މެންޗެސްޓަރ ސިޓީން މިއަހަރުގެ ފީފާ ކުލަބު ވޯލްޑް ކަޕް ކާމިޔާބު ކުރުމުން، އޭނާ އަށް ޚާއްސަ އުފަލެއް ލިބުނު ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ސްޕެއިންގެ ތަޖުރިބާކާރު ކޯޗު، ގާޑިއޯލާގެ އިރުޝާދުގެ ދަށުން ސިޓީން ވަނީ ހުކުރު ދުވަހުގެ ރޭ ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ. މިއީ ސިޓީގެ ތާރީޚުގައި ވެސް އެ ޓީމަށް ކުލަބު ވޯލްޑް ކަޕް ކާމިޔާބު ކުރެވުނު ފުރަތަމަ ފަހަރެވެ. އަނެއްކޮޅުން، ކުލަބު ވޯލްޑް ކަޕްގެ ތައްޓާއެކު ސިޓީ ވެގެން ގޮސްފައި ވަނީ، ކަލަންޑަރު އަަހަރެއްގައި ފަސް ތަށި ހޯދި އިނގިރޭސި ފުރަތަމަ ޓީމަށެވެ.

އެ މެޗަށް ފަހު ވާހަކަ ދައްކަމުން ގާޑިއޯލާ ބުނީ، އެ ކާމިޔާބީ އާއެކު އޭނާ އަށް ކުރެވުނީ ޗެޕްޓަރެއް ބަންދު ކުރެވުނު އިޙުސާސް ކަމަށެވެ. ގާޑިއޯލާ ބުނީ، ސިޓީ އަށް ހުރިހާ ތައްޓެއް ކާމިޔާބު ކުރެވިއްޖެ ކަމަށާއި، އޭގެ ތެރެއިން ބައެއް ތަށިތައް ޖެހިޖެހިގެން ކާމިޔާބު ކޮށްފައިވާ ކަމަށެވެ. އެހެންކަމުން މަސައްކަތް ކާމިޔާބު ވެއްޖެ ކަމަށާއި، އިތުރަށް ދެން ކުރަން ޖެހޭނެ މަސައްކަތެއް ކުރަން ނެތް ކަމުގެ އިޙުސާސް ކުރެވޭ ކަމަށް ވެސް ގާޑިއޯލާ ވަނީ ބުނެފަ އެވެ.

މީގެ އިތުރުން ގާޑިއޯލާ ބުނީ، ކުލަބު ވޯލްޑް ކަޕްގެ ތައްޓާއެކު ސިޓީ އަށް ޕެރޭޑެއް ނުބޭއްވިދާނެ ކަމަށެވެ. އެހެން ނަމަވެސް، އެ ތައްޓަކީ ތާއަބަދަށް ހަނދާން ހުންނާނެ ތައްޓެއް ކަމުގައި ކުޅުންތެރިން ގާތުގައި ވެސް ބުނެފައިވާނެ ކަމަށް އޭނާ ބުންޏެވެ. އޭނާ ބުނީ، އެ ތަށި ހޯދޭނީ އެ އަހަރުގެ އެންމެ މޮޅު ކުލަބަށް ކަމަށާއި، ސިޓީ އަށް ފުރިހަމަ އަށް އެކަން ހާސިލް ކުރެވިއްޖެ ކަމަށެވެ. އެހެންކަމުން އެއީ ވަރަށް ޚާއްސަ، އަދި ތަފާތު ކާމިޔާބީއެއް ކަމަށް ވެސް އޭނާ ވަނީ ފާހަގަކޮށްފަ އެވެ.

އުމުރުން 52 އަހަރުގެ ގާޑިއޯލާ، ސިޓީގެ ކޯޗުކަމާ ހަވާލުވީ 2016 ވަނަ އަހަރު އެވެ. އޭގެ ފަހުން މިހާތަނަށް އޭނާ ވަނީ ސިޓީ އާއެކު 15 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު ފަސް ފަހަރު ކާމިޔާބު ކުރުން ހިމެނެ އެވެ. ސިޓީގެ ތާރީޚުގައި ވެސް އެ ޓީމުން ފުރަތަމަ ފަހަރަށް ޔުއެފާ ޗެމްޕިއަންސް ލީގު ވެސް ކާމިޔާބު ކުރީ ގާޑިއޯލާގެ އިރުޝާދުގެ ދަށުންނެވެ.