ތާވަލުގެ އެއްވަނައަށް ޖެހިލަން ލިބުނު ފުރުސަތު އެސްޓަން ވިލާއަށް ބޭނުމެއް ނުކުރެވުނު

އިނގިރޭސި ޕްރިމިއަރ ލީގު ތާވަލުގެ އެއްވަނައަށް ޖެހިލަން ލިބުނު ފުރުސަތު އެސްޓަން ވިލާއިން ނަގާލައިފިއެވެ.

ރެލިގޭޝަންގައި އޮތް ޝެފީލްޑް ޔުނައިޓެޑް ބަލިކޮށްގެން އެއްވަނައަށް ޖެހިލަން އޮތް ފަސޭހަ ފުރުސަތު ގެއްލުނީ މެޗުން މޮޅުނުވެވި އެއްވަރު ވުމުންނެވެ. މެޗުގައި އެސްޓަން ވިލާއަށް ޕޮއިންޓެއްވެސް ހޯދުނީ ބަދަލަކަށް ނުކުމެ, އިތުރު ވަގުތުގައި ނިކޮލޯ ޒަނިއޯލޯ ޖެހި ލަނޑުންނެވެ. އޭގެ ކުރިން މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައިވަނިކޮށް, ޝެފީލްޑް ޔުނައިޓެޑްގެ އާޗާ ލަނޑު ޖަހައި ކުރިހޯދިއެވެ. މެޗު އެއްވަރުވީ 1-1ންނެވެ.

މެޗުން ލިބުނު އެއް ޕޮއިންޓާއެކު އެސްޓަން ވިލާ ވަނީ ތާވަލުގެ ދެވަނައަށް ޖެހިލާފައެވެ. އެއީ އެހެން ޓީމުތަކަށްވުރެ އިތުރަށް މެޗެއް ކުޅެ, ތިންވަނާގައި އޮތް ލިވަޕޫލްގެ މައްޗަށް ޕޮއިންޓެއްގެ ލީޑް ހޯދައިގެންނެވެ. އެއްވަނާގައި އޮތް އާސެނަލްއާ ޕޮއިންޓުގެ ގޮތުން ވަނީ ހަމަކޮށްފައެވެ. މިސީޒަނުގައި އާދަޔާ ޚިލާފު ރަނގަޅު ނަތީޖާތަކެއް ނެރެމުން އަންނަ އެސްޓަން ވިލާ މިހާރު އޮތް މަގާމަކީ ސީޒަނުގެ މިހާހިސާބުން، މިދިޔަ 25 އަހަރުވެސް އެޓީމަށް އޮވެވުނު އެންމެ ރަނގަޅު މަގާމެވެ.