ކާމިޔާބު ނުހޯދޭނެ ކުޅުންތެރިންނާއި އޮފިޝަލުން ޔުނައިޓެޑްގައި އެބަތިބި: މޮރީނިއޯ
މޮރީނިއޯ ބުނީ އޭނާ ކޯޗުކޮށްދިންއިރު ތިބި ގޯސް މީހުން، އަދިވެސް އެ ގޮތުގައި އެބަތިބި ކަމަށް
މޮރީނިއޯ: ޔުނައިޓެޑްގެ ބެންޗުގައި
މެންޗެސްޓަރ ޔުނައިޓެޑަށް އެމީހުން ލައިގެން ކާމިޔާބު ނުހޯދޭނެފަދަ ކުޅުންތެރިންނާއި އޮފިޝަލުން ކުލަބުގައި އެބަތިބިކަމަށް، ކުރީގެ ކޯޗު ހޯސޭ މޮރީނިއޯ ބުނެފިއެވެ.
2016 ވަނަ އަހަރުން ފެށިގެން 2018އަށް، ޔުނައިޓެޑަށް ކޯޗުކޮށްދިން މޮރީނިއޯ ބުނީ އޭނާ ކޯޗުކޮށްދިންއިރު ތިބި ގޯސް މީހުން އަދިވެސް އެ ގޮތުގައި ކުލަބުގައި އެތިބީ ކަމަށެވެ.
ޔުނައިޓެޑަށް އެފްއޭކަޕާއި ޔޫރޮޕާ ލީގް ހިމެނޭގޮތުން، ތިން ތަށި ހޯދައިދިން ކޯޗު ބުނީ ޔުނައިޓެޑްގެ ބައެއް ކުޅުންތެރިންގެ ހަގީގީ ކުލަވަރު ފެންނަން ފަށަނީ 90 މެޗު ނުނިމެނީސް އެމީހުން ބަދަލުކުރުމުން ކަމަށެވެ.
އިނގިރޭސި ލީގުގެ ހަތްވަނާގައި މިވަގުތު އޮތް ޓީމާ ބެހޭގޮތުން މޮރީނިއޯ އިތުރަށް ވާހަކަ ދައްކަމުން ބުނީ، ޔުނައިޓެޑަށް ކޮންމެ ކޯޗަކު ދިޔަނަމަވެސް ބައެއް އުސޫލުތަކާއި މީހުންނާއި ކުޅުންތެރިން ބަދަލުކޮށްގެން މެނުވީ ކާމިޔާބީއާ ހަމައަށް ދާން ދަތިވާނެކަމަށެވެ.
