މެންބަރު ޝިފާއުއަށް މަރުގެ އިންޒާރުދިން މައްސަލަ ބަލަމުންދާ ކޮމިޓީ ސިއްރު
މެންބަރު ޝިފާއުއަށް މަރުގެ އިންޒާރު ދީފައިވަނީ އާއްމުންގެ މީހަކު ފޭސްބުކުގައި ކުރި ޕޯސްޓެއްގައި
އިހަވަންދޫ ދާއިރާގެ މެންބަރު މުޙައްމަދު ޝިފާއު
އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރު ދިން މައްސަލަ ބެލުމަށް ބޭއްވި އިމްތިޔާޒާއި ސްލޫކް ކޮމިޓި ސިއްރުކޮށްފިއެވެ.
މަޖިލީހުން ވަނީ މެންބަރަށް މަރުގެ އިންޒާރު ދިން މައްސަލައިގައި އެކްޓިންގް ކޮމިޝަނަރ އޮފް ޕޮލިސް، އެސިސްޓެންޓް ކޮމިޝަނަރ ފަރުހާދު ފިކުރީ އަދި ޑިފެންސް މިނިސްޓަރު މުހައްމަދު ޣައްސާން މައުމޫނަށް ވެސް ސިޓީއެއް ފޮނުއްވާފައެވެ. ފުލުހުންނަށް ސިޓީ ފޮނުވީ މައްސަލަ ބަލައިދިނުމަށެވެ. އަދި ޑިފެންސް މިނިސްޓަރަށް ސިޓީ ފޮނުވީ ސެކިއުރިޓީ ފޯރުކޮށްދިނުމަށެވެ.
އިމްތިޔާޒާއި ސްކޫލް ކޮމިޓީން އިސްނަގައިގެން މި މައްސަލަ ބަލަމުން އަންނަ އިރު، ކޮމިޓީ ކުރިއަށް ގެންދިއުމާމެދު މެންބަރުންނަށް ފެންނަ ގޮތެއް ހުށަހެޅުއްވުމަށް ފުރުސަތު ހުޅުވާލުމުން، ދިއްގަރު ދާއިރާގެ މެންބަރު އިކްރާމް ހަސަން ވަނީ ކޮމިޓީ ސިއްރުކުރުމަށް އެދިވަޑައިގަންނަވާފައެވެ.
މެންބަރު އިކްރާމް ވިދާޅުވީ މަޖިލީހުގައި މަސައްކަތްކުރާ ހުރިހާ މެންބަރުންނަކީ ވަރަށް މުހިންމު ދައުރެއް އަދާކުރަންޖެހޭ ބައެއް ކަމަށެވެ. އެއީ ރައްޔިތުންނަށް ބޭނުންވާ ގާނޫނުތައް ހިންގުމާއި، ސަރުކާރު ހިންގުމަށް ބޭނުންވާ ގާނޫނާއި ސަރުކާރު ޖަވާބުދާރީކޮށް ރައްޔިތުންގެ ހައްގުގައި މަސައްކަތް ކުރާ ބައެއް ކަމަށް އިކްރާމް ވިދާޅުވިއެވެ. އަދި މެންބަރުންނަށް ރައްކާތެރިކަމާއި އިމްތިޔާޒްތަކެއް ގާނޫނުގައި ބަޔާންކޮށްފައިވަނީ ވެސް ނިޒާމުގެ ތެރެއިން އެކަންކަން ދެނެގަނެފައިވާތީ ކަމަށެވެ.
ކޮމިޓީ ސިއްރުކުރުމަށް ދިއްގަރު ދާއިރާގެ މެންބަރު އިކްރާމް ހުށަހެޅުއްވި ހުށަހެޅުއްވުމަށް ތާއިދުކުރައްވާފައިވަނީ ތިނަދޫ ދެކުނު ދާއިރާގެ މެންބަރު އަބްދުﷲ ސަނީފްއެވެ.
އަދި ކޮމިޓީ ބައްދަލުވުން ސިއްރުކުރުމަށް ހުށަހެޅި ހުށަހެޅުމާމެދު ކޮމިޓީގެ މެންބަރުންނަށް ފެންނަ ގޮތަކަށް ވޯޓަށް އެހުމުން، ކޮމިޓީއަށް ހާޒިރުވެތިބި މެންބަރުންގެ އިއްތިފާގުން ވަނީ ކޮމިޓީ ސިއްރުކުރުމަށް ފާސްކޮށްފައެވެ.
އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރުދިން މައްސަލަ ބަލައިދިނުމަށް ރައްޔިތުންގެ މަޖިލީހުން ފުލުހުންނަށް ހުށަހަޅާ، އެ މައްސަލަ ފުލުހުން ދަނީ ބަލަމުންނެވެ. އަދި ޑިފެންސް މިނިސްޓްރީން އަންނަނީ މެންބަރަށް ސެކިއުރިޓީ ދެމުންނެވެ.
މަޖިލީހުން ބުނީ މެންބަރު ޝިފާއުއަށް މަރުގެ އިންޒާރުދިނުން އެ އިދާރާއިން ހަރުކަށި އިބާރާތުން ކުށްވެރިކުރާ ކަމަށެވެ. އަދި ސޯޝަލް މީޑިއާގައި އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރުދިނުމާ ގުޅިގެން އެ މައްސަލަ ބަލާ، ތަހުގީގުކުރުމަށް އެދި ދިވެހި ފުލުހުންގެ ހިދުމަތަށް މައްސަލަ ހުށަހަޅާފައިވާ ކަމަށެވެ. އަދި އެ މެންބަރުގެ ސަލާމަތާއި ރައްކާތެރިކަން ކަށަވަރުކޮށްދެއްވުން އެދި ދިފާއީ ވުޒާރާގައި ދަންނަވާފައިވާނެ ކަމަށް ވެސް މަޖިލީހުން ބުނެއެވެ.
ފުލުހުން ބުނީ އިހަވަންދޫ ދާއިރާގެ މެންބަރު މުހައްމަދު ޝިފާއުއަށް މަރުގެ އިންޒާރު ދީފައިވާކަމަށް ބުނެ އެ މައްސަލަ ބަލައިދިނުމަށް އެދި ހޯމަ ދުވަހުގެ ވަގުތެއްގައި ރައްޔިތުންގެ މަޖިލީހުން، ސިޓީއަކުން މައްސަލަ ހުށަހަޅާފައިވާ ކަމަށާއި އެ މައްސަލަ ތަހުގީގުކުރަމުންދާ ކަމަށެވެ.
ރައީސް މުއިއްޒު މަގާމުން ވަކިކުރާނެކަމަށް ވިދާޅުވި ޚަބަރު ފޭސްބުކްގައި ޕޯސްޓުކުރަމުން މީހަކު ހުތުރު ބަހުރުވައިން ޝިފާއުއަށް މުޚާތަބުކޮށް ބުނެފައިވަނީ "ކަރުވެސް ކަނޑާލަން ޖެހިދާނެ" ކަމަށެވެ. ޝިފާއުއަށް މަރުގެ އިންޒާރު ދިން މީހާ ވަނީ އިންޒާރުދީ އެކި ޕޯސްޓްތައް ފޭސްބުކުގައި ލިޔެފައެވެ.
މެންބަރު ޝިފާއުއަށް މަރުގެ އިންޒާރުދިން މައްސަލަ އެމްޑީޕީން ވެސް ވަނީ ކުށްވެރިކޮށް އެކަމާމެދު ކަންބޮޑުވުން ފާޅުކޮށްފައެވެ.
