ދުނިޔޭގެ ޗެމްޕިއަން ކުލަބުތަކުގެ މެދުގައި ބާއްވާ ކްލަބް ވޯލްޑްކަޕް ފުޓްބޯޅަ މުބާރާތް ފުރަތަމަ ފަހަރަށް މެންޗެސްޓާ ސިޓީން ކާމިޔާބުކޮށްފި އެވެ.

ސައުދީ އަރަބިއާގައި ކުޅުނު ފައިނަލް މެޗުގައި ސިޓީ މޮޅުވީ ބްރެޒިލްގެ ފުލުމިނޭޒީ އަތުން 4-0އިންނެވެ. އެންމެ އިސް ފޯވަޑް އާލިން ހާލަންޑާއި ކެޕްޓަން ކެވިން ޑެބްރޫނޭ އަށް މެޗަށް ނުކުތުމަށް ގަވާއިދު ތަން ނުދިނުމުން އެކުޅުންތެރިން ނުލައި ކުޅުނު މެޗުގައި އާޖެންޓީނާގެ ފޯވަޑް ހޫލިއަން އަލްވަރާޒް ފުރަތަމަ މިނިޓާއި 88 ވަނަ މިނިޓްގައި ގޯލު ޖެހި އެވެ. އަނެއް ދެ ގޯލުގެ ތެރެއިން ޖެހީ ފިލް ފޮޑެން ދެ ވަނަ ގޯލު ޖެހިއިރު ސިޓީގެ ތިން ވަނަ ގޯލަކީ ފުލުމިނޭޒީގެ މޮޓާ ފިލޯ އަތުން ބައިކޮޅަށް ވަން ލަނޑެކެވެ.

މި މުބާރާތުގެ މޮޅު ކުޅުންތެރިއަކަށް ހޮވި، ރަންބޯޅަ ލިބުނީ ސިޓީގެ ސްޕޭން މިޑްފީލްޑަރު ރޮޑްރީ އެވެ. ރިހި ބޯޅަ ލިބުނީ ސިޓީގެ ކެޕްޓަން ކޭލްވޯކާ އަށެވެ. ރަންވަންލޯ ބޯޅަ ލިބުނީ ފުލުމިނޭޒީގެ ޖޯން އަރިއާސް އަށެވެ.

މިއީ ސިޓީ އަށް ވަރަށް ތާރީހީ ކާމިޔާބީ އެކެވެ. އެ ޓީމު ވަނީ ޕެޕް ގާޑިއޯލާގެ އިރުޝާދުގެ ދަށުން މި އަހަރު އިނގިރޭސި ޕްރެމިއާ ލީގާއި އެފްއޭކަޕާއި ޔޫރަޕިއަން ޗެމްޕިއަންސް ލީގާއި ޔޫރަޕިއަން ސުޕަކަޕް ވެސް ކާމިޔާބުކޮށްފަ އެވެ. އަދި މިއީ 2015 ވަނަ އަހަރު ސިޓީއާ ހަވާލުވުމަށް ފަހު ގާޑިއޯލާ ކާމިޔާބުކުރި 16 ވަނަ ތައްޓެވެ.

މެޗަށް ފަހު ފޯޑެން ބުނީ ފުލުމިނޭޒީ ކުޅުނީ ވަރަށް ކުރު ޕާސްތަކަކާއެކު މޮޅު ކުޅުމެއް ކަމަށާއި ހަތަރު ގޯލު ޖެހުނަސް މެޗަކީ ފަސޭހަ މެޗެއްނޫން ކަމަށެވެ.