ ދެމެދު ކުރިއަށްދާ ހަނގުރާމަ ހުއްޓާލުމާގުޅޭ މަޝްވަރާތަކަށް ހަމާސްގެ ލީޑަރު އިސްމާއީލް ހަނިއްޔާ ވަނީ މިދިޔަ ބުދަ ދުވަހު މިސްރަށް ވަޑައިގެންފައެވެ. އަދި އިސްލާމިކް ޖިހާދުގެ ވަފުދެއްވެސް މިއަދު މިސްރަށް ވަޑައިގަންނަވާގޮތަށް ވަނީ ހަމަޖެހިފައެވެ.

އެމެރިކާއިން މި ގަރާރަށް އެއްވެސް ކޮޅަކަށް ވޯޓުދީފައި ނުވާއިރު، އެމެރިކާގެ ރައީސް ޖޯ ބައިޑެން ތަކުރާރުކޮށް ވިދާޅުވަމުން ގެންދެވީ އިސްރާއީލުގެ ހަމަލާތައް ޣައްޒާއަށް ދިންނަމަވެސް އާންމު ރައްުޔިތުންނަށް މަރައިގެން ނުވާނެކަމަށެވެ. އަދި ހަމާސް ނައްތާލުމަކީ އިސްރާއީލަށް އޮތް ހައްގެއްކަމަށް ބައިޑެން ވަނީ ވިދާޅުވެފައެވެ.