ޗެލްސީއަށް ކުޅެމުން އަންނަ ސްޕެއިންގެ ފޯވާޑް ޑިއެގޯ ކޯސްޓާއާ މަޝްވަރާކުރިކަން އޭސީ މިލާނުން ކަށަވަރުކޮށްދީފި އެވެ.

ސްކައި ސްޕޯޓްސް އަށް ދިން އިންޓަވިއުއެއްގައި އޭސީ މިލާނުންގެ ސީއީއޯ މާކޯ ފޮސޮން ވިދާޅުވީ، އެހެން ކްލަބްތަކުގެ ކުޅުންތެރިންނާ ވާހަކަދެއްކުން ވީހާވެސް މަދުކުރެވޭތޯ މަސައްކަތްކުރާ ކަމަށާއި، އެހެންނަމަވެސް އޭނާ ދެކޭގޮތުގައި ކޯސްޓާ އަކީ ވަރަށް ހުނަރުވެރި މޮޅު ކުޅުންތެރިޔެއް ކަމަށެވެ.

އެގޮތުން މާކޯ ވިދާޅުވީ، ކޯސްޓާގެ އެޖެންޓާ ބައްދަލުކުރި ކަމަށާއި، ކޯސްޓާއާ ބެހޭގޮތުން ވާހަކަތަކެއް ދެކެވިފައިވާ ކަމަށެވެ. އެހެންނަމަވެސް އޭނާއަކީ އަދިވެސް ޗެލްސީގެ ކުޅުންތެރިޔެއް ކަމަށް އޭނާ ވަނީ ވިދާޅުވެފައެވެ.

ކުރިޔަށް އޮތް ސީޒަނަށް ތައްޔާރުވުމުގެ ގޮތުން އޭސީ މިލާނުން ވަނީ މިހާތަނަށް 10 ކުޅުންތެރިންގެ ސޮއި ހޯދާފައެވެ. އޭގެ ތެރޭގައި ޔުވަންޓަސްގެ ޑިފެންޑަރު ލިއޮނާޑޯ ބޮނުޗީ އަދި ޕޯޗުގަލްގެ އެންޑްރޭ ސިލްވާ ހިމެނެއެވެ.

ޗެލްސީން ކުރިޔަށް ގެންދާ ފަރިތަކުރުންތަކުގައި ކޯސްޓާ ބައިވެރިނުވާއިރު، ރިޕޯޓްތައް ބުނާގޮތުން ކުރިޔަށް އޮތް ސީޒަނަށް ކޯސްޓާ ޗެލްސީ ދޫކޮށް އެހެން ކްލަބަކަށް ބަދަލުވާނެއެވެ. އެގޮތުން އޭނާ އަންނަނީ ކްލަބްތަކާ މަޝްވަރާ ކުރަމުން ކަމަށާއި، ރަނގަޅު ހުށަހެޅުމެއް ހުށަހަޅާ ކްލަބަކަށް ބަދަލުވާންވެސް ކޯސްޓާ ހުރީ ތައްޔާރަށް ކަމަށް ރިޕޯޓްތައް ބުނެއެވެ

ރިޕޯޓްތައް ބުނާ ގޮތުން ކުރިޔަށް އޮތް ސީޒަނުގައި ޗެލްސީގެ ކޯޗު އެންޓޯނިއޯ ކޮންޓޭ ގެންގުޅޭ ގޭމް ޕްލޭނަށް ކޯސްޓާ ނުފެތެއެވެ. އެގޮތުން ކޮންޓޭ ވަނީ ކޯސްޓާ ދޫކޮށްލަން ނިންމާފައި ކަމަށް ވެސް ރިޕޯޓްތައް ބުނެއެވެ.

އެޓްލެޓިކޯ މެޑްރިޑް ދޫކޮށްލުމަށްފަހު 2014 ވަނަ އަހަރު ޗެލްސީއާ ގުޅުނު ކޯސްޓާ ވަނީ މިވީތަނަށް އެޓީމަށް ކުޅުނު 119 މެޗުގައި 58 ލަނޑު ކާމިޔާބުކޮށް، އެޓީމާއެކު ޕްރިމިއާ ލީގު ދެފަހަރު އަދި ލީގް ކަޕް އެއްފަހަރު ކާމިޔާބުކޮށްފައެވެ.