ރޮބާޓޯގެ ދެ ލަނޑުން ބާސެލޯނާ އަށް މޮޅެއް

ސްޕެނިޝް ލީގުގައި އަލްމޭރިއާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

ބުދަ ދުވަހުގެ ރޭ ކުޅުނު މެޗުން ބާސެލޯނާ ހޯދުނީ އުނދަގޫ މޮޅެކެވެ. ނަތީޖާތައް ދަށްވެފައިވާ ބާސެލޯނާ އިން އަލްމޭރިއާގެ މައްޗަށް ކުރި ހޯދީ 3-2 އިންނެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ބާސެލޯނާ އިންނެވެ. މެޗުގެ 33 ވަނަ މިނެޓުގައި އެ ޓީމަށް ލީޑު ނަގައިދިނީ ރަފީނިއާ އެވެ. ނަމަވެސް ފުރަތަމަ ހާފު ނިމުމުގެ ކުރިން އަލްމޭރިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ސާޖިއޯ އަރިބާސް ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ ލިއޯ ބަޕްޓިސްޓާއޯ އެވެ. ދެ ވަނަ ހާފުގައި ބާސެލޯނާ އިން ދެ ވަނަ ފަހަރަށް ލީޑު ނެގި އެވެ. ރަފީނިއާ ތަނަވަސްކޮށްދިން ފުރުސަތެއްގައި 60 ވަނަ މިނެޓުގައި އެ ލަނޑު ޖެހީ ސާޖީ ރޮބާޓޯ އެވެ. ނަމަވެސް 11 މިނެޓު ފަހުން އަލްމޭރިއާ އަށް ދެ ވަނަ ފަހަރަށް ނަތީޖާ ހަމަހަމަ ކޮށްދިނީ އެޑްގާ ގޮންޒާލޭޒް އެވެ. މެޗުން ބާސެލޯނާ މޮޅުކޮށްދިނީ 83 ވަނަ މިނެޓުގައި ރޮބާޓޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޕޮލެންޑުގެ ފޯވާޑް ރޮބާޓް ލެވަންޑޯސްކީ އެވެ.

މޮޅާއެކު ވެސް ބާސެލޯނާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު 18 މެޗުން 38 ޕޮއިންޓު ހޯދައިގެންނެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަނައިގައި ރެއާލް މެޑްރިޑަށް ލިބެނީ 42 ޕޮއިންޓެވެ. އެއް ވަނައިގައި ޖިރޯނާ އަށް ލިބެނީ 44 ޕޮއިންޓެވެ.