އަމާޒަކީ އިންޓަ މިއާމީއާއެކު ގިނަ ތަށިތަކެއް ކާމިޔާބުކުރުން ކަމަށް، އުރުގުއޭގެ ފޯވާޑް ލުއިސް ސުއަރޭޒް ބުނެފިއެވެ.

ސުއަރޭޒް މިހެން ބުނީ، މޭޖާ ލީގު ސޮކާ (އެމެރިކާ ލީގު)ގެ އިންޓަ މިއާމީއަށް ސޮއިކުރުމަށްފަހު ދިން އިންޓަވިއުއެއްގައެވެ. އޭނާ ބުނީ، މިއާމީއަށް ބަދަލުވެވުމަކީ ވަރަށް އުފާވާ ކަމެއް ކަމަށާއި، އެއީ އޭނާއަށް ލިބުނު ހިތްހަމަޖެހުމެއް ކަމަށެވެ. އުމުރުން 36 އަހަރުގެ ސުއަރޭޒް ފާހަގަކުރިގޮތުގައި މިއީ އޭނާގެ ކެރިއަރުގައި އަނެއްކާ ވެސް ކުރިމަތިލާ އައު ޗެލެންޖެކެވެ. ސުއަރޭޒް ހުރީ އެ ޗެލެންޖުގެ ބޭނުން އެންމެ ފުރިހަމަ ގޮތުގައި ހިފައިގެން، ހިތްވަރާއެކު ކުރިއަށް ދިޔުމުގެ އަމާޒުގައެވެ.

މީގެއިތުރުން އޭނާ ބުނީ، މިއާމީގައި ކުޅެން މިހާރުވެސް ކެތްމަދުވެފައި ހުރި ކަމަށެވެ. ސުއަރޭޒް ބުނިގޮތުގައި މިއާމީއަކީ މިހާރު ވަރުގަދަ ކުލަބެކެވެ. އެގޮތުން އެ ކުލަބުންވެސް އައު ކުޅުންތެރިން ހޯދައި، އިތުރު ހަރުފަތަކަށް ކުރިއަށްދާން މަސައްކަތް ކުރާކަން އޭނާ ފާހަގަކުރިއެވެ. އެހެންކަމުން، މިއާމީއާއެކު ގިނަ ތަށިތަކެއް ކާމިޔާބުކޮށް، އެންމެ ފުރިހަމަ ކާމިޔާބީއަށް ވާސިލްވާން ބޭނުންވާކަމަށް އޭނާ ވަނީ ބުނެފައެވެ.

މިއީ ސުއަރޭޒް، އޭނާގެ ކެރިއަރުގައި ކުޅޭނެ ނުވަވަނަ ކުލަބެވެ. އުރުގުއޭގެ ނަސިއޯނަލްއިން ސީނިއަރ ކެރިއަރު ފެށި ސުއަރޭޒް ވަނީ، ޔޫރަޕުގެ ބޮޑެތި ކުލަބުތަކަށް ކުޅެ، ގިނަ ކާމިޔާބީތަކެއް ވެސް ހޯދާފައެވެ. އޭނާ ވަނީ ނެދަލެންޑްސްގެ އަޔެކްސްގެ އިތުރުން، އިނގިރޭސި ޕްރިމިއަރ ލީގުގެ ލިވަޕޫލް، ސްޕެއިންގެ ބާސެލޯނާ އަދި އެތުލެޓިކޯ މެޑްރިޑަށްވެސް ކުޅެފައެވެ. ސުއަރޭޒް ވަނީ ޔޫރަޕުގެ އެންމެ ގިނަ ލަނޑު ޖެހި ކުޅުންތެރިޔާއަށް ދޭ ރަން ބޫޓު ވެސް ހާސިލްކޮށްފައެވެ.